Dagaal shalay iyo xaley ka socda deegaanka Beexaani
Shalay galabnimadii ayaa waxaa deegaanka Beexaani agagaarka
Conis Stadium ka qarxay dagaal aad u culus oo u dhexeeya
kooxaha Maleeshiyo ah, wuxuuna dagaalkaasi saba-bay inay ku
dhintaan ilaa iyo 7-ruux ayna ku dhaawacmeen dad kale oo
fara badan ayna u badnaayeen dad rayid ah oo rasaastu ugu
tagtay goobihii ay ku sugnaayeen.
Dagaalkaan oo la isku adeegsaday hubka noocyadiisa kala
duwan ayaa si weyn looga dareemay Muqdisho ilaa iyo haatanna
lama garanayo cidda uu u dhexeeyo dagaalkan, balse waxaa la
sheegay inuu u dhexeeyo ilaalada Hotel Global oo ay leedahay
Miineey Xaashi Shibis iyo maleeshiyo daacad u ah Ganacsade
Bashiir Raage.
Dagaalkaan waxa uu saamayn ku yeeshay isku socodka gaadiidka
agagaarka jubba, beexaani iyo xaafadaha u dhowdhow, sidoo
kale waxa uu baajiyay dagaalka kulan ciyaareed dhex marayay
kooxaha Savana iyo Bariga dhexe oo ka dhisan degmada Afgooye,
waxaana ka mid ah dadka dhaawacmay dadweyne u soo daawasho
tagay ciyaartaasi iyadoo kulankaasi uu baaqday.
Warar ayaa waxay sheegayaan in hotel-ka Global ay soo
gaareen khasaarooyin aad u badan kaddib markii ay ku dhaceen
madaafiic. Odayaasha deegaanka uu dagaalku ka dhacay ayaa la
sheegay inay dadaal ugu jiraan sidii loo qaboojin lahaa
dagaalka, balse uma eka Malleeshiyooyinka dagaallamaya kuwo
qaadanaya dhex dhexaadinta ay wadaan odayaasha, waxaana
haatan socda isku hub urursi labada dhinac ah.