Iyadoo ololahii ugu danbeeyey ee musharaxiinta Xisbiga dimuqradiga ee dalka Maraykanku uu socdo ayaa hadana waxaa saadal weyn laga bixinaya gobolada waddanka maraykanka cidda ku soo bixi doonta doorashada xisbiga dimuqaradiga ee la loolami doonta Madaxweyne George W. Bush sannadka 2004, Muddo hadda laga joogo 9 bilood wakhtigaasi oo televisionada waddanka Maraykanka laga arkay wejiyo cusub oo ka dhex loolamaya xisbiga dimuqradiga bulshada maraykanka uma ay kala caddayn cid ay la barbar dhigan Madaxweyne Bush waayo sababa badan oo jira awgood, waa midda koobaade Madaxweyne George W. Bush oo ka caan ah dhamaan bulshada Maraykanka dhexdiisa ha noqoto qoyska uu ka dhashay ee reer Bush ama sumcadda uu ka kasbaday dagaaladii uu ku qaaday wadamada Afghanistan iyo Ciraaq ee uu ku sababeeyey inuu ku ilaalinayo Amaanka Shacabka Maraykanka waa midda labaad eh Musharaxiinta xisbiga Dimuqraadiga oo aan ahayn rag si weyn uga caan ah gudaha waddanka maraykanka, iyo weliba xagga dhaqaalaha oo aan la odhan karin xayndaabka Bush waa la tartami karayeen wakhtigaasi ragga iyagu u oomana inay ku soo baxaan hogaanka xisbiga Dimuqradiga, Howard Dean oo ah isagu ninka la filaayo inuu sida weyn ugu soo bixi doono doorashada xisbiga dimuqradiga ayaa cod laga qaaday shacabka maraykanku waxaa lagu ogaaday in 10% in ka yari aqoon u leedahay shakhsiyadiisa.

 

Hadaba ka dib dagaalkii uu Madaxweyne George W. Bush ku qaaday waddanka Ciraaq badhtamahii sannadkani aynu ku jiro ee 2003 ayaa waxaa eedayn badani kaga timid xildhibaano badan oo ka tirsan guriga Senate-ka iyo Congresska ee waddanka maraykanka oo laf dhabar u ah xisbiga dimuqradiga, iyaga oo Madaxweyne Bush ku eedeyey inuu buun-buuniyey hanaankii loo adeegsaday ololahii loogu jiray in Saddam Xuseen xukunka lagaga xayuubiyo, taasi waxay ka sii dartay markii uu Madaxweyne Bush soo hordhigay labada gole ee waddanka maraykanka muddo afar bilood laga joogo Miisaniyad lacageed oo ku dhaw 70 Bilyan oo dollarka maraykanka ah oo lagu sheegay in dib u dhis loogu samaynayo waddanka ciraaq, Saraakiisha iyo sharci-dejiyanada ka mid ah xisbiga dimuqradigu waxay ku doodayaan iyada oo dhaqaalaha maraykanku uu hoos u dhacay in ka badan %20 ka dib intii uu xukunka qabtay Madaxweyne Bush, iyada oo shaqooyinka kuwa ugu muhiimsan ee wax soo saarka warshadaha iyo shariikadahu ay hoos u dhacday oo 2 milyan oo shaqo in ka badan la waayey, markaa wakhtigani waxay ku haboonayd in Madaxweyne Bush aan dib loo dooranin inuu marlabaad hanto xilka madaxweynanimo, Howard Dean oo ka hadlaya 70 bilyan ee dollar ee madaxweyne Bush ka codsaday guriga senate-ka iyo weliba congress-ka inay ansixiyaan si loogu dhiso ciraaq wuxuu yidhi "Newyork iyo Alabama iyada oo la oga sida ay korontadu uga go,day iyaga oo shaqaalahii ugu muhiimsana ee shariikadaha laydku shaqo la,aan ku dhacday waa maxay muhiimadda inoogu jirtay in lacagta intaa le,eg aynu dalkale gayno, shacabka maraykanku uma dhamayn in ciraaq lagu duulo wuxuu ahaa go,aan ka yimid Bush, Powel iyo Rumesfeld iyaga ayaana laga raba in ay keenan caddaymo dhab oo ay soo hordhigaan shacabka maraykanka". hadaba waxaan jecelahay inaan faalladani faaqidaad kaga bixiyo cidday yahiin sagaalka musharax ee isku taagaya doorashada dhawaan ka dhex dhici doonta xisbiga dimuqradiga iyo hanaankooga siyaasadeed bal mid mid aynu u soo qaadano

 

1. HOWARD DEAN

 

Howard Dean oo uu garab taaganyahay ALGORE kuna jira Ololaha doorashada ee xisbiga Dimuqradiga.

Howard Dean waa siyaasi dhexdhexaad ah, sannadkii 1991-kii ayuu ku guulaystay inuu noqdo Badhasaabka gobolka yar ee Vermont, waxaana lagu tiriya mudadii uu ka ahaa badhasaabka gobolka vermount inuu noqday badhasaabkii keliya ee waddanka maraykanka soo mara taariikhdiisa ee saxeexa in shakhsi wal oo gobolka vermont ka tirsani uu heli karo liisan caafimaad, wuxuu dhimay Governor Dean laba jeer cashuuraha gobolka Vermont, waa dhakhtar xaaskiisa la weheliya ama la wadaaga cilmiga dhakhtarnimada wuxuu sannadkii 1971 dii shahaadada B.A ka qaatay jaamacadda Yale University, sannadkii 1978-kii ayuu ka dhamaystay kuuliyadda caafimaadka ee Einstein ee magaalada New york, intii uu badhasaabka ka ahaa gobolka Vermont wuxuu ku guulaystay inuu abuuro 41000 oo shaqo, waa nin siyaasadiisu tahay mid degen oo dhex dhexaad  ah, aaminsan diinta kiristaanka mad-habta Orthodox-ka balse aan sida Madaxweyne Bush ahayn nin diinta aad ugu ad adag, Mar wax laga weydiiyey wuxuu samayn doono haddii uu ku guulaysto doorashada 2004 ee ka dhacaysa waddanka maraykanka wuxuu ku jawaabay "boqolka (100) cisho ee ugu horeeya maamulkayga waxaan kaga soo saari doona ciidamada maraykanka ee ku sugan waddanka ciraaq" waxaa si weyn loo aaminsanyahay inuu ku soo bixi doono doorashada xisbiga dimuqradiga waxaana sharci-dejiyaal madax banaan oo ka qaaday dhawaan daraasad cidda ay xisbiga dimuqradigu la dhaceen ama ku qanceen barnaamijkiisa siyaasadeed inuu yahay Governor Dean daraasadaasi oo laga qaaday Mac-hadka daraasadaha iyo siyaasadda ee New Hampshire waxaa ka maqana laba musharax oo keliya oo kala ah Senator Joe Liberman iyo Janeral Wesley Clark, dhawaan ayaa waxaa cadaayey inuu si weyn u taageersanyahay ninkii isagu lagaga guulaystay doorashadii hore ee 2000 ka dhacday waddanka maraykanka Algore siyaasadda Howard Dean.

 

 

2.GENERAL WESLEY CLARK

 

Janeral Wesley Clark waa Janaral hawlgab ka gallay ciidamada Waddanka Maraykanka kuna soo dhex jiray ciidamada muddo ku siman 34 sanno, Jenaral Clark, wuxuu noqday Janeralka guud ee ciidamada gashanbuurta NATO.

 

Wuxuu ku dhashay magaalada Chicago sannadkii 1944-kii December 23 keedii, sannadkii 1962-kii ayuu dhamaystay iskuulkiisa dugsiga sare HALL HIGH SCHOOL, sannadkii 1969 kii isaga oo 17 sanno jira ayuu dhamaystay cilmiga edabiyaanta jaamacadda West Point waxaa uu gallay Jaamacadda weyne ee ingiriiska ee OXFORD UNIVERSITY isaga oo ka dhamaystay ama Master ku sameeyey cilmiyada Philosophy-ga, Economics (Dhaqaalaha) iyo weliba siyaasadda (Politics).

Janeral Wesley Clark

 

 

Intii u dhexaysay sannadahii 1997 ilaa 2000 bishii May wuxuu Janeral Clark ahaa Taliyaha guud ee Ciidamada Gaashanbuurta NATO, wuxuuna ahaa Janeralka hogaaminaayey ciidamadii gaashanbuurta Nato ee weeraray ciidamadii Seerbiyiinta ee qabsaday Gobolka Kosovo, kana tuuray xukunka Hogaamiyahii hore ee Serbia Milosovic, intii u dhexaysay 1996kii ilaa 1997-kii Janeral Clark wuxuu ahaa Abaanduulaha guud ee ciidamada Maraykanka qaybta koonfureed ee saldhigoodu yahay Jasiiradaha Panama. intii sannadahaa ka horaysayna Janeral Clark wuxuu ahaa sarkaal ka tirsan guriga gaashandhiga ee waddanka maraykanka wuxuuna madax ka ahaa guddi qaabilsanayd qorshayaasha militeryga ee waddanka maraykanka, waa nin siyaasadiisu tahay Muxaafid laguna tiriyo ragga farakutiriska ah ee dimuqradiga ah ee militeryga ah ee isku soo taagay jagada ugu saraysa ee dalka maraykanka, wuxuu aaminsanyahay diinta kiristaanka mad-habta Orthodox-ka.

 

3. SENATOR JOHN KERRY

 

John Kerry waa Senator ka mid ah guriga Senateka ee waddanka Maraykanka kana tirsan Muxaafidiinta xisbiga Dimuqradiga ee dalka maraykanka, wuxuu ku dhashay magaalada Denver ee gobolka Colorado ee dalka maraykanka sannadkii 1943-kii, wuxuu cilmiga edabiga (BACHELOR OF ARTS B.A) ka dhamaystay jaamacadda YALE University, isla markiiba wuxuu ku biiray ciidamda Badda (Navy Armies) ee waddanka maraykanka, wuxuuna ahaa farsamayaqaan dayac tira qoryaha ka dhaca doomaha badda ee waddanka maraykanka, wuxuu ka mid ahaa ciidamadii ka qayb gallay dagaalkii Vietnam ee maraykanku ku weeraray dalka vietnam, ka dib markii dagaalka laga soo noqday wuxuu ku guulaystay John Kerry billad dahab ah oo geesinimo.

Senator John Kerry iyo Ololahiisa doorashada dimuqradiga

 

ka dib markii ciidamada maraykanku ka soo laabteen dagaalka vietnam wuxuu ku biiray urur ay yeesheen askartii ka soo dagaalantay waddanka vietnam wuxuuna ka noqday afhayeen (vietnam Fighters of america), Senator Kerry oo aad u xisayn jiray inuu mar uun ku biiro golayaasha sare ee waddanka maraykanka noqdana siyaasi ka caan ah gobolada waddanka maraykanka waxay riyadiisasi dhabawday afar iyo toban sanno ka dib wuxuu xoog haye u noqday Senator Pell oo waagaasi ahaa Senator ka tirsan xisbiga dimuqradiga oo laga soo doorto Gobolka Massachussets ee dalka maraykanka Senatorkaasi u qaabilsana golaha senateka maraykanka xidhiidhka arrimaha dibadda ee maraykanka.

 

Sannadkii 1984 ayuu Senator Kerry wuxuu isku soo taagay inuu Governor ka noqdo gobolka Lieutenant, wuuna ku guulaystay sannadkii 1985 kii ilaa hadda wuxuu Senator Kerry yahay Senator ka mid ah golaha senateka waddanka Maraykanka. waa nin siyaasadiisu tahay midig aaminsan diinta kiristaanka Mad-habta Orthodox, wuxuu badanka jeediya qudbado aad iyo aad ugu mucaarid ah siyaasadda Madaxweyne Bush, wuxuuna ku dhaliila dagaalka uu Bush ku qaaday waddanka Maraykanka.

 

 

4.DICK GEPHARDT

 

 Dick Gephardt waa siyaasi dhex dhexaad ah kana tirsan golaha Congress-ka ee maraykanka una matala xisbiga dimuqradiga gobolka Missouri ee waddanka maraykanka, wuxuu ku dhashay kuna bar baara koonfurta ST.LOUIS ee gobolka Missouri state ee waddanka Maraykanka, wuxuu ka dhashay qoys danyar ah, wuxuu ka hellay Scholarship kiniisadda magaalada ST.LOUIS si u u barto dugsigiisa sare, wuxuu ka baxay jaamacadaha North western University iyo jaamacadda Sharciga ee Machigan University isaga oo ku takhasusay cilmiga sharciga, sannadkii 1965-kii wuxuu Gephardt ku biiray ciidamada Cirka ee waddanka Maraykanka wuxuuna ka gaadhay heer sarkaal sare oo ka tirsan ciidamada cirka ee waddanka maraykanka, inyar ka dib wuxuu iskaga baxay ciidamada wuxuuna furtay xafiis garyaqaan, 26 sanno ka dib Dick Gephardt waxaa loo doortay inuu noqdo Xildhibaan ka tirsan golaha Congress-ka kana mid ah xisbiga dimuqradiga.

 

DICK GEPHARDT IYO OLOLAHIISA DOORASHADA 2004 EE XISBIGA DIMUQRADIGA.

 

sannadkii 1989-kii wuxuu noqday hogaamiyaha Dimuqradiga ee xildhibaanada Congresska ugu jira (the democratic Majority congress Leader), intaa wixii ka dambaysay Dick Gephardt wuxuu ahaa xildhibaan dimuqradiya oo ku jira golaha Senateka ee waddanka Maraykanka, waxaa lagu tiriya ragga aadka uga soo horjeeda qorshayaasha Madaxweyne Bush-ka tallada dalka maraykanka hadda haya.

 

Dick Gerphadt waa nin siyaasadiisu tahay dhex dhexaad aan ahayn Liberal iyo Conservative midna wuxuu aaminsanyahay diinta Kiristaanka Mad-habta (orthodox) waana nin aad ugu adag diinta kiristaanka.

 

 

N.B: AKHRISTAYAASHA QIIMAHA MUDANLOW WAXAAN TODOBAADADA SOO SOCDA IDIIN SOO GUDBIN DOONA SHAN MUSHARAX OO KALE OO U LOOLAMAYA DOORASHADA XISBIGA DIMUQRADIGA DHEXDIISA HADDII ALLA IDMO, Haddii aad Haysaan wixii tallo iyo tusaale ah iyo weliba fikrado dheeraad ah ila soo xidhiidha haddii alla idmo idinka oo igala soo xidhidhaya ciwaanadani soo socda

 

E-mail: diridhaba2001@hotmail.com

 

ama Mobile: 00-92-300-2600907

 

la soco ololaha shanta musharax ee kala ah Senator Joe Liberalman, Senator John Edwards, Congress Man Denis Kucinich, Ambassador Carol Moseley Braun, iyo Reverend Al Sharpton oo ah isagu ninka keliya ee madow ee tartanka ku jira

 

WEJIYADA MUSHARAXIINTA DIMUQRADIGA

 

WAXAA ISKU SOO URUURIYEY MOHAMED ABDI HASSAN (DIRIDHABA

        KARACHI, PAKISTAN.

 diridhaba2001@hotmail.com