W/Q.Abdi Wali Ibraahim
Aadan (Garyare)
Garyare20@hotmail.com
Garyare@msn.com
Garyare20@yahoo.com
Hogaamiyayaasha
Soomaalida qaarkood ayaa ka biyo diidsan inay ku laabtaan
Madasha Shirka Soomaalidu ka socdo ee Kenya. Iyadoo waqtii loo
qabtay inay Hogaamiyayaashu ku yimaadaan Kenyan-na ay ka
harsantahay Saddex Maalin oo kaliya.
Faarax Wehliye Cadoow
Sendiko oo ka mida Hogaamiyayaasha Siyaasadda ku soo biiray
intii uu socday Shirka Kenya ayaa sheegay in Kenya uusan wax
shir ah ka socon isla markaana ay Soomaalida halkaasi joogtaa
iska fadhiyaan Hoteeladda. Wuxuuna sheegay in shirka Kenya uu
yahay mid lagu lugooynayo Shacabka Soomaaliyeed. Balse aysan
jirin Dawlad halkaasi lagu soo dhisayo.
Sendiko waxa uu sheegay
inuusan isagu shaqsiyan ku laabanayn Shirka Kenya inta ay
Dawaladaasi wax ka badalayso hanaanka uu shirku ku socdo.
Wuxuuna sheegay inuu jeclaan lahaa in Shirka loo madax
banaaneeyo Soomaalida laf ahaanteeda si ay xalka kama dambaysta
ah iyagu u gaaraan.
Ra’iisul Wasaaraha
Xukuumadda Ku Meel Gaarka ah. Maxamed Cabdi Yuusuf ayaa isna
hadal qoraal ah oo uu Muqdisho ka soo saaray ku sheegay inaysan
waxba iska badalin Mawqifkii ay TNG-du ku qaadacday Shirka
Kenya. Wuxuuna sheegay inaysan ku laabanayn Madasha Shirka inta
ay Kenya ka noqonayso Go’aanka ay ku mamnuucday Baasaboorka
Somalia.
Maxamed Ibraahim Xaabsade oo
isna hogaamiya garab ka mida Jabhadda RRA ayaa sheegay in Kenya
ay iyadu go’aansatay inaysan Soomaalidu dalkeeda soo galin.
Sidaas darteedna waxa uuu sheegay inaysan suuragal ahayn inay
marna noo yeerto marna Jiritaanka inkirto. Laakiin waxa uu
sheegay Xaabsade inuu ku laabanayo Shirka haddii Dawladda Kenya
ay ka laabato go’aanka ay ku mamnuucday Baasaboorka Soomaaliga.
Cumar Maxamed Maxamuud
“Cumar Filish” oo isna ka mida Hogaamiye Kooxeedyadda Muqdisho
ee ku sugan Madasha Shirka Kenya ayaa sheegay inuu ku qanacsan
yahay qaabka ay IGAD u maaamulayso Shirka Kenya. Wuxuuna ugu
baaqay Hogaamiyayaasha Soomaalida inay ku laabtaan Madasha
Shirka isla markaana wixii ay tabanayaan ay ugu soo bandhigaan
Madasha Shirka.
Maxamed Dheere oo isagu ka
mid ahaa kooxaha diidan Shirka Kenya ayaa haatan u muuqda inuu
ka tanaasulay mawqifkii hore ee uu ka qaatay Shirka Kenya.
Wuxuuna sheegay inuu ku laabanayo Madasha Shirka. Isagoo
Mamnuucista Baasaboorka Soomaaligana sheegay inay sabab u yihiin
Soomaalida dhexdeeda. Waa sida uu hadalka u dhigayee.
Col C/laahi Yuusuf oo isna
shalay uun ku laabtay Boosaaso ayaa meel fagaare ah ka sheegay
inuu ku laabanaayo Shirka Kenya. Wuxuuna sheegay in Shirka Kenya
ay ka soo bixi doonto Dawlad ay Soomaali oo dhan isku raacsan
tahay.
Shirka Kenya oo loo
qorsheeyay in dib loo billaabo Wajigiisa Saddexaad Dhamaadka
Bishan ayeey Hogaamiyayaasha Soomaalidu u muuqdaan inay mawqif
ahaan ku kala qaybsan yihiin ka qayb galka Shirkaasi. Waxaana
muuqato ifafaalo muujinaya in Kulanka Labaatanka Bishan loo
qorsheeyay inuu dib u dhac ku imaan karo. Kadib markii inta
badan Hogaamiyayaasha Siyaasadda iyo Odayaasha Dhaqanku ay ka
biyo diideen tagista Shirka Kenya.
Magaaladda Muqdisho oo
Maalmihii la soo dhaafay ay ka socdeen Dagaalo Sokeeye oo u
dhaxeeyay Maleeshiyooyin Beeleedyo iska soo horjeeda ayaa maanta
iyo shalay daganayd. Iyadoo dhinaca kalana ay socdaan Dadaalo
Nabadeed oo la doonayo in lagu Xalliyo Dagaaladda Muqdisho.
Goobihii ay dagaaladdu ka
dhaceen oo wali isku hor fadhiyaan Labada Maleeshiyo ayaa
daganayd shalay iyo maanta. Waxaana dhagaha dadka Muqdisho ay ka
nasteen daryanka Rasaasta ay is waydaarsanayeen labada
Maleeshiyo. Iyo Madaafiicda Habawga ah ee ku dul habsanayay
Xaafadaha Muqdisho.
Waxaa yaraaday Qaxii Faraha
Badnaa ee ka dhashay dagaaladaasi. Waxayna billlaabeen dadka ka
ag dhaw goobaha dagaalku ka dhacay inay dib ugu laabtaan
Guryahoodii si ay uga hortagaan in la bililiqaysto Hantidooda.
Iyadoo intii uu dagaalku socdayna la bililiqaystay guryiha ay
Qoysaskii lahaa ka qaxeen. Waxaana ka faa’’idaystay dagaalkaasi
Sokeeye Kooxaha Burcadda ah oo bililiqo xoogan u gaystay
Goobihii Ganacsiga iyo Guryihii ku yaalay aaga uu dagaalku ka
dhacay.
Odayaasha Dhaqanka ee la
haybta ah Beelaha dagaalamay laakiin aan beel ahaan iyagu lug ku
lahayn Dagaalka ayaa wadda dadaalo ay ku doonayaan inay ku dhex
dhaxaadiyaan dhinacyadda dagaalamaya. Waxaana warar hor dhac ah
oo laga soo xigtay Guddiga Dhex Dhexaadintu ay sheegayaan in wax
xoogaa horumar ah laga gaaray dadaaladii Nabadeed ee lagu dhex
dhexaadinayay labada dhinac.
Dagaalkan ayaa ahaa mid ka
mida dagaaladda ugu xumaa ee Muddooyinkan soo mara Muqdisho.
Wuxuuna dagaalkan muujinayaa inaysan Qabqablayaasha dagaalku u
hogaansamin heshiiskii Xabad Joojinta ahaa ee ay Sannadkii hore
ku saxiixeen Eldoret oo ka tirsan Kenya.
Wafuud ka socota
Laanta Dabagalka Abaaraha u qaabilsan Qaramadda Midoobay ayaa
Socdaal u kuur galid ah ku jooga Gobaladda Jubbooyinka ee
Koonfurta Soomaaliya.
Wafuudan oo ka kooban Afar
Xubnood oo Afrikaan ah ayaa kormeer ku soo maray Deegaanadda
Jamaame. Kabsuumo. Jilib. Iyo Hargayso Yareey oo ka mida
Deegaanadda Jubbooyinka ee ay Abaaruhu halakeeyeen. Waxaana
intii ay Kormeerkooda ku jireen ay Warbixino ka dhagaysteen
Odayaasha Deeganadaasi ay booqdeen iyo Madaxda Isbahaysiga
Dooxadda Jubba oo Gobaladaasi gacanta ku haya.
Odayaasha Deegaanadaasi ayaa
u sheegay Wafdiga ka socday Qaramadda Midoobay inay Abaaruhu
saameeyeen Nolosha Qoys Walba oo ku dhaqan deegaanadaasi.
Waxayna ka dalbadeen Wafdiga in lala soo gaaro Gurmad Caalamiya
oo bini’aadanimo. Iyadoo wafdigan oo 48 saac ee soo socota sii
joogi doona Deegaanadaasi marka ay dhamaystaan Socdaalkooda lagu
waddo inay Warbixino u gudbiyaan Hay’adaha Qaramadda Midoobay.
Socdaalka Wafdiga Qaramadda
Midoobay ayaa ku soo beegmay xilli ay joojiyeen Hay’adaha
Midowga Yurub iyo Qaramadda Midoobay Duulimaadyadii ay
Diyaaradahoodu ku tagi jireen Koonfurta Soomaaliya. Kadib markii
lagu arkay Garoonka Diyaaradaha ee Diinsoor Miino xilli ay soo
cagadhiganaysay Garoonkaasi diyaarad ay Qaramadda Midoobay
leedahay. Halka Garoonka Ceel Axmad ee Duleedka Markana laga war
helay in Miinooyin lagu aasay .
Shir Madaxeedkii
Dalalka Saaxil iyo Saxaraha ee ka dhacay Magaaladda Bamako ee
Dalka Maali ayaa Ajandayaashii looga dooday meel sare uga jirtay
Arrinta Soomaaliya oo ay go’aano ka soo saareen Madaxdii ka qayb
gashay Shirkaasi.
Madaxwaynayaasha Dalalka
CENSAD ee shirkaasi ka qayb galay ayaa intooda badan isla gartay
in la taageero Shirka Dib u Heshiisiinta ee Kooxaha Soomaalida
uga socda Dalka Kenya. Waxayna dalbadeen in la saxo wixii
qaladaad ah ee Shirka caqabad ku ah.
Hogaamiyaha Libya. Col
Moamar Al-Qadaafi oo isagu iska leh Fikradda lagu aas aasay Urur
Gobaleedkan ayaa hadal uu ka jeediyay Kulan Madaxeedkaasi waxa
uu ku sheegay inaan Xal u helidda dhibaato ka jirta Afrika loo
raadin doonin Golaha Ammaanka ee Qaramadda Midoobay. Wuxuuna
sheegay inay lagama maarmaan tahay inay Afrika iyadu xalisato
Arrimaheeda Gudaha.
Qadaafi waxa uu sheegay in
arrinta Soomaaliya aan la gayn doonin Golaha Ammaanka ee
Qaramadda Midoobay sidaas darteedna ay Afrika iyadu xalisan
doonto Arrimaheeda gudaha. Wuxuuna sheegay in Xal loo raadiyo
meel Afrika ka baxsan ay sii murjin karto Xaaladda Soomaaliya.
Isagoo hoosta ka xariiqay in Urur Gobaleedka Saaxil iyo Saxaraha
uu gacan wax ku ool ah ku yeelan doono soo afjaridda Colaadaha
ka jira Dalalka Ivory Coast. Sudan. Iyo Somalia.
Madaxwaynaha Dawladda Ku
Meel Gaarka ah ee Somalia, C/qaasim Salaad Xasan ayaa isna
shirkaasi ka jeediyay Khudbad kulul oo uu ku canaantay Dalalka
Somalia saaxiibka la ah inay ka gaabiyeen Xal u helidda
Dhibaatadda Soomaaliya. Wuxuuna eedayn kulul u jeediyay Dawlada
Ethiopia oo uu sheegay inay tahay Caqabadaha ugu wayn ee
hortaagan Nabada Somalia.
20 ka dal ee ku jira Urur
Gobaleedka Saaxil iyo Saxaraha ayaa ballan qaaday inay ku biiri
doonaan Dadaaladda lagu heshiisiinayo Kooxaha Soomaalida.
Waxayna sheegeen inay Wakiilo u dirsan doonaan Shirka Kenya.
W/Q.Abdi Wali Ibraahim
Aadan (Garyare)
Garyare20@hotmail.com
Garyare@msn.com
Garyare20@yahoo.com