Soomaalida Minnesota oo Cambaaraysay Qaraxyadii July 7, 2005 Ka Dhacay London, UK

Waxaa kulanka ka soo qayb galay: Qunsulka Britain u fadhiya Chicago, Safiirkii Maraykanka u fadhiyi jirey Soomaaliya, Senator Coleman, Qareenka gobolka, iyo Soomaali farabadan oo leh culimo, aqoonyahanno, rag iyo dumar iyo marti kale..

Xusuuqda Sawiradan waxaa leh SomaliTalk.com Madaxdii khudbayneysey oo la soo dhoweynayo Furitaankii shirka Ambasaddor T. Frank Crigler oo madasha ka halaya Xaawo Ayeyo oo Buraanbur tirineysa Daahir Xasan oo metelaya DFKMG Qunsulka Britain Andrew Seaton madasha ka hadlaya Sheikh Cabdisalaan oo ka hadlaya madasha... Maxamuud Wardheere oo madasha ka hadlaya Senator Norm Coleman oo k ahadlay madasha Zakariye Aaden weiyha SomaliShow TV oo  oo casarkii soo tukadey kun asoo laabanay madasha si uu duubitaanka usii wado.

SomaliTalk.com (Aug 17, 2005): Kulan ay soo qaban qaabiyeen Jaaliyada Soomaaliyeed ee ku dhaqan gobolka Minnesota ayaa galabnimadii Talaadada (Aug 16, 2005) lagu qabtay Jaamacada Hamline University oo ku taal magaalada St. Paul oo kamid ah magaalooyinka Mataanaha (Minneapolis/St. Paul).

Ugu horayn markey saacadu ahayd 4:30PM galabnimo ayaa waxaa shirka furay xiriiriyihii shirka, Maxamed Abuubakar Xaaji Xuseen oo ah Madaxweynaha ururka midowga Soomaalida "Council of Somali Unity", waxana uu sheegay sababta shirka la isugu yimid in ay tahay in ay Soomaalidu muujiyaan dareenkooda iyo tageeradooda ay la garab tagan yihiin Maraykanka iyo Britain la dagaalanka ay kula jiraan argagixsada.

Hor dhaca kadib, Maxamed Abuubakar Xaaji Xuseen waxa uu magarafoonka kusoo dhoweeyey Madaxweynaha Jaamacada uu kulanku ka dhacayey oo magaceeda la yiraahdo Linda Hanson iyo Hormuudka kulliyada Sharciga ee Jaamacada oo magaciisa la yiraahdo Jon Gordon, si ay madasha uga soo jeediyaan erayada furitaanka kulanka la isugu yimid. Waxayna u mahaad celiyeen dhammaan int ak asoo qayb gashay kulanka.

T. Frank Crigler

C/Qaadir Yaxye

Kaddib waxaa magarafoonka lagu soo dhaweeyey Ambassador Trusten Frank Crigler oo ahaan jirey safiirkii Maraykanka u fadhiyi Jirey Soomaaliya intii u dhexeysey April 24, 1987 ilaa April 1, 1990. Waxana uu ugu horayntii Jaaliyadda Soomaaliyeed ee reer Minnesota uga mahad celiyey isu imaatinka ay shirkan isugu yimaadeen. Waxana uu xusay sida uu uga xun yahay dililka ka dhaca Soomaaliya dhowaanahan, oo uu si gaar ah u xusay C/Qaadir Yaxye Cali oo July 11, 2005 lagu diley Muqdisho, waxana uu sheegay in uu Virginia kaga qayb galay tacsi loo dhigay. Waxana uu intaas ku daray asaga oo yiri: C/Qaadir Yaxye waxa uu kamid ahaan jirey Staff-kaygii xilligii aan safiirka ka ahaa Soomaaliya." Waxana uu sheegay in C/Qaadir uu Soomaaliya u tegey ka qayb qaadashada nabadaynta.

Ambassador T. Frank Crigler oo hadalkiisa sii wata waxa uu yiri: Waa arin bini'aadaminada ka baxsan in nafta laga qaado qof nabad raadis ah, taas ayaana ah argagixsada dhabta ah." Waxana uu hadalka ku daray: waxaan u rajaynayaa in Soomaaliy ay noqoto dawlad.

Dawladda Federaalka Kumeelgaarka ah ee Soomaaliya (DFKMG) waxaa kulanka uga soo qayb galay Daahir Xasan oo ah Qareenka Ra'iisul wasaaraha DFKMG, Cali Maxamed Geeddi. Daahir oo erayo kooban soo jeediyey waxa uu xusay sida ay Dawlada FKMG u cambaaraynayso argagxisada ayna dunida u garab taagan tahay.

Abwaan Maxamuud Cabdullaahi Ciise (Sangub)

Dadka kale ee Soomaaliyeed ee madasha ka hadlay waxaa ka mid ahaa Abwaan Maxamuud Cabdullaahi Ciise (Sangub) oo halkaas ka sheegay in Soomaalidu aysan rabin in ay ka qayb gasho argagxisada. Waxana uu yiri: dadka wax qarxinaya waxay ahaayeen dad qaxootinimo lagu keenay oo guryo la siiyey, iskuul la geeyey, oo ay ahayd in ay abaal gudaan. Waxana uu intaas ku daray asagoo yiri " Waxaan cambaaraynayaa Argaxisada" si uu u muujiyo cambaarayntaas waxa uu tiriyey gabay uu ugu magac daray "I Don't Brief My Eyes" oo uu sheegay in uu u tiriyey qaraxyadii September 11, 2001 ka dhacay New York. Waxana uu sheegay in aan dhacdadaas taariikhdu ilaawayn.

Waxaa kale oo buraanbur madasha ka soo jeedisey Xaawo (Ayeeyo), burburkaas oo dulucdiisu  ahayd in ay Soomaalidu daacad yihiin. Waxan ay tiri: Soomaalidu dhaqan uma laha in ay khiyaameeyaan dadka soo dhoweeya.

Waxa kale oo madasha ka hadlay Sheikh CabdiSalaan Shariif oo ku hadlay magaca Culimada waxa uu tibaaxay waxa ay diinta Islaamku kaqabto argagxisada. Waxana uu yiri: Waxaa Muslimka laga rabaa in haddii uu awood u leeyahay uu gacanta ka qabto ama ku suuliyo, haddii uu gacanta ku qaban waayo hadal ahaan ku suuliyo, haddii uu hadalka ku qaban waayona uu niyada ka necbaado. Waxana uu Sheikh Cabdsalaan hadalka kusoo koobay in Diinta islaamku ay tahay diin nabadeed

Andrew Seaton

Martidii kale ee shirka ka hadashay waxaa kamid ahaa Qunsulka dawlada Britain u fadhiya magaalada Chicago oo magaciisa la yiraahdo Andrew Seaton, waxana ugu horayntii sheegay in Jaaliyadda Soomaaliyeed ee ku dhaqan dalka Britain ay tiradoodu tahay 100,000 oo qof.

Qunsulka waxa uu Soomaalida Minnesota uga mahad celiyey shirka ay ku soo casumeen, asagoo sheegay gaar ahaan in uu uga mahad celinayo taageeradooda ay dawlada Britain la garab taagan yihiin la dagaalanka argagxisada. Waxana uu ka war bixiyey qaraxyadii London asagoo sheegay dadka dhibaatadu ka soo gaartey in ay isugu jireen 19 dal oo kala duwan, ahaayeena dad haysta diimo kala duwan sida Muslim, Christian, Jews, Sikh. Waxana uu sheegay in argagixsadu aysan kala soocin Muslimka iyo dadka aan Muslmika ahayn. Waxa kale oo uu ka war bixiyey sharciyada laga soo saaray Britain si looga hor tago argagixisada, asagoo sheegay in lala tashaday hoggaamiyayaasha Muslimiinta ah ee Britain. Asagoo yiri ma ahan in ay magaca Muslimka dhaawacaan koox yari.

Qunsulka Britain, Andrew Seaton, waxa uu sheegay in Muslimiinta Britain ay yihiin dad ka qayb qaata horumarka dalka. Waxan uu sheegay in ay Britain ka jiraan 110 School Muslim, iyo 1200 oo Masaajid iyo in Aqalka Britain ee loo yaqaan "House of Lords" ay xubno ka yihiin 5 Muslimiin ah, halka Aqalka "House of Common" ay xubno ka yihiin 4 Muslimiin ah.

Waxa kale oo uu Qunsulku xusay siyaasada Britain ee ku aadan Israel iyo Palestine. Waxana uu sheegay dadaalka uu Ra'iisul wasaaraha Britain, Tony Blair, ugu jiro horumarinta Qaarada Afrika. Waxa kale oo uu xusay xiriirka Britain iyo dalalka Muslimka.

Maxamuud Wardheere

Kaddib Maxamuud Nuur Wardheere oo Soomaalida reer Minnesota u mahad celiyey ayaa intii uusan magarafoonka ku soo dhoweyn waxa uu faallo gaabanka bixiyey Senator Norm Coleman oo xubin ka ah Guddiga aqalka Senate Maraykanka u qabilsan arimaha Dibada. Markii uu madasha soo istaagey waxa uu Senator-ku afSoomaali ku yiri "Soo dhowaada" asagoo u jeeda waftiga kale ee aan afsoomaaliga ku hadlin.

Senator Norm Coleman

Senator Coleman waxa uu yiri: Ma qiyaasi kareysaan sida aa ugu niyad samahay Soomaalida Minnesota. Asagoo hadalka ku xoojiyey "Kuwani waa wajigii Minnesota" asagoo ku jeeda dadka Soomaaliyeed ee soo camiray qolka weyn ee shirarka ee Jaamacadda.

Senator Coleman inta uu jaleecay Ambassador T. Frank Crigler ayuu ku yiri "Soomaaliya in aad Ambassador u noqotid ayaan kuugu codeynayaa". Hadalkaas markii uu yiri Soomaalidii madasha fadhidey inta ay istaageen ayey u sacbiyeen.

Senator Norm Coleman waxa uu hadalkii kusoo xiray "Haddii aan Soomaaliya hadda sidaas uga tagno waxay noqon doontaa meel argagxisado ku kobocdo."

Maxamuud Wardheere waxa uu xafiiska Senator Coleman u qaabisan yahay arrimaha Jaaliyadda Soomaaliyeed ee ku dhaqan Gobolka Minnesota. Coleman waa senator ka tirsan xisbiga Republican-ka ee hadda haya talada dalka Maraykanka.

Madaxda kale ee madasha lagu casumey waxaa kamid ahaa xafiiska qareenka gobolka.

Qoraalka rasmiga ah ee Soomaalida Minnesota si loo akhriyo waxaa magarafoonka lagu soo dhoweeyey Xaawo Kamaaludiin oo akhriday dhambaalkii ay jaaliyada Soomaaliyeed u dirayeen Dawladaha Britain iyo Maraykanka, dhambaalkaas oo ku qornaa luqada Afka Ingriisiga oo ay SomaliTalk.com soo tarjumtey waa kan:

---

"Soomaalidu Waxay Kasoo Hor Jeedaan Argagixisada

Magaca Allah Ayaan Ku Bilaabanayaa ee Naxariista guud iyo mid Gaar ahba Naxariista.

Xubnaha Xarumaha Islaamiga ah ee Soomaalida iyo Ururada Jaaliyadda oo garab taagan jaalkooda Ameerikaanka iyo dhammaan dadka damiirka leh meel kasta oo ay adduunka kaga sugan yihiin waxay si aan kala har lahayn u cambaaraynayaan ficilada argagixisada, oo ay ka mid yihiin qaraxyadii lala beegsaday London July 7, 2005, kuwaas oo tobankii sano ee ugu dambeeyey meelo badan oo adduunka ah si khaldan loogu fuliyey magaca Islaamka.

Soomaalidu waxay dareemayaan xanuunka ay dareemayaan dalalka lagu dhibaateeyey ficilada argagixisada, ayagoo u dareemaya si aan cid kale u dareemayn maadama ay yihiin (Soomaalidu) dhibayaal loo geystey argagxiso. Shan iyo tobankii sano ee ugu dambeeyey waxaa Soomaalida soogaarey arin aan inaba la qiyaasi karin oo burbur ah iyo carqalad ay ka dambeyeen dad ay isku midab yihiin, diin wadaag yihiin, iskun jinsi yihiin, taas oo muujineysa in argagixsadu aysan wax sabab ama ujeedo ah dooneyn ee ay falkooda naxariis darada ku fuliyaan. Argagixisada Soomaaliyeed waxay sababtay dagaalahli ah oo ay ku dhinteen 800,000 oo Soomaali ah, iyo weliba inay adduunka ku kala firdheen hal-million, iyo laba million oo ku barakacay gudaha dalka Soomaaliya.

Argagxisada nooca dilka shirqoolida ah ama qaab qarsoon loo maleegayo ayadoo la fulinayo argagax aan loo miidaan deyin ayaa noqday wax ku soo batay Soomaaliya tobankii bilood ee ugu dambeeyey, ilaa October 2004 Nairobi, Kenya lagu asaasay dawlada Federaalka Kumeel gaarka ah. Dadka Soomaaliyeed oo kaashanaya wadamada Afrikaanka ah ee deriska ah iyo beesha caalamka ayaa waxay dhiseen dawlad ku dhalatay nidaam dib u heshiisiin ah oo isu keentay dhammaan kooxaha Soomaaliyeed. Kordhida dilalka shirqoolka ah iyo falalka argagxisada waxay xiriir la leeyihiin in ay suurtogal tahay in ay dhici karto in dawladu ay ku guulaysato inay nabadeyso dalka (Soomaaliya). Sagaashan iyo shan (95) qof oo caan ah oo Soomaali ah ayaa si axmaqnimo ah oo shirqool ah lagu diley ilaa markii la asaasay dawlada (FKMG ee Soomaaliya.)

Soomaalida Minnesota waxay si xooggan ugu adkaysanayaan in aysan jiri karin wax sabab ama cudurdaar ah oo qiil looga dhigan karo in la gooyo nafaha dad aan dembi lahayn ama in wax la burburiyo ama la sababo dhaawac. Quraanka Kariimka ah waxa uu na barayaa in qofkii dila hal qof oo bini aadam ah oo aan waxba galabsan in uu la mid yahay qof diley aadamiga oo dhan. Anagoo ah dadka Muslimiin ah waxaan si cad u cambarayneynaa falalka qabiixa ah, anagoo u cambaarayneyna sida ugu xoogga badan, waxaana weydiisaneynaa in wax kasta oo suurtagal ah la sameeyo si sharciga loo hor keeno kawii ka dambeeyey falalkaas argagxisada ah loona mariyo ciqaab.

Islaamku waa diin nabad ah. Kuwa laaya dad aan waxba galabsan ma ahan Muslimiin. Argagxisada magaca Islaamka u adeegsanaya siyaasad waxa ay diinta u soo jiideen magac xumo. Islaamku wuxuu u tixgeliyaa argagaxisada sidey doontoba ha ahaatee mid aan la aqbali karin. Sida ku cad cadaymaha culimada Islaamka ka soo saareen daafaha dunida kadib falalkii argagixisadii 9/11, 3/11, 7/7 iyo taariikho kale: "Shakhsi kasta ama koox kasta oo sheegata falalka argagixsada sharciyaystana waxay ku dhaceen khalad weyn."

Anaga oo meteleyna Soomaalida Ameerika, xaqiiqadii Soomaalida adduunka oo dhan, waxaan ballan qaadeynaa in aan la dagaalano Argagxisada noocey doontoba  ha ahaatee meel kasta ha joogtee.  Waxaan garab taaganahay dadka New York, Madrid, Jerusalem, Sharma-al-Sheikh, London, Baghdad, Nairobi, Darussalam, Bali iyo meelo kale oo dadkooda ay dhibaato ka soo gaartey argagxisada. Waxaan u sheegeynaa idinka, adduunka, jaaliyadaha adduunka oo dhan, hay'adaha sharci dhawrida ee Minnesota, Maraykanka iyo dhammaan dalalka la dagaalamaya argagixisada in aad garabkiina naga heleysaan oo aan idin taageereyno, oo wada shaqayneyno si loo joojiyo argagxisada."

---

Xaawo Cali Kamaaludiin oo ka hadleysa madasha

Xaawo Kamaaludiin markii ay dhambaalkaas dhamaysay waxa ay tiri: Waxaa jirta warqad mar dhow la ii dhiibey, qoraalkaas oo ay goobta ka akhriday (inkasta oo aanaan helin nuqulkiisii) hadana nuxurkiisu waxa uu ahaa: qoraal Agoosto 16, 2005 ka soo baxay DFKMG , qoraalkaas oo matalaya Madaxweynaha DFKMG ee Soomaaliya, C/Laahi Yuusuf Axmed, waxaana qoraalkaas lagu cambaareeyey argagxisada, taas oo ay DFKMG sheegtay in ay caalamka ku taageereyso la dagaalanka argagxisada.

Xiriiriyaha ShirkaMaxamed Abuubakar, Wardheere iyo Senator Coleman iyo sawir qaade...

Xaawo Kamaaludiin intaas kuma joogsan'e, inta ay jalleecday Senator Coleman ayey waxa ay tiri: intaas waxay ahayd qoraaladii la ii dheebey, laakiin hadda waxaan akhrinayaa qoraal ii gaar ah, waxa ay durbadiiba Seretoorka xusuusisay mar sii horeysey oo koox dumar Soomaaliyeed ay fariisteen xafiiskiisa ilaa uu la kulmo, dumarkaas oo taageero u raadinayey DFKMG, kaddib waxay tiri: Su'aal ayaan ku weydiinayaa, (qof Soomaali ah ayaa dhegta kala faqay oo yiri Xaawooy Sentorka su'aasha ha weydiin, waxay markiiba magarafoonka cod dheer kaga tiri 'wuxuu i leeyahay ha weydiin laakiin waan ku weydiinayaa) su'aashaas oo ah: "Maxaa maamulka hadda ee Maraykanku uu u caawin waayey Dawlada Soomaaliya." Hadalkaas oo dadkii madasha fadhiyey ay u istageen ayagoo ku tilmaamay kelmedo aad u xoog badan, xambarsana dhambaal muhiim ah.

Senator Coleman ayaa magarafoonka inta uu kusoo laabtay waxa uu yiri: "Waxaan idiinla hadlaayaa si daacad ah, kuwani waa qoyskaygii reer Minnesota asagoo ku jeeda Soomaalida, codkaygu waa codkiina." Waxana  uu intaas ku daray: "Sida uu Sheikhu sheegay waxaa jira wax gacmaha wax looga qaban karo, anigu gacanta wax kagama qaban karo arintaas laakiin codkayga ayaan wax kaga qaban karaa."

Ugu dambayntii si shirka looxiro waxaa lagu soo dhoweeyey Madaxweynaha Jaamacada oo mahadnaq ka dib shirka sidaas ku xirtay.

Marka dib loo jaleeco qaabkii uu shirku u dhacay waxaad arkeysey markii la garey salaadii casar oo xilligaan xagaaga ku beegan (5:20pm) in dadku ay tartiib-tartiib ugu baxayaan si ay u soo tukadaan maadaama aan shirkii loo joojin Salaada, taas oo ka duwanayd waraaqaha ajandaha shirka eela qaybiyey oo ay ku qornay in ay jiri doonto biririf inta u dhexeysa 5:10-5:30pm, dadkii dejiyey ajandahana waxaa cad in ay maanka ku hayeen salaada, laakiin markii dambe la isweydiiyey sababta ay ajandaha u raaci waayeen. Xagga kale bilowga shirku wuxuu ku bilowday waqtigii loogu talo galay taas oo ka duwan habkii shirarka Soomaalida looga bartay ee ahaa in ay watiga lagu ballamo in shir la bilaabo ay ka daahaan.

Xagga kale Faysal oo kamid ahaa kasoo qayb galayaashii shirka ayaa tibaaxay in uu aad ugu bogey hadalkii ay Xaawo Kamaaludiin u jeedisey Senetoorka.

Xagga warbaahinta waxaa shirka ka soo qayb galay warbaahin maxalli ah iyo kuwo caalami ah oo u badnaa Telefishano. TV-yada Soomaalida Minnesota ee ka soo qayb galay waxaa kamid ahaa SomaliSHow TV oo laga daawada Minneapolis. Zakariye Aaden oo ah weriye katirsan SomaliShow TV ayaa sheegay in uu TV-gaasi leeyahay daawadayaasha ugu badan Soomaalida.

Minnesota waxaa ku dhaqan Soomaalida ugu badan ee deggan Maraykanka, waana bulsho shaqaysta, ku leh ganacsiyo, meelo wax barasho , iskuulo ay Soomaalidu fureen iwm.

Ugu dambeyn waxaan ka cudurdaaranaynaa haddii ay jiraan qof am ahadal aan ka tagnay intii aan salaada casar ku maqnayn.

Sidaas ayuu ku dhamaaday shirkii ay soo qaban qaabiyeen "Council of Somali Unity" oo uu madaxda ka yahay Maxamed Abuubakar Xaaji Xuseen, waxaana idiin soo tebiyey bahda SomaliTalk.com oo shirka joogey.

Daabacadii SomaliTalk.com.