WARARKA:
BOOSAASO |
HARGEYSA |
MUQDISHO |
NAIROBI |
QURBAHA |
XORIYO
May 1, 2004
Wararkii Maanta:
Roobab xoogan oo shalay illaa iyo xalay ka
da’ayay Magaaladda Muqdisho ayaa sababay Khasaarooyin Naf iyo Maalba leh.
Roobabkan ayaa Khasaarihii ugu waynaa gaystay
Xalay markii ugu yaraan Shan dhismo oo Sar ahaa ay ku dumeen Xaafado kala
duwan oo Muqdisho ka mida, Waxaaana dhismayaashaasi mid ka mida oo ku yaalay
Degmadda Huriwaa ku dhintay 2 qof oo midi ahaa Wiil yar oo 6 jir ah, halka 8
qof oo kalana ay dhaawacyo ka soo gaareen Bur bur kala duwan oo soo gaaray
dhawr dhisme oo Muqdisho ku yaala.
Korontadda Magaaladda Muqdisho oo aan
Nidaamsanayn ayaa iyaduna dhibaatadda ugu wayni ka taagan tahay, iyadoo ay
xalay Koronto ku dishay Deegaanka Cali Kamiin gabar Yar oo Sagaal jir ah,
kadib markii Fiilo Koronto ay ku soo dul go’day Meel Biyo Fariistaan oo ay
gabadhaasi dhex maraysay, taasoo keentay in Danabkii Korontaddu ay Biyihii ka
dhigeen Maaso, Waxaana jira Meelo kala duwan oo ay sidaas oo kale Korontaddu
waxyeelo ka gaysatay.
Masuuliyiinta Shirkadaha Korontadda Muqdisho
ayaa markii ugu horaysay qirtay in Fiilooyinka ay isticmaalaan aysan
Hagaagsanayn, Waxayna sheegeen in xilligan aysan dayactir ku samayn Karin
Fiilooyinka Korontadda, iyagoo arrintaana u sababeeyay inaysan dhaqaale
Hawshaas ku filan diyaar u ahayn inay bixiyaan Dadwaynuhu.
Wadooyinkii Waawaynaa ee Muqdisho ay lahaan
jirtay oo intooda badan ku bur buray Dagaaladii Sokeeye ee Mudada dheer ka
socday ayaa imminka qarka u saaran inay go’aan, Waxaana Gaadiidka Dadwaynuhu
ay billaabeen inay isticmaalaan Wadooyin Yar yar oo Jidcadayaal ah isla
markaana ku dhex yaala Xaafadaha,.
Dhaqaatiirta Muqdisho ayaa iyaguna ka dayrinaya
Biyaha fariistay qaybo ka mida Magaaladda oo ay sheegeen in laga yaabo inay
ka dhashaan Cuduro halis ah, Waxaana ay ugu baaqeen dadwaynaha inay ka
shaqeeyaan Nadaafadda Wadooyinka iyo goobaha ay dadku isugu yimaadaan.
Muqdisho oo mar ahayd mid ka mida Caasimadaha
ugu Bilicda San Afrika ayaa imminka Nidaam ahaan iyo Bilic ahaanba ka liidata
Magaalooyinka Gobaladda Kale ee Somalia, Waxaana inta badan loo aaneeyaa
Dhibaatadda la soo deristay Muqdisho Qabqablayaasha aan Damiirka Soomaalino
lahayn ee mid kastaa qayb ka mida Magaaladii xirtay iyo Shacabkeeda oo aan
gaarin Bisayl Siyaasadeed oo ay isaga tuuri karaan Heeryadda Dagaal
Oogayaasha Somalia.
<><><>
Iyadoo ay Maanta ku beegan tahay Kowda May oo
ah Maalinta Shaqaalaha Adduunka ayaa shaqa La’aanta ka jirta Somalia waxay
gaartay Heerkii ugu xumaa ee ay gaarto inta la ogyahay Taariikhda.
Shaqo la’aanta ka jirta Somalia oo saamaysay
Qoys Kasta oo Soomaaliyeed ayaa waxay gaartay heer aad u hoosaysa, Waxaana
Dadka Soomaaliyeed ay xilligan la fadhiyaan Baagamuudo Waddooyinka iyo
goobaha lagu qaxweeyo ee ay dadku isugu yimaadaan.
Ma jirto dalka Dawlad dhexe oo wax ka tari
karta shaqo la’anta ka jirta Dalka, Waxaana xilligii ay Dawladu ka jirtay
Somalia ay dadku inta badan u shaqo tagi jireen Hay’adaha Qaranka, Laakiin
markii uu bur buray Hanaankii Dawladnimo waxaa meesha ka baxay shaqadii ay
qaban jireen Malaayiin qof oo Soomaali ah, iyadoo sidoo kalana qaybihii ay ka
koobnaayeen Ciidamadda Qaranku ay ehel u noqdeen Baagamuudo iyo dhaqaalo Xumo.
Wixii ka dambeeyay Bur burkii Dawladnimo ee
Somalia waxaa abuurmay Shirkado yar yar oo ganacsi iyo Warshado, inkastoo ay
wax xoogaa horumar ah sameeyeen haddana ma ahan kuwo wax ka qaban kara
dhibaatadda ka jirta Dalka, Waxaana inta badan lagu dhiliilaa inaysan ku
xulan Shaqaalaha aqoontooda iyo Kartidooda, Laakiin waxay u adeegsadaan
Xulitaanka Shaqaalahooda Qaab Ehelnimo, taasoo niyad jab wayn ku abuurtay
Shaqaalihii Xirfad la yaasha ahaa ee Soomaaliyeed.
<><><>
Maraykanka ayaa mar kale cabsi ka muujiyay inay
Somalia hoy u noqon karto Kooxaha Argagixisadda ee Geeska Afrika.
Warbixin ay Soo saartay Waaxda La dagaalanka
Argagixisadda iyo Dabagalka ee Maraykanka ayaa lagu sheegay in Somalia ay
baylah u tahay cid kasta oo Qatar galin karta Gobalka Geeska Afrika, Wuxuuna
sheegay in Somalia ay 14 sanno tahay dal aan lahayn Nidaam iyo kala damabayn
sidaas darteedna ay suuragal tahay inay gabaad ka dhigtaan Shaqsiyaadka
Argagixisadda ah ee Bartilmaameedsanaya Gobalka.
Ma ahan Markii ugu horaysay ee uu Maraykanku ka
digo Qatar ka imaan karta Somalia, laakiin Soomaalidu ma aaminsana inay Qatar
Sidaa u wayn ku yihiin Caalamka, waxayna u arkaan Warbixinadda Maraykanka
kuwo tuhun uun ku eg oo shaki lagu kala galinayo Soomaalida iyo dalalka kale
ee Gobalka.
Dhinaca kale Maraykanka ayaa ka baaraya Shidaal
Xeebaha Somalia, Waxaana la xaqiijiyay in Baaritaano lagu sameeyay Badwaynta
Hindiya ee ku teedsan Somalia, iyo Sawiro ay Hawada Sare Satellites ay
marayaan imminka gabo gabo isla markaana uu Maraykanku qorshaynayo inuu ka
faa’iidaysto Shidaalka Somalia.
Dawladda Ku Meel Gaarka ah ee Somalia, oo
dhawaan sheegtay in Imaaraadka ay heshiis kula galeen Illaalinta Xeebaha
Somalia ayaan wax hadal ah ka soo saarin Warkan cusub ee soo shaac baxay,
iyadoo saraakiil ku dhaw dhaw Dawladduna ay sheegeen inaysanba la socon
arrintaasi Madaxda Sare ee Dawladda Waqtigeedii Dhamaaday.
<><><>
Wasaaradda Waxbarashadda Xukuumadda Ku Meel
Gaarka ah ee Somalia ayaa markii ugu horaysay soo bandhigtay hanaan wax looga
qabanayo Bur Burka ku yimid Waxbarashadda Somalia, iyadoo aan la ogayn in
Hanaankaasi uu yahay mid ay ka dhabayn doonto iyo in kale.
Wasiirka Waxbarashadda Xukuumadda Ku Meel
Gaarka ah ee Somalia, Cali Xaashi Maxamed Sahal ayaa sheegay in Muddo Saddex
Bilood gudahood ay wax uga qaban doonaan Dugsiyadii Bur Buray ee Dalka
Somalia, Wuxuuna sheegay in Ahmiyadda Koowaan ay siin doonaan Dugsiyadda Bur
Bursan ee aan la dhisan, Isagoo sheegay in Tallaabadda xigtana ay noqon
doonto in Kuwa la dagan yahay laga saaro dadka degan.
Cali Xaashi waxa uu sheegay in inkastoo ay
jiraan duruufo dhaqaale ay haddana ka go’antahay in illaa xad ay Bulshadda
wax u qabtaan, Wuxuuna sheegay in wixii ay wax ka qaban waayaan ay la kaashan
doonaan Shacabka Soomaaliyeed iyo Dalladaha Waxbarashadda ee imminka jira.
Dawladda Ku Meel Gaarka ah ee Somalia, oo looga
bartay inay soo bandhigto Barnaamijyo si wayn u soo jiita Shacabka
Soomaaliyeed marka la sheegayo, laakiin aan la fulin ayaan la ogayn sida uu
qorshahan u hirgalayo.
<><><>
Gen Jaazim Saalax oo horay uga tirsanaan Jiray
Ciidankii Xarsul Jamhuuriga ee Ciraaq ayaa shalay gaaray Magaaladda Fullujah
oo ay dib uga gurteen Ciidamadda Maraykanku.
Gen Jaazim oo Magaaladaasi si wayn looga soo
dhaweeyay ayaa hadal uu u jeediyay dadka Fullujah waxa uu u sheegay in
Ujeedada reer Fullujah ay imminka tahay inay ka shaqeeyaan Nabadgalyadda iyo
degenaanshaha Magaaladooda, Wuxuuna sheegay in Maraykanku ay u ballan qaadeen
inaysan Magaaladaasi soo weerarin.
Gen Jazim oo uu Maraykanku u xilsaaray inuu
dajiyo Xaaladda Fullujah ayaa u sheegay dadka Fullujah inaan lagu soo
faragalin doonin Nidaamka Magaaladooda, Wuxuuna sheegay inay iyagu xaq u
leeyihiin inay dhistaan Nidaam isla markaana is Xukumaan.
W/Q.Abdi Wali Ibraahim Aadan (Garyare)
Garyare20@hotmail.com Garyare@msn.com
Garyare20@yahoo.com
Faafin: SomaliTalk.com | May 1, 2004
Cudurka Daacuunka oo Aad Ugu Sii Siyaadey Muqdisho
& Isbitaalka S.O.S ee Muqdisho ayaa Maalintii
Lixaad u xiran Muran ka dhashay Haweeneey Ilma Galeenka looga saaray
Isbitalkaasi..
Guji
Hay’adda Al-Manhal oo
daawooyin gaarsiisay Isbitaallada Muqdisho
Hay’adda Al-Manhal oo ka mid ah hay’adaha samafal
ee ka jira Magaalada Muqdisho ayaa...
Guji 30/4
Wasiirka Arimaha Dibada DKMG oo eedeeyey Carabta
iyo wasiir ku xigeenkii wasaarada Dawladaha
Hoose iyo Horumarinta reer Miyiga Puntland oo xaaskiisii toogatey
Guji 29/4
Kulaabo bogga hore ee www.somalitalk.com
|