Subaxnimadii Axadii 25.April.04 ,10:30 Subaxnimo ayaanu ka amba baxnay magaalada Kolding ee wadanka Denmark oo aanu dhamaantayo daganahay waxaanu ka koobnayn 5 xubnood oo dhalasho ahaan kasoo kala jeeda Soomaali, Denish,Tuki, iyo Albaani. Waxa uu socdaalkayagu la xidhiidhay mashruuc uu bixiyey lacagtiisa ururka midawga yurub, kaas oo loogu talagalay in ay isku bartaan khibradoodana isku waydaarsadaan 5 wadan oo ka tirsan qaarada yurub kuwaas oo kala ah- England, Romania, Italia, France iyo Denmark. Waxaanu diyaarad ka raacnay gagida dayuuradaha ee Billund Lufthavn ilaa Gatwich airport oo ku yaala magaalada London halkaas oo aanu uga sii gudubnay magaalada Bristol oo aanu tareen u sii raacnay. Markii aanu soo gaadhney magaalada Bristol waxa nagu soo dhaweeyay xubnihii reer England mashruucan uga wakiilka ahaa oo uu ugu horeeyo John Winsor iyo Jean-luc ku waas oo aanu intooda badan hore isu baranay markii ay socdaal kani oo kale ah noogu yimaadeen wadanka Denmark sannadii hore , waxa markiiba wax lala yaaba ku noqday kooxdayadii reer Denmark sida ay dadka ajanabiga ahi Briten u joogaan ugana shaqeeyaan kadib kolkii aanu aragnay in dhamaan Tagaasidii ka shaqaynaysay istaanka tareenada ee Magaalada Bristol ay wadaan dad dhasho ahaan ka soo jeeda dalal kale oo midabo kala duwan na leh ha u badnaadeen dad ka soo jeeda qaarada Asia’e.

waxaanu habeen kaas ku hoyanay Premier Lodge oo ahaa Hotelkii naloogu talagalay in aanu daganaano inta aanu joogno oo ahayd 4 maalmood. Intii aanu joognay Bristol meelihii aanu booqanay waxa ka mid ahayd jaamacada dhagoolayaasha ee magaalada Bristol taas oo aanu fajacnay markii aanu aragnay meel dhamaan dadka joogaa ay faraha ku wada hadlayaan ,oo aanay jirin cid ku fahmaysaa iyo cid aad fahmi karaysaa toona hadii aanad aqoonin astaanta ay dhagoolayaashu ku wada hadlaan,waxaase nacaawisay macallimad Denish ah oo nalasocotay oo iyadu astaamaha dhagoolayaashu ay ku wada hadlaan hore u baratay maadaama oo ay gabadh ay dhashay dhago la,dahay. Waxa kale oo nasiib wanaag noo noqotay in aanu magaalada Bristol kula kulano Hamish wilson oo ah nin ingriis ah oo ku xeeldheer dhaqanka iyo suugaanta Soomaalida mudo badana ku noolaa dalka Soomaaliya kaas oo uga waramayey qaar ka mid ah dadka reer Bristol dhaqanka Soomaalida, isaga oo soo bandhigay sawiro iyo qalabka ay reer guuraaga Soomaaliyeed isticmaalaan oo aad looga helay markii la daawaday. Waxa kale oo aanu booqanay Iskuulo kala duwan oo wax laga barto iyo qaar ka mid ah ururada Soomaalida ee magaaladaas ka jira, waxa iyana xasuus mudan in nala soo tusay Clifton Suspension Brige oo ku yaala galbeedka Bristol oo ah biriij kii ugu horeeyay dunida ee aan tiirar ku taagnayn kaas oo ka soo dul daldalan wabiga Avon oo hoos mara biriij kaas cabir dhan 245 feet .

Guud ahaan magaalada Bristo waa magaalo quruxbadan oo nadiif ah, inkasata oo aad dareemayso kala duwanaanshiiyo balaadhan oo dhinaca dhaqaalaha ah marka aad isu eegto Bariga iyo Galbeedka magaaladaas, waxaa lagu qiyaasaa in ay ku nool yihiin Bristol guud ahaan 600,000 oo qof.

Dadka Soomaalida ah oo intoodii badnayd ay soo dageen Bristol bartamihii sagaashameeyadii waxaa lagu qiyaasaa tiradooda 7000 – 10,000 oo qof, waxaa dad kaas ka mid ah tiro badan oo ka soo wareegtay dalal kale oo yurub ka tirsan.ka dib kolkii ay dalalkaas mudo badan ku noolaayeen jinsiyadihiina ka qaateen , dad kii aan halkaasi kula kulmayna waxaa ka mid ahaa dad Soomaali ah oo hore usoo daganaanjiray wadamada Holland, Germany, Sweden, Denmark, France iyo Talyaaniga, ku waas oo marka aad waydiiso sababta ay dalkaas ugu soo guureen kuu sheegaya sababo kala duwan, oo ay ka midyihiin in qaraabadoodii joogto halkan, in ay barashada diinta ee caruurta halkani ku fiicantahay, in ay xuriyad dheeraad ah ku haystaan oo aanay ka heli jirin dalalkii ay hore ugu noolaayeen, in ay doonayaan in ay caruurtoodu wax ku barato luqada Ingiriisiga , in ay u dhib yar tahay in ay ganacsi xor ah halkan ka sameeyaan, in ay halkan u dhib yartahay in ay shaqo ka helaan iyo sababo la mid ah , waxa se ay dhamaantood isku raacsan yihiin in xaga nadaafada , nidaamka iyo guryahaba ay ku wanaagsanaayeen dalalkii ay hore ugu noolaan jireen, qaarkoodna waxaaba ku dhaca filan waa iyo af kala qaad marka ay yimaadaan Ingiriiska oo waxay yidhaahdaan sidan maan moodayn!.

Mar aan waydiiyay sababta filanwaagaas keenta ,waxa uu ii sheegay Mr.Ahmed Du’aale oo ka shaqeeya magaaladaasi in ay dumar badani la soo guuraan caruur yar yar iyaga oon hore u sii sahamin meesha ay u guurayaan ka dibna ay dhacdo in reer si wanaagsan ugu noolaa dalkii ay joogeen marka ay yimaadaan xagan la isugu geeyo qol ka mid ah Hotel yar caruurtiina ay halkaas kaga xanuusato waxa uu Axmed carabka ku dhuftay in xanuunada ugu badan ee caruurta ku dhaca uu ka midtay xanuunka Asmada, ama Hotelka la isugu geeyo dad aan hab dhaqankoodu wanaagsanayn oo qaxoonti ah dalal kala duwana ka yimi taasina ay qoyskii dhibaato ku keento.

SILICA IYO SAXARIIRTA LAGULA DHAMQO MAXAABIISTA REER CIRAAQ Waxaa isa soo taraya shaleey iyo maanta wararka sheegaya sida naxariis darrada leh ee... Guji May 2

Dhanka kale Soomaalida reer Bristol waa dad hada ka muuqda bulshada ku nool magaaladaaas waxaanay hada sifiican ugu jiraan suuqa shaqada iyo waxbarashadaba sida aanu ku ogaaanay waraysiyo aanu samaynay intii aanu joognay magaaladaas.

Waxaa ka jira magaalada Bristol ilaa 5 urur oo ay Soomaalidu leedahay , iyo sadex masaajid oo ay dadka islaamka ah ee magaaladaa dagan la wadaagaan. Dukaamo ganacsi, maqaaxiyo iyo hudheelo , tira badani waxa ay ka shaqaysaa warshadaha oo u badan shaqo xilliyeed, waxaa ka shaqeeya magaaladaas ilaa 40 kalkaaliyeyaal macallimeed si ay Iskuulada uga caawiyaan caruurta soomaaliyeed ee caawimada dheeraad ka ah u baahan ama ay ugu dhaxeeyaan waalidka Soomaaliyeed iyo Iskuulada, tiro badani waxa ay wadaan gaadiidka dad waynaha sida basaska iyo tagaasida .

Si kastaba ha ahaatee socdaalkii Bristol waxa uu ahaa mid si heer sare ah u dhacay wax badan na aanu ka soo korodhsanay dhamaantayo. Waxaanu aad ugu mahadnaqaynaa dadkii nagu soo dhaweeyay Intii aanu joognay magaalada Bristol oo ka tirsan dalka Ingiriiska .

Mohamed-amiin Siyad Abdi
Somali Radio in Kolding ( Hormuud)
Somali_radio@hotmail.com

Faafin: SomaliTalk.com | May 5, 2004

 AFeef: Aragtida qoraalkan waxaa leh qoraaga ku saxiixan