Barnaamijkii Radio Xoriyo
12 July. 2005
- Mucaaradka Itoobiya oo
diiday natiijada doorashada ee la soo bandhigay.
Duuliyayaal
kale oo Itoobiya ka goostay.
Hub Itoobiya
laga keenay oo Jawhar soo gaadhay.
Iyo
Barnaamijkii Aragtida Halgamaaga.
======================
Labada xisbi ee mucaaradka
itoobiya ugu weyn ee lagu kala magacaabo CUD iyo UEDF ayaa
tallaabo xilksanimo darro ah ku tilmaamay natiijadii kala
dhantaalayd ee xafiiska doorashooyinka Itoobiya uu ku
dhawaaqay dhawr maalmood ka hor, taasoo ahayd in 307 kursi
ilaa iyo hadda natiijadooda la hayo.
Xisbiga UEDF ayaa sheegay
inuuna aqbalaynin natiijada kala dhiman ee la soo bandhigay,
wuxuuna tilmaamay in xisbiyada oo dhan ay ku heshiiyeen in
la soo bandhigo natiijada kama denbaysta ah marka laga soo
faraxasho baadhista lagu hayo musuqmaasuqii ay mucaaradku ka
ashkatoodeen. Xisbiga UEDF wuxuu natiijadan kala dhantaalan
ee lagu dhawaaqay ku tilmaamay mid aan wax macna ah ku
fadhiyin.
Afhayeen u hadlay xisbiga
UEDF ayaa sheegay in xisbigiisu uuna marna aqbali doonin
natiijadan uu xafiiska doorashooyinku ku dhawaaqay, wuxuuna
sheegay in xisbigiisu uu sugi doono natiijada kama denbaysta
ah ee loo baahan yahay in la soo bandhigo marka go’aan laga
gaadho eedaha musuqmaasuqa ah ee la soo jeediyay oo dhan.
Xisbiga CUD ayaa isaguna ka
biya-diiday natiijada dhawaan lagu dhawaaqay, wuxuuna ku
tilmaamay mid aan qiimo lahayn. Xisbiga CUD ayaa sheegay
inay lagama maarmaan tahay in marka hore go’aan laga soo
saaro dacwadaha musuqmaasuqa ku saaban, ka dibna natiijo
dhammays tiran lagu dhawaaqo.
Dhinaca kale ;Midowga Yurub
ayaa xukuumadda Itoobiya ugu baaqay inay ixtiraamto
heshiiyadii ay xisbiyada la gashay, isla markaana ayna meel
uga dhicin qorshayaasha la xidhiidha go’aan ka gaadhista
dacwadaha doorashooyinka ku saabsan. Midowga Yurub wuxuu
arrintan ku baaqay, ka dib markii safiirka Midowga Yurub uu
xukuumadda Itoobiya la kulmay dab-yaaqadii toddobaadkii hore,
si uu ugala xaajoodo dhacdooyinkii ka denbeeyay doorashadii
la qabtay 15-kii May.
Midowga Yurub wuxuu
xukuumadda Itoobiya ka dalbay in la qaado tallaabooyinka loo
baahan yahay oo dhan, si loo suurageliyo go’aan ka gaadhista
dacwadaha doorashooyinka, wuxuu sidoo kale ka dalbay in la
sugo nabadgelyada dadka markhaatiyaasha ah ee caddaynta
dacwadahaas loo adeegsanayo.
Duuliyayaal kale oo
Itoobiya ka goostay.
Seddex duuliye oo ka
tirsanaa ciidammada cirka ee Itoobiya ayaa toddobaadkii hore
goostay, waxayna seddexdan duuliye ee hadda goostay ka
dhigayaan duuliyayaasha muddo bil ah Itoobiya ka goostay 13
duuliye.
Duuliyayaashani waxay ka
tirsanaayeen guutada gaadiidka ee ciidanka cirka, waxayna
kala yihiin:
1. Lt. Ephrem Kebede
2. Lt. Sintayehu Beyene
3. Lt. Fitsum Getachew
Seddexdan duuliye wali lama
sheegin meesha ay u goosteen, hase yeeshee waxaa la sheegay
inay ka tirsanaayeen qaybtii ay ka goosteen 8 duuliye ee
tababarka u joogay dalka Belarus, kuwaasoo magangelyo
siyaasadeed codsaday, iyagoo ka gilgilanaya xasuuqii ay
xukuumadda Zenawi u gaysatay dadwayne bannaanbax ku
samaynayay magaalada Addis Ababa, halkaasoo ay ku dishay ugu
yaraan 40 qof.
Seddexdan duuliye intii
ayna goosanin ka hor waxaa laga mamnuucay inay diyaarad
duuliyaan. Waxaana la sheegay in sirdoonka Itoobiya ay
baadhis ku sameeyeen guryaha nimankan intii duullimaadka
laga joojiyay.
Hub Itoobiya laga keenay
oo Jawhar soo gaadhay.
Wararka ka imanaya
magaalada Baledweyne ee gobolka Hiiraan ayaa sheegaya in
gobolka Hiiraan ay ka gudbeen gawaadhi xamuul ah oo wadday
rasaas iyo hub kala duwan oo ka yimid dhinaca gumaysiga
Itoobiya. Hubkaas ayaa lagu soo warramayaa inuu gaadhay
magaalada Jawhar, oo xarun u ah qaybo ka mid ah dawlada ku
meelgaadhka ah ee Soomaaliya.
Hubkan ayaa la sheegayaa in
xukuumadda Itoobiya ay siisay dawlada ku meelgaadhka ah ee
fadhigeedu yahay magaalada Jawhar.
Dhinaca kale warar laga
helayo dhinaca deegaanka Feerfeer ayaa sheegaya in saraakiil
Itoobiyaan ahi ay ku soo jeedaan dhinaca magaalada Jawhar,
si ay gacan uga gaystaan sladhig ciidan oo halkaas laga
samayn doono.
Xukuumadda Itoobiya ayaa ku
caan-baxday hub isugu dhiibidda kooxaha iskaga soo horjeeda
siyaasada Soomaaliya, iyadoo dhinacyada iska soo horjeeda
mid walba dhinciisa ula xidhiidha, isla markaana hub iyo
saanad kalaba siisa kooxaha gacan saarka la leh.
Dhinaca kale ciidamo
Itoobiyaan ah ayaa lagu soo waramayaa inay dhaqdhaqaaq
ciidan ka wadaan xadka u dhaxeeya gobolka Galgaduud ee dalka
Soomaaliya iyo Ogaadeenya.
Sida ay sheegayaan wararka
ka imanaya deegaanada Cabudwaaq iyo Balanbale, waxay ciidamo
Itoobiyaan ahi soo buuxiyeen qeybo ka tirsan xuduud
beenaadka u dhexeeya gobolka Galgaduud iyo Ogaadeenya.
Wararkii ugu danbeeyey ee
halkaasi naga soo gaadhaya ayaa sheegaya in ciidamada
Itoobiyaanka ahi ay iminka soo buuxiyeen deegaanka Axmed
Gurey, oo la sheegay inay dhooban yihiin iyagoo wata qaar ka
mid ah gaadiidka dagaalka oo ay taangiyadu ka mid yihiin.
Ciidamadan ayaa sidoo kale
horay u buuxiyay deegaanka Cilanle iyo deegaano kale oo ka
tirsan gobolka Galgaduud.
Ciidamadan ayaa horaantii
todobaadkii hore waxa ay sidoo kale tageen deegaanada
Xeraale iyo Balanbale, halkaasoo ay dadku su’aalo ku
waydiiyeen.
Radio Xoriyo
12 July. 2005
C/nuur Sh. Mohamed
radioxoriyo@ogaden.com
raadioxoriyo@yahoo.com
Radio Xoriyo waxaad ka dhegaysan
kartaa Mawjadda 19 MB ee dhererkeedu yahay 15670 KHZ,
Maalmaha Talaadada iyo Jimcaha 7: 30PM waqtiga Afrikada Bari
Faafin: SomaliTalk.com | July
12, 2005
"228
Gabdhood oo Lagu Kufsaday Gobolada Jubbooyinka - 1dii Janaayo ilaa 8dii July"
Sidaas waxaa shaaca ka qaaday hay'adda Xuquuqda
aadamiga u dooda ee Faanoole, taas oo intaas ku dartay in sannadkan Jubbooyinka
lagu diley ugu yaraan 64 qof ayadoo...
Guji...
|