Barnaamijkii Radio Xoriyo

05August 2005

• Sharikad Norway ah oo ka noqotay abaalgud ay Zenawi siisay.
• Wafti beesha caalamka ka socda oo booqday magaalada Jawhar.
• Qaramada Midoobey oo Suudaan ka caawinaysa baadhista dhimashadii John Grang.
• Iyo waraysi aan la yeelanay C/raxmaan Sh Amhdi oo ka mid ah asaasayaashii JWXO.

======================

Sharikad Norway ah oo ka noqotay abaalgud ay Zenawi siisay

Sharikad laga leeyahay dalka Norway oo lagu magacaabo Yara Foundation ayaa ka baaraan-degaysa inay ka noqoto abaalgud ay siisay keligii taliye Meles Zenawi, kaasoo ay sheegtay inay ku abaalmarisay doorka uu ka qaatay la dagaallanka gaajada.

 Sharikadu waxay go'aansatay inay dib uga fiirsato go'aankii ay abaalgudka ku siinaysay keligii taliye Meles Zenawi, ka dib markii si wayn looga cadhooday go'aankeeda, isla markaana ay u muuqatay in Meles Zenawi uu yahay keligii taliye qori caaraddii ku xukuma dalka Itoobiya,waxayna shirkadu sabab uga dhigtay kala noqoshada abaalgudkaas inuusan Males Zanawi ka soo bixin ballanqaadkiisii ahaa inuu ka shaqaynayo horumarinta dalkiisa.

Xubin sare oo ka tirsan guddiga fulinta ee sharikada ugu caalamisan dalka Norway ee Yara International ASA, oo magaciisa qariyay, ayaa qiray in sharikaddu ay ka xun tahay sida wax u dheceen. Waxaa dhacay khalad la xidhiidha sida loo xulay qofka abaalgudka ku guulaystay, waxaana arrin laga yaxyaxo ah in abaalgud la siiyo qof dadkiisa ku haya dil iyo jidhdil, taasoo aan marnaba ka turjumi karin ujeeddadii abaalgudkan loo sameeyay, sidaas waxaa yidhi xubinkan ka tirsan guddiga fulinta ee sharikadda Yara International ASA.

Wuxuu kaloo intaas ku daray "waxaan fahmi karaa in koox Zenawi u ololaynaysa ay ku guulaysatay inay saamayn ku yeelato guddiga soo xulayay qofka abaalgudka la siinayo". Wuxuuna sheegay in arrintaasi aysan dib denbe u dhici doonin, isla markaana keligood taliyayaasha laga reebi doono inay abaalgud noocan ah helaan. Hase yeeshee wuxuu xubinkani diiday eedda sharikaddan loo soo jeediyay ee ah inay abaalgudkan siiso madaxda musuqmaasuqa ku caan-baxay ee Afrika, si ay uga saxiixato heshiisyo qiimohoodu malaayiin doollar gaadhayaan.

Wafti beesha caalamka ka socda oo booqday magaalada Jawhar

Aroornimadii khamiista ahayd ayaa waxaa magaalada Jawhar booqasho ku tegay wafti ballaadhan oo ka socda beesha caalamka, kaasoo uu horkacayo ergaygii arrimaha Soomaaliya u qaabislanaa dalka Kenya Bathuel Kiplagat.

Waftigan oo ka kala socday Jaamacadda Carabta, Midowga Yurub, Midowga Afrika, Bankiga Adduunka iyo xubno ka socda Beesha caalamku, waxay ku degeen xarunta ururka UNICEF, ka dibna waxay kulan albaabdu u xidhan yihiin la yeesheen xildhibaannada iyo wasiirrada dawlada ku meelgaadhka ah ee ku sugan magaalada Jawhar. Wuxuu kaloo waftigani la kulmay madaxwaynaha iyo ra'iisal wasaaraha dawlada ku meelgaadhka ah ee soomaaliya.

Billowgii toddobaadkan waxaa sidoo kale magaalada Jawhar  yimid wafti uu horkacayay Francois Fall oo ah  ergayga arrimaha Soomaaliya u qaabilsan xoghayaha Qarammada Midoobay,wuxuuna ergaygaasi halkaas kula kulmay masuuliyiinta dawalada ku meelgaadhka ah, isagoo kala hadlay arrimo ku saabsan sidii loo wadahadalsiin lahaa labada dhinac ee dawlada ku meelgaadhka ahi u kala qaybsan tahay.

Waftigan ayaa sidoo kale arbacadii la kulmay wasiirrada iyo xildhibaannada dawladda ku meelgaadhka ah ee ku sugan magaalada Muqdisho, kuwaasoo lagala xaajooday sida loo heshiisiin karo labada dhinac ee dawlada ku meelgaadhka ah.

Afhayeen u hadlay kooxda Muqdisho ee dawlada ku meelgaadhka ah ayaa sheegay inay waftiga u sheegeen inay diyaar u yihiin wadahadal ay la galaan garabka kale ee dawlada ku meelgaadhka ah. Waxaan u sheegnay waftiga in dawlada ku meelgaadhka ahi u qaybsan tahay garab ku sugan Muqdisho iyo garab ku sugan Jawhar, waxaan kaloo u sheegnay in marka hore loo baahan yahay in loo hoggaansamo dastuurka, taasoo qayb ka qaadan karta xal u helidda khilaafka jira, sidaas waxaa yidhi ra’isul wasaare ku xigeenka dawlada ku meelgaadhka ah Maxamuud Jaamac C/llaahi (Sifir) oo ka tirsan kooxda Muqdisho.

Qaramada Midoobey oo Suudaan ka caawinaysa baadhista dhimashadii John Grang

 Qaramada Midoobey ayaa dalka Suudaan u soo bandhigtay inay ka caawiso baadhista lagu samaynayo diyaaraddii la dhacday madaxwayne ku xigeenkii hore ee dalka Suudaan  Dr.John Grang, sidaas waxaa arbacadii ka sheegay magaalada Nayroobi afhayeen Qaramada Midoobey u hadlay.

Ururka uu hooggaamin jiray John Grang SPLA ayaa codsaday in baadhis caalami ah lagu sameeyo sababtii keentay dhicitaanka diyaaraddii ay ku dhinteen John Grang iyo 13 qof oo kale oo la socday. Qaar badan oo ka mid ah dadwaynaha koonfurta Suudaan ayaan garawsanin wararka rasmiga ah ee shaagaya in dhicitaanka diyaaraddii John Grang uu sabab u ahaa jawiga oo aad u xumaa.

Dhimashada John Grang ayaa laga cabsi qabaa inay dalka Suudaan mar kale dib ugu celiso dagaalladii sokeeye ee muddada dheer ka soconayay, kuwaasoo la filayay inay ku soo afjarmaan heshiiskii nabadeed ee dhex maray dawlada iyo ururka reer koonfureedka ah ee SPLA. Tan iyo markii daboolka laga qaaday in John Grang dhintay waxaa magaalada Khartuum ee dalka Suudaan ka soconayay isuku dhacyo u dhexeeyaa reer koonfureedka iyo reer waqooyiga Suudaan, waxaana qulquladahaas ilaa iyo hadda ku dhintay in ka badan 100 qof.

Booskii John Grang ayaa lagu beddalay ku xigeenkiisii Salva Kiir, oo noqday madaxwayne ku xigeenka Suudaan iyo madaxwaynaha dawlad goboleedka koonfurta Suudaan. Salva Kiir ayaa taageerayaashiisa ugu baaqay inay rabshadaha joojiyaan, wuxuuna ku adkaystay in heshiiskii nabadda sidiisa loo fulin doono.

 Radio Xoriyo

05 August 2005

C/nuur Sh. Mohamed

radioxoriyo@ogaden.com 
raadioxoriyo@yahoo.com

Radio Xoriyo waxaad ka dhegaysan kartaa Mawjadda 19 MB ee dhererkeedu yahay 15670 KHZ, Maalmaha Talaadada iyo Jimcaha 7: 30PM waqtiga Afrikada Bari

Afeef: Aragtida qoraalkan waxaa leh qoraaga ku saxiixan