::: SomaliTalk.com :::

Boqor Fahad Bin Cabdul Casiis oo Geeriyoodey...
Boqor Abdullah oo Loo Caleema Saaray Boqortooyada Sucuudiga
Madaxweyne Kuxigeenkii Suudaan, John Garang, oo Geeriyoodey...

Boqor Fahad Bin Cabdul Casiis oo Geeriyoodey:::

Agoosto 1, 2005

Wararka ka imanaya Sucuudiga ayaa tibaaxay in Boqor Fahad uu geeriyoodey.

Barnaamijyadii Tefelishanka qaranka ka socdey ayaa la joojiyey, waxaana lagu bedeley aaayadaha Quraanka. Dublamaasiyiinta Sucuudiga ku sugana waxay durbadiiba cadeeyeen in Boqor Fahd bin Abdul Aziz Al-Saud uu geeriyoodey. Wax yar ka dib si rasmi ah ayaa loogu dhawaaqay boqor Fahad uu Geeriyoodey.

Boqor Fahad waxa uu sannadkii 1923 ku dhashay magaalaad Riyaad (Taariikh-yahanada qaarkood waxay yiraahdaan waxa uu dhashay sanandkii 1921), waxana uu ahaa wiilkii toddobaad ee u dhashay boqor Abdul Aziz.

Sannadkii 1995 oo xanuun degdeg ah oo maskaxda ah uu ku dhacay wixii ka dambeeyey awood uma lahayn in uu waddanka hogaamiyo, waxana si kumeel gaar ah ilaa waqtigaas dalka u hogaaminayey walaalkiis Cadullahi.

Boqor Fahad oo sagaal jir ah, sanandkii 1932, ayaa aabihiis Abdulaziz bin Abdulrahman Al-Saud asaasay boqor tooyada Sucuudiga.

Waxa uu wax ku bartay dugsigii ugu horeeye ee lo dhiso boqortooyada (ee Ibn Saud).

Sannadkii 1953 asagoo 30-jir ah ayaa waxaa loo magcaabay wasiirka waxbarashada Sucuudiga.

March 25, 1975, markii la diley Boqor Faisal oo uu diley wiil uu adeer u ahaa, ayaa boqor tooyada waxa qabtay Boqor Khalid. Markaas ayuu Boqor Fahad noqday ninka ku xiga ee leh dhaxal tooyada.

June 13, 1982 markii u udhintay Boqor Khalid ayaa la caleema saaray Boqor Fahad, sidaas oo uu ku noqday Boqorka Sucuudiga ilaa uu xanuunsadayna uu asago talada dalka Sucuudiga toos u hayey.

Sannadkii 1986 waxa uu Boqor Fahad qaatay cinwaanka "Khaadimka Xarameenka Shariifka ah - Maka iyo Madiina".

29 November 1995 ayaa waxaa Boqor Fahad ku dhacay xanuun kadis ah oo maskaxda kaga dhacay kaas oo jirka qaybtiis hawl gab ka dhigay.

Isniin Agoosto 1, 2005 ayuu geeriyoodey Boqor Fahad asagoo da'diisu ahayd 82 jir.

Waxaa isla maanta (Agoosto 1, 2005) Boqortooyada loo caleema saaray Boqor Abdullah oo ahaa ninka leh dhaxalka, ahaana kan dalka taladiisa hayey ilaa markii uu Fahad xanuun saday. Waxaana boqor cabudllahi dhaxalka ku sii xigi doona wasiirka difaaca, Prince Sultan.

Boqorka dhaxal-tooyada la wareegey, Abdullah bin Abdulaziz al-Saud, waxa uu ku dhashay Riyaad sanandkii 1924, waxana uu kamid yahay 37 wiil ee uu dhalay boqorkii asaasay Sucuudiga, Abdulaziz bin Abdulrahman Al-Saud.

Wax yar ka dib geeridii Boqor Fahad waxa uu xoghayaha guud ee midowga carabta, Amr Moussa, ku dhawaaqay in muddo toddobaad ah dib loo dhigay kulankii degdeg ahaa ee dalalka Carabtu ay August 3-deeda ku yeelan lahaayeen magaalada Sharm ee xeebta Badda cas ee Masar.

Sida ay werisey IslamOnline, qiimaha Saliida ceeriin (Oil) waxa uu kor ku caya 50 cents, geeridii Boqor Fahad ka dib, taas oo ay fuustadii gaartey $61.

Hoggaanka Boqortooyada Sucuudiga waxaa lagu tiriyaa dadka dunida ugu taajisan xagag lacagta. Jariidada Al-Jazeera waxay ku tilmaantay in hoggaamiyaha boqortooyada Sucuudigu uu leeyahay adduunyo gaareysa $20 billion Doolar.

Isha: Warbaahinta Sucuudiga | tarjuamdii Somalitalk.com | Aug 1, 2005

Madaxweyne Kuxigeenkii Suudaan, John Garang, oo Geeriyoodey...

John Garang, lix qof oo asaga la socdey iyo toddoba shaqaalihii diyaarada ah ayaa geeriyoodey kaddib markii ay la dhacday Helicopter ak duushay Uganda una sii jeedey Sudan.....

Khartoum, Aug. 1 -- Wararka ka imanaya dalka Suudaan ee laga helay UN-ta ayaa sheegay in madaxweyne ku xigeenkii Suudaan, John Garang, uu ku geeriyoodey shil helicopter la dhacday.

Waxaa wararku intaas ku dareen in ciidamada qalabka sida ee Suudaan iyo Ugandha la dhaqaajiyey si ay u baadi goobaan diyaarada ilaa hadda la la'yahay ee sidey madaxweyne ku xigeenka. Waxaa kale oo baadi goobka ka qayb qaadanaya ciidamada UN ee aagga ku sugan.

Wararka saakay oo Isniin ah ka soo baxay Suudaan waxay sheegayaan in aan la helin diiyaaradii sidey madaxwene ku xigeenka, warkaas oo ka duwan kii shalay galab la sheegay ee ahaa in diyaarada la helay. Sidaas waxa cadeeyey wasiirka warfaafinta Suudaan Abdel-Basit Sabdarat oo ka hadlay teelefishaanka qaranka Sudan.

John Garang waxa uu Uganda tegey Jimcadii halkaas oo uu kulan laba maalmood ah la yeeshay madaxweynaha Uganda Yowery Museveni kulankaas oo ka dhacay guriga uu ku nasto madaxweynaha Uganda ee ku yaal Mbarara oo 300 km koonfur galbeed ka xigta caasimada Kampala. (Sawirka hoose oo ay qaaday Reuters, waxa uu muujinayaa John Garang oo July 29, 2005 diyaarad helicopter ah ka raacaya garoonka Kampala ee Entebbe International Airport asagoo ku sii jeedey Mbarara oo meesha uu deggan yahay madaxweynaha Uganda)

Kaddib kulankii madaxweynaha Uganda, waxa uu madaxweyne ku xigeenka Sudaan ka ambabaxay Uganda maalimadii Sabtida asagoo raacay diyaarad nooca Helicopter ah oo laga leeyahay Uganda, xiriirkii diyaaradaasina waxa uu go'ay 6:30 p.m. (1530 GMT) hawada oo xumayd awgeed, waa sida warku u dhigaye. Wararka kale oo ay qoreen warbaahinta kenya ayaa ku waramay in diyaaradu dhacday kadib markii shidaalku ku yaraaday.

Warar saakay laga helay Sudan ayaa sheegaya in dad aagga degan ay heleen burburkii diyaaradii siday John Garang.

Warar kaas ka dambeeyey ayaa tibaaxay in telefishanka qaranka ee Sudan uu sheegay in ay geeriyoodeen John Garang, lix qof oo la socdey asaga iyo toddoba shaqaalihii diyaarada ah.

John Garang waxaa madaxweyne ku xigeenka Sudan loo dhaariyey July 9, 2005, arintaas oo ka dambeeysey heshiis la kala saxiixday bishii Janaayo ee sannadkan, kaas oo soo afjaray dagaal ahli ah oo dalkasi ka socdey muddo 21 sanadood ah, dagaalkaas oo bilowday 1983 waxaa jabhaddii SPLA ee dagaalkaas wadey madax hogaamin jirey Lt. Gen. John Garang.

John Garang wax auu madaxweyne ku xigeen ka noqday dawladda uu hogaamiyo madaxweyne Omar Hassan al-Bashir oo ay muddo dheer col ahaayeen. Waxana uu qorshuhu ahaa in Bashir iyo Garang ay dawlad wada-jir ah soo dhisaan Agoosto 9, 2005.

Shilakni markii uu dhacay waxaa markiiba kulan degdeg ah qaatay madaxweyen Bashiir iyo madaxweyne ku xigeenka labaad Ali Osman. Baarlamaanka Sudan waxa uu kulan degdeg ah qaadanayaa 9:00am ee Isniinta.

Dagaalka Sudaan ilaa waqtigii uu bilowday (1983) ilaa dhammaadkiisii (July 9, 2005) waxaa ku geeriyoodey qiyaastii in ka badan hal million oo qof.

John Garang waxa uu dhashay sannadkii 1945, waxana uu ka dhashay qabiilka dega koonfurta ee Dinka qabiilkaas oo caan ku ah caabuditaanka cirka ay caabudaan, iyo muusiqa ay ku ciyaaraan geesaha ariga iyo jacaylkooda hilibka solan.

John Garang waxa uu shahaadada sare ee cilmiga beeraha ka qaadatay jaamacad maraykan ah, waxana uu wax ka bartay Grinnell College, Iowa. Mar dambena waxa uu ku laabtay maraykanka si uu tababar militari uga soo qaato Fort Benning, oo ku taal gobolka Georgia.

Jariidad ka soo baxda Kenya oo tilmaameysey John Garang waxa ay tiri hoggaamiyaha jabhada ee haystay shahaadada ugu saraysa ee beeraaha waxa uu noloshiisa badan keeda ku qaatay duurka asagoo qorshaynayay qarxinta ceelasha saliida (Oil), mana uu ogolayn, ayey tiri jariidadu, in cidi fallaago ka noqoto, qofkii ka hor yimaadana waa la xiri jirey ama waa la toogan jirey, ayey tiri jariidada Standard.

Wararka ka imanaya Sudan ayaa sheegay in rasbashado maanta (Isniin) ka dhacay Khartuum ay sheegeen in ugu yaraan 24 qof ay ku dhinteen, waa kadib geeridii Garang.

Halkan ka akhri taariikhda Dagaalkii Sudan.... [English]

Tarjumadii SomaliTalk.com | Agoosto 1, 2005

Wafti uu Hor Kacayo Xildhibaan ka Tirsan Baarlamaanka Canada oo Booqanaya Jawhar

SomaliTalk | Toronto, Canada | July 31, 2005

Borys Wrzesnewskyj
Sawirka: Websiteka Xildhibaanka

Wararka ka imanaya dalka Canada ayaa tibaaxay in wafti uu hogaaminayo xildhibaan ka tirsan baarlamaanka Canada oo laga soo doorto Etobicoke (Toronto) oo magaciisa la yiraahdo Borys Wrzesnewskyj in uu maanta (Axad July 31, 2005) u ambabaxayo dalka Soomaaliya, socdaalkaas oo xaqiiqo raadis ah wuxuu qaadan doonaa saddex maalmood.

Xildhibaanku waxa uu magaalada Jawhar kula kulmi doonaa madax sare oo ka tirsan DFKMG, oo ay kamdi yihiin madaxweynaha DFKMG Cabdullaahi Yuusuf Axmed iyo Ra'iisul wasaare Cali Maxamed Geeddi.

Jawhar oo 95 km woqooyi kaga aadan caasimada Soomaaliya, waa meesha ay si kumeel gaar ah ugu sugan yihiin madaxweynaha iyo ra'iisul wasaaraha DFKMG.

"Dawladda Canada oo kaashanaysa jaaliyadda Soomaaliyeed ee reer Canada - oo ah jaaliyada ugu ballaaran ee ka soo jeeda afrikada bari ee ku dhaqan Canada - waxay kaalin weyn ka qaadan karaan nabad ku soo dabaalida dalka burburay (Soomaaliya)" sidaas waxaa yiri xildhibaan Wrzesnewskyj oo ay soo xiganeysey jariidada Inside Toronto.

Xildhibaan Borys waxa uu ka tirsan yahay xisbiga Libral-ka' ee haya talaad dalka Canada.

Waxaa wararku intaas ku dareen in xildhibaanku uu wixii uu dalka Soomaaliya kala soo kulmo uga warbin doono dawlada Canada.

Waxaa waftiga ka mid Soomaali reer Canada ah.

Xildhibaanka waxaa lagala xiriiri karaa: Halkan....Guji..

ISHA: Inside Toronto.... | Tarjumadii SomaliTalk | July 31, 2005

Warbixin labaad hoos ka akhri.

Wafdi ka socda Dalka Canada oo ku soo wajahan dhawaan caasimada kmg ee Jowhar

Wararka ka imaanaya caasimada Canada ee Toronto ayaa xaqiijinaya in wafdi ka socda Baarlamaanka dalkaas ay ku soo fool leeyihiin magaalada Jowhar.

Wafdigaan ayaa waxaa horkacaya Xildhibaan Borys oo ka tirsan xisbiga dalka talada hayo ee liberal partiga.

Wafdigaan ka socda Dalka Canada ayaa waxa ay isku xilqaameen in ay ukala dab qaadaan madexweynaha iyo afhayeenka waxayna kulamo layeelan doonaan labada dhinac si ay u soo afjaraan khilaafaadka yar ee ku dhexjira labada dhinac.

waa wafdigii ugu horeeyay ee ka socda Dalka Canada oo booqasho ku yimaado Soomaaliya gaar ahaan caasimada Xarunta Kmg ee dawlada federaalka magaalada Jowhar.

Warkaan ayaan ka soo xigtay Gudoomiyaha Jaaliyada Soomaaliyeed ee Dalka Canada mudane ingineer C/shakuur Maxamuud Gurey oo ka mid ah wafdiga xildhibaanka Canadian-ka ah.