Daabaco Boggan | Print

Filimada anshaxa xun, ruugidda Qaadka iyo isticmaalka Daroogadu Saamayn intee le'eg Bay ku Leeyihiin Faafidda Cudurka AIDSKA ee Soomaaliya.. Guji... XAMAR DAAWO DACALLADA.. SAWIRRO Fadeexada Paltalkga: iyo Dulmiga Walaasha Muslimada ah....... GUJI.... Qaabka Loo Qoro Wararka, Faalooyinka iyo Ra'yiga

DHUL SHISHEEYE

Jh suleiman
omane24@yahoo.com

Gabaygan oo la yidhaahdo dhul shisheeye Wuxuu ka hadlayaa saddex arimood oo aniga Iila muuqday inay haysato umada somaliyeed Meel kasta oo ay joogto una baahan in laga hadlo Iyadoo la eegayo mustaqbalkeena dambe. 1.waxa jira dad aad u badan oo dibadaha ku nool Dhibaatooyin badana kala kulma marka laga eego Xaga sharciga.shaqada. dhaqanka iyo isjidhdiidkaba 2.waxaad moodaa inta ku hadhay somaliya naftoodu Inaanay haysan daryeelkii qofka muwaadinka ahi Dalkiisa ka heli lahaa sababo badan awgood oo qaar badani u heelan yihiin inay maruun ka baxaan iyaga oo aan ogayn waxa qurbaha kaga horeeya la yaabna malaha dadkaasi oo waa loo garaabi karaa. 3.arinta kalena waxay tahay marka aad eegto sida aduunku isu bedelayo maalin kasta ama umaduhu isu riixayaan waxay u muuqataa in dhibaato aan yarayni inagaga soo socoto dhanka itoobiya oo ah dad aad iyo aad inooga badan si aan xadi lahayna dadkoodu u soo gelayaan wadankeena iyagoo u socda inay degaan kana faaiidaysanaaya burburka iyo maamul la’aanta ka jirta dalka.

Taas oo hadii ay sii socoto keeni doonta inay ina qarqiyaan Aakhirkana aynu noqono dad laga badan yahay oo aan codlahayn Hana ilaawin waxa jirta sheeko kutidhi kuteen ah oo oromadu Ku sheegato inay hargeysa lahaan jireen una yaqaaneen(HERER GEYS). Tusaale waxa kuugu filan sida yuhuudu falastiin dhulkoodii Uga dhaceen ilaa maantana u soo guurayaan Cadaanka south africa.chechnia oboriginalka australia Mooriga newzealand iyo red indianka america Markaa waxay iila muuqatey inaan arimahaas wax ka idhaahdo. Inkastoo niman badan oo aanu saaxiib nahay igu diidaan fikradayda gaar ahaan ta itoobiya oo ay yidhaahdaan waa midaan dhacaynin.                      

Waana dood u furan cidii fikradooda ka dhiibanaysa. 

1. Shiinow dhibaatada aduun laga dhamaan waaye
2. Shalay dhaantey mooyee walaal maanta waa dhamace
3. Xalay gelin dhexaadkii tixdii dhagida ii diiday
4. Ee dhabanahays igu dishee dhaxanta ii saartay
5. Dharas iyo calool xumo tixdaan dhinaca hayn waayey
6. Dheel dheel ciyaar uma tirshiyo waygu soo dhacaye
7. Bal dhegeyso oo maqal adaan qodob ku dhaafayne
8. Inkastoon dhul dheer kala jiroo laga dhamaanaynin
9. Dhambaalkaagu ina faaraxow waygu dheer yahaye
10. Adigaa dhab ii garanayiyo dheega aan ahaye
11. Dhalashiyo walaalnimona way naga dhexaysaaye
12. Waqtigayna kala dhoofiyoo waayahaa dhigaye
13. Dhalin yaro hadaad igu ogeyd dhoorka iyo fooda
14. Way iga dhamaadeen timihii dhumucda weynaaye
15. Dhabanadii ciray buuxisoo dhaayihii gabaye
16. Dheeldheeligaygaad inaan dhacayo moodaaye
     

17. Afartaa sidii laamo dhebi maysku wada dhiibshey
18. Dhugmadiisa kama leexinine dhidibka maw aasay
19. Dhaxalbay murtidu leedahaye dhinac kalaan baanan
20. Dhul shisheeye dheef lagama helo dhixitin mooyaane
21. Dhibaa lagu qabaa waa beryaba dhiilo aan go’ine
22. Dhaqashadu ha joogtee cidlada dhoorku nagu daalye
23. Dhadhan malaha dhuuniga qurbuhu dheregu yeelkiiye
24. Dhismaha iyo daaraha guryaha laysku dhinac gooyey
25. Dhabada iyo laamiga is jara dhinac kastood eegto
26. Dharaar iyo habeen laydh aan go’in daxanta jiilaalka
27. Dhaldhalaalka johannesburg dheemankiyo luulka
28. Dhedo aniga iigama duwana dharab arooryaade
29. Dhaxal bay u tahay wiilal kale dhaadashiyo faane
30. Dhiilada cabsidu wehelisiyo dhawrsigaan nacaye
31. Dhaartiyo dhafoor taabashada hadalo dheeraado
32. Dhulka malihid bay nagu hayaan waad na dhacaysaane
33. Dhoof baad ku timi baa na dilay dhagari raacdaaye
34. Dhukus baan dariiqyada maraa dhuumashaa badane
35. Dhebel baan u yaacnaa markay nagu dhawaaqaane
36. Ma dhiirado qurbaha ruux hadii dhibi ku haysaaye
37. Nin dhantaalan baad tahay sidii dhaawac kugu yaale
     

38. Afartaa sidii laamo dhebi maysku wada dhiibshey
39. Dhugmadiisa kama leexanine dhidibka maw aasay
40. Dhaxalbay murtidu leedahaye dhinac kalaan baanan
41. Dhuuxii hargeysiyo burciyo dhoobadiyo hawdka 
42. Hadii aan dhulkii tegi lahaa dhiilo laga keenye
43. Gobanimadii naga dheelidoo qaranki dhiilawye
44. Dhicisowyey calankii wax badan dhiiga loo qubaye
45. Dhoodiyo sanaag iyo togdheer dheefba laga waaye
46. Dhibicdii la waa roobki guga dhoolki karameede
47. Dhulkii xaaluf noqoy kana idlaa ubax dhalaalaaye
48. Dhirtii aad tiqiin iyo la madhi qudhaci dheeraaye
49. sidii dhuxusha iib loogu helay geed ma dhaafaane
50. Maalkii dhamaa oo ma hadhin dhogorti xoolaade
51. Dhay lagama helo dalawadii dhiilka loo culaye
52. Wankii dhabarka weynaa markii horeba loo dhoofshey
53. Dhadigaaba lagu sii wadaa saylad naga dheere
     

54. Afartaa sidii laamo dhebi maysku wada dhiibshey
55. Dhugmadiisa kama leexinine dhidibka maw aasay
56. Dhaxalbay murtidu leedahaye dhinac kalaan baanan
57. Nimanyohow dhibaataan arkaa cidina dhaadeyne
58. Dhegihii daboolmaa xaqay orod ku dhaafaane
59. Dhankastaba ha joogee intii magaca dhawraysa
60. Ama dhalasho somalinimo ceebka dhididaysa
61. Dhidarkaa xabaalaha qodoo ceeb u dhaadhaca’e
62. Waan idin dhaleecaynayaa idin dhaliilaaye
63. Umadaa dhamaanteed cadilan dhinac kastood eegto
64. Een dhaana meel ugu maqnayn dhoomo lagu qaado
65. Dhufaysyada intaw qodanaysaan dhaca xigaalkiina
66. Dhudhubaha intaad kula jirtaan dhamacda baaruuda
67. Dhuljiif iyo intaad daydayow dhagar maleegayso
68. Dhan kalaaba laga soo galoo layga soo dhacaye
69. Oromada dhulkeenii hantiday dhuganba maysaane
70. Boqolaal kun dhaafoo intaa way is dhalayaane
71. Waxba yaanay dhar ii maydhinoo dhoobi ii noqone
72. Waxba yaanay dhismiyo daaro iyo dhagaxa ii jebine
73. Dhirbaaxay inala maaganyiin dhaxal wareegeene
74. Hadaan dhiidhi laga muujinoo layska dhicin maanta
75. Inta aanay ina dhalan rogino ina dhibaataynin
76. Weli waynu dhownee hadaan dhacanta loo jiidin
77. Oo aan wixii dhacay dhacee laga dhabayn maanta
78. Oo wiilal wada dhiiran iyo damasta loo qaadan
79. Dhiilkeeni baa buuxsamee duuga ila dhawra
80. Falastiin kun soo dhoofayoo cidina dhaadaynin
81. Oo soo dhex galay baa mar qudha dhaabada u jaraye
82. Dhabadaa la qaadsiiyayoo deyrna loo dhigaye
83. Dheeldheel ayey moodayeen dhawrkan soo qaxaye
84. Iminkay dhamaantood xeryaha dhaxanta jiifaane
85. Inagaa sidoodii ka dhigan dhoy la’aaneede
86. Maxamuud maxaa inagu dhacay ways dhiganaynaaye

Jh suleiman
omane24@yahoo.com    

Afeef: Aragtida Gabaygan waxaa leh qopraaga ku saxiixan

Faafin: SomaliTalk.com | July 29, 2005

WAA QABIILKEE YAASIIN XASAN CUMAR
Ninka ay warbaahinta UK ku sheegeen in jinsiyadiisu tahay Soomaali oo lagu tuhmayo qaraxyadii London "qabiilkee buu Soomaali ka yahay"... Guji..

Wararka Qaraxyada London ka Akhri halkan...

BAARID | SEARCH