::: SomaliTalk.com :::

Canab Mumtaz | canabmumtaz@yahoo.com | SomaliTalk | Kampala | Aug 20, 2005

In ka badan konton saraakiil iyo jeneraalo iskugu jira ayaa maanta soo gaaray magaalada Kampala ee dalka Ugandha kana kala yimid gobolada dalka Soomaaliya iyagoo Ugandha ku qaadan doona siminaar la xiriira kor u qaadista xirfadda ciidamadda milatariga Soomaaliyeed iyo kuwa booliiskaba.

Saraakiishan oo ka soo duulay magaalada Kismaayo waxaa safarkooda isku soo duwey Qaramada Midoobay waxaana casuumad rasmi ah u fidisay dowlada Ugandha oo horay u sheegtay in ay siin doonto tababar qaar ka mid ah saraakiisha ciidanka Soomaaliyeed si ay iyagana ugu sii faa'iideeyaan maliishiyaadka hadda loo diyaarinayo in ay ka qayb qaataan Amaanka dalka Soomaaliya ee la shaqaynaya dowlada Soomaaliya.

Saraakiishan waxaa tabarkooda ka qayb qaadan doona qaar ka mida ah saraakiisha ciidanka milatari ee Dowlada Ugandha waxaana kharashkooda bixinaya Qaramada Midoobay waxaana uu siminaarkani u bilaaban doonaa maalmaha soo socda hadii Alle idmo.

Horay ayay dowladda Ugandha u joojisay ciidamadii ay ugu talagashay Somaliya in ay u dirto dhowr sababood oo ay ka mid yihiin khilaafka Dowladda Somaliya ka dhex jira ee ku aadan dhinaca Dastuurka iyo cunaqabatayntii hubka ee ay sii adkaysay Golaha Amaanka Qaramada Midoobay.

Canab Mumtaz | canabmumtaz@yahoo.com | SomaliTalk | Kampala | Aug 20, 2005

Dagaal culus oo maanta ka dhacay Duleedka Xerada Hiilweyne nawaaxiga Balcad

File Photo: Middle East

Muqdisho:- Saaka ayuu dagaal culus ka qarxay duleedka magaalada Balcad ee nawaaxiga Xerada Hiilweyne oo ay hada ku jiraan maleeshiyooyin Xamar laga aruuriyey.

Weerarkan ayaa la sheegay inuu soo qaadeen maleeshiyo uu hogaaminayo ninka lagu magacaabo Macalin Xaashi oo asagu sheegta Guddoomiyaha Xamar iyo xamar-daye, duulaankaasi oo lala beegsaday maleeshiyooyinka ka amar qaata guddoomiyihii hore ee gobalka Banaadir Ibraahim Shaaweey iyo Wasiirka Amniga Qaranka Maxamed Qanyare Afrax.

Dagaalkan oo socday muddo nus saac ku dhaw ayaa markii danbe qaboobay kadib markii maleeshiyadii Maxamed Qanyare ay ka baxeen deegaankaasi ayagoo hada isku arurusaday goobta loo yaqaan Gubta oo kamid ah Xaafada Dayniile ee Muqdisho.

Dagaalkan ayaan la aqoon waxa keenay, balse waxaa la filayaa inuu salka ku haya hadalo kulul oo ay beryahan is dhaafsanayeen Ibraahim Shaaweey oo gacan taageero milatari ka hela Maxamed Qanyare oo ah Wasiirka Amniga Qaranka ee dowlada Federaalka iyo hogaamiyaha Macalin Xaashi oo asagu aaminsan inuu yahay Guddoomiyaha Xamar iyo Xamar-daye.

Labada dhinac ayaa midba midka kale ku eedaynayaa inuu dagaalkii maanta uu bilaabay, balse ma jiraan wax khasaaro ah oo ay labada dhinac sheegteen.

Hase yeeshee Wararka madax banaan ee naga soo gaaraya magaalada Balcad ayaa sheegaya in dagaalkaasi oo ahaa mid la isku adeegsaday hubka noocyadiisa kala duwan uuna keenay khasaaro u badan dhaawac soo kala gaaray labada garab ee halkaa isku hardiday.

jaamac Maxamed Ismaaciil