Dadku diide
FAATAXO, ee bal DAADKANA ha lagu dayo.
Daad: waa
biyo xawli ku socda oo baabiinaya noolaha iyo deegaanka
intaba, isla markaana aan lahayn meel laga xiro ama laga
yareeyo sida tuubada oo kale, waana musiibo rabbaani ah oo u
badan inaysan cidina ka badbaadin, cidduu Alle badbaadsho
mooyee..................
Madaxweynihii
dowladdii KMG ahayd ee lagu soo dhisay magaalada Carta ee
waqtigeedii dhammaaday, Dr. C/qaasim Salaad Xasan, ayaa
khudbadihiisii laga xasuustaa ereyo ay ka mid ahaayeen
“WALAALAYAAL FAATAXADA NOO MARA IN ILAAHAY RAXMADDA KU JIRTA
SAMOOYINKA IYO ARLADA UU NA SIIYO” jumladahaas oo uu u
adeegsan jiray si ku celcelis leh marka uu dadka la hadlayo,
waqtigaas oo ay ka soo horjeedeen dowladdiisa inta badan
ragga siyaasiyiinta ah ee hubaysan oo aan iyagu ka mid aheyn
dowladdiisii.
Si kasta oo
madaxweynihii hore uu u adeegsanayay ereyo deggan oo
nabadeed, haddana ma soo jiidin in kuwii ka soo horjeeday
maamulkiisa ay soo debcaan kuna soo biiraan dowladdiisa,
iyadoo waqtigii kursiga C/qaasimna uu dhammaaday isagoo
aysan weli afkiisa ka sii dhammaan ducadii iyo Faataxadii uu
madaxweynuhu ku caan baxay. Dadku waqtigaas ma dhegeysan
ducadii mana aqbalin Faataxadii, xilligii Dowladdii Cartana
wuxuu tegay iyadoon waddankii waxba aysan iska bedelin oo
weli fowdadii iyo kala dambeyn la’aantii, ay sidoodii u
baahsan yihiin “DOWLADDII CARTA WAXAA LAGU XASUUSTAA OO
KELIYA INAY DALKA DAGAALLO U HORSEEDIN IYO INAY BOORKA KA
JAFTAY KURAASTII AY SOOMAALIYA KU LAHAYD URURO GOBOLEEDYADA
IYO KUWA CAALAMIGA AH” sidaas waxaa qaba in badan oo
Soomaaliyeed oo aan wada sheekeysannay.
Haddaba tan
iyo kolkii Korneyl C/laahi Yuusuf loo doortey jagada
madaxweynenimada ee dowladda federaalka KMG ah ee
Soomaaliya, Wuxuu madaxweynuhu jeedinayay khudbado laga
dhadhansan karay ereyo kulkulul oo dad badani ay dhibsadeen,
iyadoo dadka qaarkiisna ay ku tilmameemeen in ereyada adag
ee ku jira hadalka madaxweynaha, aysan ku haboonaan lahayn
waqtigan oo dadka Soomaaliyeed ay u baahan yihiin qaboojin
iyo dib u heshiisiin rasmi ah.
Ereyada ad
adag ee ugu saameynta ballaaran ee dadka qaar ay soo
soocdaan marka madaxweynu hadal jeediyo, waxaa ka mid ah
“INTA YAR WAAN JIIRAYNAA, NIN IGA DAGAAL IYO HUB BADAN MA
JIRO, SANOOYIN BADAN AYAAN DAGAAL KU SOO JIRAY, NIN DABIN KA
BOODI JIRAY DABIN LOOMA DHIGO, DAADKA AYAA QAADAYA INTII KA
HORTIMAADDA DOWLADDA, DAADKUNA WAA RABITAANKA DADKA”
ereyadaas iyo kuwo kale ayaa waxay noqdeen waxyaalaha aadka
loo hadal hayo, waxayna dadweynuhu isugu jiraan kuwo u
riyaaqsan oo qaba in socodsiinta dowladdan loo adeegsado
xoog, si dhaqsiyo loogu soo celiyo ammaankii iyo kala
dambeyntiiba dalka Soomaaliya, deg degna dhibka looga baxo,
kuwo kale oo dadweynaha ka mid ahina waxay ku doodayaan, in
laga fogaado wax allaale iyo wixii keeni kara dagaal, oo la
adeegsado waddo nabadeed oo baryo iyo isu tanaasul ku dhisan,
si looga weecdo dagaallo kale oo dalka ka qarxa.
Si kastaba ha
ahaatee, madaxweyne C/laahi Yuusuf, waxa uu u muuqdaa, qof
waaya aragnimo badan ka qaatay waxna ka bartay dowladdii
isaga ka horeysay ee C/qaasim Salaad Xasan, taas oo iyadu
wax ku keeni waysay habkii qunyar socodnimada iyo ka
meermeeridda dagaal dib uga qarxo dalka Soomaaliya oo la
oran karo waa habkii FAATAXADA, waxaana laga yaabaa inay
sababtaas tahay arinta ku xambaareysa madaxweynaha cusub,
Korneyl C/laahi Yuusuf inuu adeegsado erayo ay ka mid yihiin
DAAD xawli ku socda iyo mawjado rogmanaya, si uu cagta u
mariyo kuwii ay ka talaabsan weysay dowladdii FAATAXADA ee
Dr. C/qaasim Salaad Xasan oo cid mucaaradda ay ugu horeysey
madaxweynaha cusub ee dowladda DAADKA, Korneyl C/laahi
Yuusuf Axmed.
Waa suurta gal
in mararka qaar xoog wax ku xalismaan, laakiin ummadda
Soomaaliyeed oo dhaqan ahaan qabiil qabiil u nool, qaran
jabkoodiina uu sababsaday adeegsiga qabyaaladda, ma laga
yaabaa in dowladda DAADKU ka badbaaddo in ay lugaha la gasho
dagaallo sokeeye oo hor leh, isfahamkii iyo isu soo
dhawaanshaha yar ee la unkayna sow lagama yaabo inay kala
furfurato, haddana sidan maanta lagu jiro ma tahay wax la
sii fiirsan karo, ummaddu ma ku sii noolaan kartaa
dhibaatooyinkan haysta ee dhinac walba leh, DAAD iyo ereyo
kululse xal ma u keeni karaan shacabkan dhibaateysan in ka
badan 14 sano oo xiriir ah?.
Waxay ila
tahay in la joogo waqti mas’uuliyiiinta dowladdan federaalka
KMG ahi ay qaadan lahaayeen go’aanno wax ku ool ah oo dalka
u horseedi kara nabad iyo horumar, si taas loo helana waxa
habboon in marka hore ay iyagu dhexdooda ka heshiiyaan
iyagoo si feejignaani ku jirto uga baaraan degaya danta guud
ee qaranka , isu caqli celinaya isuna sabraya si yoolkii dib
u heshiisiinta ee dowladdani balan qaaday loo gaaro, ka
dibna ay islaaxiyaan ammaanka iyo kala dambeynta dalka, taas
oo ay ku xaqiijin karaan sii wadidda wada hadallada nabadeed
mudada afarta sano ah ee u harsan dowladda.
Dowladdii cidla joog, maxay curatoo dalka keentay? |
A.D.
Elmi
BARAFKA
LAMA SHIILO!!! |
A.D. Elmi
A.D. Elmi
adelmi@hotmail.com
Afeef: Aragtida qoraalkan
waxaa leh qoraaga ku saxiixan
Faafin: SomaliTalk.com |
July31, 2005
»DAREENKA
KHUDBADDA MADAXWEYNAHA | M. Maax
»MAXAA
DHEELIYAY GAALKACYO NABADEEDA
| Kulmiye
»Cadde
Muusoow, Ha Gelin Meherad Kaa Dheer
| C/Waaxid
»Hogaamiye
Kooxeedyada Muqdisho Ma Dagaalamayaan Mise..
| Taako
»Reer
Hiiraan ayagaa xaq u leh in ay aayahooda ka tashadaan
| M. Elmi
»Digniin
ku socoto siyaasiinta D&M Calooshood ushaqeeystiyaalka ah
»Tahniyad
Caleema Saarka Ugaaska Beesha Ceyr
| Xassan
»Yaa
ah Professor?, Dr.? |
Mohamed S.Ali
»Shebekadaha
Iyo Qalimadda Af-lagaadada Iyo Xumaanta Doortay
»Xaalada
Muqdisho ee Maanta |
Eng: Mohamed Bashi
»GABAY::: Maanso
inan’ madow | Maansadii abdiaziz osman
Booliiska London oo
Magcaabay Labo Nin oo Lagu Tuhunsan Yahay Qaraxyadii
Muktar Said Ibrahim iyo Yasin Hassan Omar ayey
Booliska London magcaabeen waxayna uga shakiyeen in...
Guji..
Dugsi wax Lagu Barayo
indhoolayaasha oo laga Furay Muqdisho
»Yemen:
Shidaal Soomaliya loo tahriibinaayey oo la qabtay.
»Ra'iisul
Wasaare Geedi oo Dhambaal tacsi ah u Diray Britain
Wararka oo dhan ka
Akhri Halkan.. Guji..
| 
Daabaco
Boggan | Print
Fadeexada
Paltalkga: iyo Dulmiga Walaasha Muslimada ah....... GUJI....