Barnaamijkii Radio Xoriyo

16 August. 2005 

• Dagaallo ciidammada gumaysiga lagu naafeeyay. 

• Guddoomiye ku xigeenka JWXO oo dhambaal hanbalyo ah u diray dadwaynaha ree Ogadenya.

• Xaflado lagu maamuusay sannadguurada JWXO oo meelo kala duwan ka dhacay. 

• Qunsul Itoobiyaan ah oo Maraykanka magangelyo ka codsaday.

• Iyo Barnaamij ka hadlaya taariikh halganeedka Soomaalida Ogaadeenya.

======================

 Ciidammada gumaysiga Itoobiya ayaa sidii caadada ahayd lagu naafeeyay dagaallo dhawr ah oo toddobaadyadii ugu denbeeyay dhex maray iyaga iyo ciidammada xoreynta Ogaadeenya. Dagaalladaasi waxay u dheceen sidatan: 

11/07/05 dagaal ka dhacay Qayla-Dhoorrey, oo ka tirsan gobolka Shabeelle,ayaa waxaa ciidammada gumaysiga Itoobiya lagaga dilay 6 askari, waxaa kaloo lagaga dhaawacay 10  kale. Ciidammada cadowgu markii loo gaystay khasaarahaa iskugu jira dilka iyo dhaawaca ayaa waxay ku gadoodeen dadwaynihii nawaaxigaas degganaa, waxayna halkaas ku dileen 2 wiil oo ahaa arday dugsi quraan . 

23/07/05 Fool-jeex, oo ka tirsan gobolka Qorraxey,ayaa ciidammada cadowga itoobiya lagaga gubay hal baabuur, oo isaga iyo wixii saarnaaba ay halkaas ku bas-beeleen.

 

24/07/05 dagaal ciidammada xoreynta Ogaadeenya iyo kuwa cadowga Itoobiya ku dhex maray Wayla-lagu-xidh ayaa ciidammada cadowga itoobiya  lagaga dilay 7 askari,halka 5 kalana dhaawacyo loo gaystay.

 

Duleedka magaalada Fiiq  ayaa 30/07/05 waxaa ciidamada cadowga itoobiya lagaga gubay hal baabuur, oo wixii saarnaa oo dhan ay ku dhinteen. Waxaa kaloo tacshiirad la huwiyay baabuur kale, oo isagana 4 askari lagu dilay, 4 kalana lagu dhaawacay. 

Jabhadda Waddaniga Xoreynta Ogaadeenya ayaa waxay gacanta ku haysaa maamulka degmooyin badan oo dalka Ogaadeenya ka mid ah, waxayna degmooyinka qaarkood dadwaynaha u qaybisay raashiin gargaar ahaa oo iska yaallay xarumaha ciidamada gumaysiga itoobiya, kaasoo markiisii hore loogu talagalay dadka abaaraha ku tabaaloobay. 

Dhinaca kale ciidammada gumaysiga ayaa isku dhabar-jabinaya inay doorasho ku sheegta u meel-mariyaan sida ay doonayaan, waxayna billaabeen inay waraaqaha doorashada xeryohooda geeyaan oo halkaas ku soo buux-buuxiyaan.  

Guddoomiye ku xigeenka JWXO oo dhambaal hanbalyo ah u diray dadwaynaha ree Ogadenya. 

Guddoomiye ku xigeenka Jabhadda Waddaniga Xoreynta Ogaadeenya C/qaadir Xasan Hirmooge ayaa dhambaal hanbalyo ah u diray ciidammada xoreynta Ogaadeenya, xubnaha JWXO iyo dhammaaba dadwaynaha Soomaalida Ogaadeenya, isagoo ugu hanbalyeeyay sannadguurada 21aad ee ka soo wareegtay asaaskii Jabhadda Waddaniga Xoreynta Ogaadeenya.

Guddoomiye ku xigeenku wuxuu dhambaalkiisa ku yidhi; Waxaan idiinku Hambalyaynayaa munaasabadda Sannadguurada 21aad ee ka soo wareegtay aasaaskii Jabhadda Waddaniga Xoreynta Ogaadeniya “J.W.X.O”. Mudadaas ma aha waqti yar ama gaaban, fogaanta aan soo jarayna ma aha mid gaaban kolkii la jaleeeco meeshii aan hayaanka ka soo qaadnay iyo jiirihii dhaadheeraa ee aan soo marnay. Marka la milicsado guulaha siyaasadeed, ciidan, urureed iyo tan bulsheed ee shacbiga Ogaadenya uu gaadhay , waxaa dareenka iyo laabta hoose looga jixin inaan sugnay: 

1.   Jiritaankeenii ummadeed oo sugay haybta (Identity-ga) dadkeena, dalkeena & tariikhdeena. 

2.    Joogtaynta halganka  iyo ku dhaganaanshaha ujeedada halganka. 

3.    Ku dhaganaanshaha mabaadi’da waddaninimo iyo hirgalinta hal-ku-dhigii halganka ee ahaa  “Midnimo-Mintid-Iskutashi-Guul” ayaa noqday fikirka waddaniga ee aan meela laga soo xigan ee saldhig u noqday kacdoonka dadweynaha Ogaadenya guulo lagu kalsoon yahayna laga gaadhay, midhaheedana maanta aan wada dareemayno. 

4.   Halgan shacbi ah ayaa mabaadi’da JWXO saldhig u ahaa, kaasoo maanta u hirgalay oo towradani tahay mid shacbigani iska leeyahay, matoorka wadana uu ka yimid shacbigan, shidaalka uu ku socdana uu yahay dhiigga N/Huraha iyo dadaalka xubnaha oo ka yimid shacbigan. 

5.   Kobtii aan ka soo ruqaansanay waynu xusuusanahay, meeja aan marayana waa la arakaa, mabda,a aan ujeednana eegga soo ma muuqato, annagoo rajeyn ama sida badana la qabo inaan soo jaray jidka hayaanka gobanimada intiisii badnayd, lana odhan karo guushu wey inoo muuqaata wax inaga leexin karana ma jiro.  

 Waxaa Alle markale aan ka rajeyn inaan bishan bisheeda kale ku gaaadhno, guulo joogto ah iyo Xornimo aan ku damaashaadno ciidda qaaliga ah ee Ogaadeniy a.  

Xaflado lagu maamuusay sannadguurada JWXO oo meelo kala duwan ka dhacay. 

Shalay oo taariikhdu ahayd 15 Agoosto 2005, ayaa waxay ku beegnayd sannadguuradii 21aad ee ka soo wareegtay asaaskii Jabhadda Waddaniga Xoreynta Ogaadeenya. Munaasabaddaas ayaa waxaa lagu maamuusay xaflado lagu qabtay meelo kala duwan oo dunida ka mid ah.  

Meelaha sida wayn munaasabaddan looga maamuusay waxaa ka mid ah magaalada Muqdiso ee dalka Soomaaliya, halkaasoo xaflad wayn oo sannadguurada JWXO lagu maamuusayo lagu qabtay huteel wayn oo ku yaalla magaalada Muqdisho. 

Munaasabaddan ayaa lagu soo bandhigay khudbado ka xogwarramaya taariikhda JWXO iyo soo yaalka taariikheed ee halganka Soomaalida Ogaadeenya. Waxaa kaloo lagu soo bandhigay suugaan kala duwan oo ka hadlaysa halganka Ogaadeenya.

Xafladdaas waxaa ka soo qayb galay marti-sharaf aad u fara badan, oo ay ugu horreeyaan xubnaha JWXO ee nawaxigaas ku sugan, iyo qaar ka mid ah siyaasiyiin soomaaliyeed, waxaa sidoo kale si wayn uga soo qayb gashay saxaafadda soomaaliyeed. 

Xaflado noocan oo kale ah oo iyagana lagu maamuusayo sannadguurada Jabhadda ayaa ka dhacay meelo kale oo dalka Soomaaliya ka mid ah. Meelahaas ayaa waxaa ka mid ah magaalada Mareerey oo lagu qabtay xaflad ay dadwayne aad u badan ka soo qayb galeen. 

Xafladahan oo kale ayaa lagu kala qabtay dalal ku yaala  Bariga Afrika, sida dalka Kenya oo lagu qabtay xaflad aad u balaadhan.xafladdaas ayaa waxaa lagu soo bandhigay riwaayad cusub oo uu allifay abwaanka caanka ah ee Hellaale, taasoo lagu magacaabo Adkeyntii Halgankeena iyo Is-raacii Ummadeena, oo ka warramaysa taariikhda halgankeena, laga soo billaabo 1964 ilaa iyo hadda oo JWXO hooggaanka u hayso. 

Dalal badan oo Maraykanka, Yurub iyo Carabta ah ayaa maalmaha soo socda lagu qaban doonaa xaflado lagu maamuusayo sannadguurada 21aad ee ka soo wareegtay asaaskii Jabhadda Waddaniga Xoreynta Ogaadeenya. 

Qunsul Itoobiyaan ah oo Maraykanka magangelyo ka codsaday. 

Madixii qaybta Qunsuliyada ee safaarada Itoobiya u joogta dalka Beljam ayaa toddobaadkii hore magangalyo siyaasadeed ka codsaday dalka Mareykanka, ka dib markii uu soo baxsaday oo si qarsoodi ah uga soo dhuuntay shaqadii uu xukuumadda Itoobiya u hayay. Qunsulkan oo lagu magacaabo Workiye Birye wuxuu si dhuumasho ah u rartay reerkiisii, ka dibna wuxuu iska dhiibay dalka Maraykanka. 

Qunsulkan ayaa wararku sheegayaan inuu wixii hadda ka denbeeya la shaqayn doono mid kamid ah xisbiyada mucaaradka ku ah xukuumadda Zenawi.

Masuuliyiin badan oo ka mid ah xukuumadda keligii taliye Meles Zenawi ayaa dalalka dibadaha ah iska dhiiba markii hawl loo diro. Waxaa kaloo aad u goosta saraakiisha sarsare ee ciidammada Itoobiya, gaar ahaan duuliyayaasha ciidammada oo naftooda ula baxsada dalal Itoobiya ka baxsan.

Radio Xoriyo

16 August. 2005

C/nuur Sh. Mohamed

radioxoriyo@ogaden.com
raadioxoriyo@yahoo.com

Radio Xoriyo waxaad ka dhegaysan kartaa Mawjadda 19 MB ee dhererkeedu yahay 15670 KHZ, Maalmaha Talaadada iyo Jimcaha 7: 30PM waqtiga Afrikada Bari

Afeef: Aragtida qoraalkan waxaa leh qoraaga ku saxiixan....