Maxamed
Qanyare Afrax Waa Masiibo Na Loo Soo Diray
Maxamed Qanyare Afrax oo magaciisa runta ahi uu
yahay Daahir Qanyare Afrax. Magaciisa markii ugu horreysay waxaa
la maqlay markii loo qoray dable ka tirsan
ciidanka policeka Soomaaliya isagoo ku sugan
Ceelbuur. Habka uu ku shaqeeyo ciidanka policeka
Soomaaliya wuxuu ahaan jiray habka ay maanta ku
shaqeeyaan policeka Mareykanka oo dhigaya in
marka deegaan tuugo ku badan tahay laga qorayo
police laga qoro tuugada laftirkooda. Habkaas
waxaa policeka Soomaaliya u dejiyey Professor
Tom Farer oo ahaa ninkii tababarka siin jiray
ciidanka police-ka Soomaaliya. Mr Farrer wuxuu
maanta yahay Dean, Graduate School of
International Studies, University of Denver.
Markuu waayey wax dallacaad ah ayaa xaaskiisii
oo ahayd reer Waqooyi Bari waxay u tagtay
Taliyihii ciidanka Policeka Soomaaliya Maxamed
Abshir, waxayna ka codsatay in la dallacsiiyo
seygeeda, hase yeeshee Maxamed Abshir oo ahaa
nin uu qabiilku madax maray wuu ku gacan sayray
codsigaa. Kadib waxaa dhashay kacaankii
milatariga ahaa, waxaa Qanyare la geeyey qaybta
lacag bixinta policeka. Markuu sanado kooban
howshaa hayey ayuu u fakaday dhinaca Kenya
isagoo la baxsaday mushaarkii ciidanka policeka
oo gaarayey 30 kun oo shillin Soomaali ah. Waxaa
yaab leh in Maxamed Qanyare uu aaminsan yahay
inuu halganka bilaabay maalintii uu la fakaday
mushaarka ciidanka policeka uuna isu haysto inuu
yahay halgamaa soo halgamay.
Wixii xiligaa ka dambeeyey wuxuu ku noolaa
Kenya, wuxuu halkaas howl ganacsi kala bilaabay
walaalkii oo lahaa gaadiid ka shaqeeya East
Africa, kadib Qanyare wuxuu ku biiray jabhadii
SNM, kadibna wuxuu ku biiray USC oo uu ku jiray
gudigeedii dhaqaalaha. Maxamed Siyaad markii
dalka laga saaray Qanyare waxaa lagu abaal
mariyey Wasiirka Arimaha Gudaha oo uu ka noqday
dowladii Cali Mahdi, dadkii akhbaaraadka
Soomaaliya la socday waxay xusuusan yihiin
hadaladii uu kaga hadli jiray warbaahinta ee uu ku caayi
jiray Caydiid, isagoo u hadli jiray qaabkii uu
Ciraaq uga hadli jiray Maxamed Saciid Saxaf.
Caydiid |
Cali Mahdi |
Qanyare oo ka faa'iideysanaya xukunkii isku
dilka ahaa ee Cali gar leh, Caydiidna gar leh
wuxuu sii huriyey dagaalkii ka dhex qarxay Cali
iyo Caydiid, kadib wuxuu u soo wareegay Caydiid,
wuxuuna la dhisay SALBALAAR, markii la dhiseyna
wuxuu ku qalqaaliyey inuu qabsado Baydhabo,
waxaa la xusuusan yahay inuu idaacadaha iyo
jaraa'idka ka caayi jiray Cali Mahdi, Caydiid oo
dhaawac ah ayaa Aadan Nuux Dhuule wuxuu
weydiiyey ma run baa in Caydiid dhaawac yahay,
wuxuu ku jawaabay Qanyare hada ayaan ka imid,
xabad kuma ool mase ogi inow qarsaayo, markuu
sidaas leeyahay Caydiid saacad ka hor ayuu
dhintay.
Kadib dagaalkii Baydhabo looga soo saaray Xuseen
Caydiid wuxuu Qanyare ciidamo ku xareystay
Xerada Dayniile, isagoo meeshiisa jooga ayay
dhalatay dowladii Carte. Waxaan ku jiray
aqoonyahano Hawiye ah oo sanadkii 2000 Maxamed
Qanyare kula shirtay deegaanka Dayniile, waxaana
ahayn rag isu xilsaaray in raga hubeysan ee
Xamar jooga ay dowladii C/qaasim taageeraan,
waxaan kula talinay Qanyare inuu aqbalo codsi uu
waagaa soo jeediyey Imaamka Hiraab Imaam
Maxamuud Imaam Cumar oo ahaa inay aqbalaan wada
hadal ay la furaan dowlada, Qanyare wuxuu noogu
jawaabay MA AQOONSANI IMAAM HIRAAB IYO WAX LA
YIRAAHDO HIRAAB.
C/Qaasim Salad |
Cali Galayr |
Xasan Abshir |
Markii dambe Cali Khaliif Galeyr ayaa ku
qanciyey inuu lacag qaato, kadibna taageero
dowlada, sidii buuna ku taageeray, markii la
riday Galeyr oo ahaa ninkii siiyey Qanyare
lacagta uu ku dhisay garoonka Dayniile wuxuu
Qanyare la soo shir istaagay dowlada cusub ee uu
Ra'iisal Wasaaraha ka yahay Xasan Abshir ka qayb
geli maayo oo sidii tii Galayr ayaan rabaa inay
heshiis cusub ila gasho.
Qanyare wuxuu caadeystay af xumo iyo hadalo
jaa'ifo ah oo uu u geysto hogaamiyeyaasha Hawiye,
wuxuu go'aan ku gaaray in nin aan isaga ahayn
aan wax laga weydiin arimaha Jifadiisa,
wuxuu dagaal siyaasadeed ku qaaday Cusmaan Falko,
Diinaari, Xasan Pilte, Xasan Muudey, Xaashi
Dhabarey, iyo ganacsade Maxamed Maxamuud. Maxamed Qanyare wuxuu yiraahdaa dad baan metelaa,
waa nin cid uu wakiil ka yahay aysan jirin oo
dantiisa wakiil ka ah, waa nin ku saleysan waxa
maanta taagan oo keliya oo aan shalay iyo beri
aqoon, waa nin aan garanayn wuxuu ku hadlayo iyo
waxa uu ka hadlayo labadaba.
Cabdisalaam Hereri ayaa runta u sheegay oo ku
yiri warka aad ku hadlayso ma garanaysaa xajmiga
uu leeyahay, kolkaasuu yiri nin wuxuu ku hadlayo
yaqaana waan ahay, Qanyare wuxuu shir Hawiye
yeeshay ka yiri HAWIYOW CAQLIGEYGA ANIGU WAA
HUNGURIGEYGA, shirkaas Hawiyihii joogay waa ku
kala dareereen, mid mid sii macsalaameeya waa la
waayey.
Wiilashiisa mid wuxuu maamulaa gawaarida iyo
tiknikada iyo garoonka, midna
wuxuu maamulaa ciidanka iyo dhaqaalaha, waxay mashquul ku yihiin dhibaateynta
umada danyarta ah ee Soomaaliyeed ee dhibku
dusha ka saaran yahay, waxaa wiilashiisa Xamar
looga yaqaanaa UDAY iyo QUSAY oo ah labadii wiil
ee Saadaam Xuseen, hadaba ma mari doonaan ayaga oo maxkamad hor
taagan.
C/Lahi Yusuf |
Cali Geedi |
Waxaa yaab
lahayd doorashadii ka dhacday Kenya ka hor inuu
u ololeynayey C/laahi Yuusuf oo uu lahaa ha la
doorto isagaa noogu weyn si uu u helo Prime
Minister, Soomaaliya oo Qanyare ka yahay Prime
Minister waa Soomaaliya uu Ilaahay la doonay
halaag, ummad Qanyare hormuud u yahay waa ummad
go'day, wuxuu maalmahaan dambe caadeystay inuu
aflagaado toos ah u geysto Professor Cali
Maxamed Geedi oo ah hoggaamiye role model oo
doonaya inuu naga badbaadiyo raga 15ka sano
ummadda ka hor wareegi waayey ee diiday in loo
taliyo iyo inay tashadaan ama booska u baneeyaan
dadkii bedeli lahaa.
Arbacadii markii laga wareystay BBC wuxuu ku
hadlaayey qof walba oo dhegeysatay ayaa la
fajacay, wuxuu diiday xubinnimadiisii lagu daray
guddiga uu magacaabay Prof Geedi, wuxuu ogyahay
inuu ku qasban yahay inuu aqbalo arintaa
sababtoo ah sharciga meelna ugama qorna wasiir
diidaya shaqo uu u diray wasiirka koowaad,
Qanyare sharciga uu ku andacoonayo ee uu
leeyahay waan ku dheganahay xagee kaga qoran
tahay inuu khilaafo Ra'iisal Wasaarihii isaga
magacaabay ee uu hoos tagayey.
Sh. Xasan |
Qanyare wuxuu sharafta ka qaaday Shariif Xasan
oo isu haysta inuusan noqdeen Gudoomiyaha
Baarlamaanka hadii Qanyare uusan olole u sameyn lahayn, Shariifku ilaa iyo hada wuxuu
weli aaminsan yahay inuusan Baarlamaan
hogaamiyeen Qanyare la'aantiis, waa nin aaminsan
inuu metelo Qanyare ee uusan metelin dadweynaha,
Soomaaliya dad dano leh horey ayay ugu soo
daashay, maanta waa maalintii Hawiye gacan
fiican siin lahaa Geedi, waa hubanti haduu
maanta helo taageerada Hawiye inuu 2009 isagu
noqon doono Madaxweynaha dalka.
Cisman Caato |
Muse Yalaxow |
Ra'iisal Wasaaraha waxaan u soo jeedin lahaa si
loo go'doomiyo ninkaan oo meesha uu mudan yahay
loo qotomiyo inuu sii dardar geliyo wada hadalka
uu kula jiro Cusmaan Caato iyo Muuse Suudi, waa
inuu xoogiisa isugu geeyaa siduu labadaa nin u
kasban lahaa siduu u kasbaday Cumar Finish,
Furux iyo Bootaan Ciise Caalin oo kale, Ra'iisal
Wasaaraha maadaama uu ogyahay in Qanyare wuxuu
doonayo ay tahay kursiga uu ku fadhiyo waa inuu
dhaqdhaqaaq sameeyaa oo uu qaadaa tallaabooyinka
sharcigu u ogol yahay sida xil ka qaadis ama xil
k axayuubin.
 |
 |
Jasiirada Carabta ayaa xili hore nin dadka
xukumi jiray wuxuu laayey dadkoo dhan, markii
dambe ayuu seefta wuxuu ku keenay nin, markaas
ayuu yiri ma i taqaanaa ninkaan ahay, suu yiri
haa si fiican baan kuu aqaanaa oo waxaa tahay
camalkayagii oo laga dhigay ibni aadam, C/laahi
Yuusuf wax walbuu yahay Qanyare ayaa codkiisa
siiyey, waana camalkeenii hadaan Soomaali nahay
oo laga dhigay ibni aadam, Qanyarena waa masiibo
na loo soo diray.
Axmed N. Maxamed
ahmednur11@yahoo.co.uk
Afeef: Aragtida
qoraalkan waxaa leh qoraaga ku saxiixan
Daabaco
Boggan | Print
