Duqii hore ee magaalada Berbera Cabdala Xaaji Cali Axmed ayaa arrin lagu deg degay ku tilmaamay eedeynta ka soo yeertay mas'uuliyiin ka tirsan maamulka Somaliland ee dusha looga saaray Dawladda Ku Meel Gaarka Ah ee Somalia iyo Maamul Gobaleedka Punt Land Masuuliyadda Weerarkii ka dhacay inta u dhaxaysa Hargaysa iyo Berbera isla markaana lagu dilay haweeneey u shaqaynaysay Hay’ad Samafal,

Cabdalla oo Hargeysa jooga ayaa u sheegay STN in hadda ay baaris socoto, gacanta lagu hayo dadkii dilka geystay, sidaas daraadeedna aanay habooneyn in laga hor dhaco baaritaanka, iyadoo aan natiijo laga gaarin baarista ay ku hawlan yihiin Booliska Somali Land,

Wuxuu ku taliyay Cabdalla Xaaji Cali in laga fogaado wixii neceyb iyo caadifad abuuri kara inta baaritaanka uu socdo, isla markaana laga iska ilaaliyo wax kasta oo kala fogeyn kara xiriirka Waqooyiga iyo Koonfurta Soomaaliya.

Dawladda Ku Meel Gaarka Ah ee Somalia ayaa ku tilmaantay wax lala yaabo eedayntii ay dhawaan Somali Land u soo jeedisay,

Wasiirka Warfaafinta ee Xukuumadda Ku Meel Gaarka ah, C/qaadir Madaxeey oo Maanta Shir jaraa’id ku qabtay Xarunta Madaxtooyadda Ku Meel Gaarka ah ayaa sheegay inay la yaaban yihiin in nin Soomaali oo sheeganaya Masuuliyad uu ku dhawaaqo eedayn aan sal iyo raad toona lahayn isla markaana uu indhaha ka qarsada cadawga shisheeyaha ah ee Somalia dhibaatada ku haya, isagoo arrimahaasi ka hadlayana waxa uu yiri Madaxeey:-

Madaxeey waxa uu ku tilmaamay eedaynta noocaas ah boor isku qarin la micno ah Murtidda oranaysa Islaan Dhali wayday Aleelo ku waalatay, Wuxuuna sheegay in Maamulka Somali Land ay eedayntan uga gol leeyihiin inay ka jeediyaan shacabka guuladaradii siyaasadeed ee ay gaareen markii ay Qaramadda Midoobay soo saartay Qaraar cadaynaya Midnimadda Somalia, isagoo sheegay in gabalkeedii uu dhacay waxa uu ugu yeeray siyaasadda gacan ku rimiska ah ee cadawgu ku kala qaybinayo Somalia,

Hadalkan ayaa daba jooga hadal horay uga soo yeeray Maamulayaasha Somali Land ee lagu sheegay inay ka dambaysay Dawladda Ku Meel Gaarka Ah ee Somalia dilkii dhawaan loo gaystay Haweeneey u dhalatay Kenya isla markaana u shaqaynaysay Hay’adda GTZ oo lagu dilay inta u dhaxaysa Hargaysa iyo Berbera,

Dawladda Ku Meel Gaarka Ah ee Somalia waxay tacsi u dirtay dawladda Kenya iyo ehaladii ay ka dhimatay Haweenaydaasi oo ay ku tilmaameen inay ahayd samafalad,

Dhinaca kale Dawladda Ku Meel Gaarka Ah ee Somalia waxay maanta u magacawday guddi heer qaran ah aaska Xaliimo Khaliif Magool oo dhawaan ku dhimatay Magaaladda Amsterdam ee dalka Holland, iyadoo la filayo in dhawaana maydkeeda la keeno Muqdisho,

Shirka Wasiiradda Arrimaha Dibadda ee IGAD oo looga hadlayo arrinta Somalia ayaa lagu wadaa inuu 22 ka bishan uu ka furmo Dalka Jabuuti,

Shirkan oo la filayo inay ka soo qayb galaan Wasiiradda Arrimaha Dibadda ee IGAD ayaa waxaa ka soo qayb gali doono Wasiiradda Dalalka ku jira Urur Gobaleedka IGAD oo uu ka mid yahay Wasiirka Arrimaha Dibadda ee Xukuumadda Ku Meel Gaarka ah, Yuusuf Xasan Ibraahim "Dheeg"

Shirkan oo daba jooga shirkii ay horay Nairobi ugu yeesheen Qaar ka mida Wasiiradda Arrimaha Dibada ee IGAD ayaa waxaa looga hadli doonaa sidii horay loogu socod siin lahaa Shirka Soomaalida isla markaana loo guda gali lahaa Wajiga Saddexaad ee Shirka, Waxaa Sidoo kale la filayaa in shirkaasi ay ka soo baxaan go’aano adag oo ku wajahan kooxaha diidan Nabadda Somalia,

Yusuf Dheeg ayaa lagu waddaa in shirkaasi uu ka jeediyo Warbixin ku saabsan horumarka laga gaaray Dib U Heshiisiinta Somalia, Wuxuu sidoo kale Shirka Wasiiradda hor dhigi doonaa Ashtako ka dhan ah Dawladda Ethiopia oo ay ku eedeeyeen inay dhawaan soo galisay hub gudaha Somalia,

Xuseen Caydiid

16 hogaamiye Kooxeed ayaa shalay qoraal ay ka soo saareen Nairobi waxa ku qaadaceen Shirka Soomaalida uga socda Kenya,

Qoraalkaasi oo uu saxaafaddu u aqriyay Xuseen Caydiid oo ka mida Guddoonka Sare ee SRRC ayaa lagu sheegay inay ka baxeen shirka Kenya isla markaana aysan dib ugu soo laaban doonin inta laga saxayo waxyaabaha ay diidan yihiin,

Hogaamiye Kooxeedyadan waxay sheegeen inay ka b axeen shirka kadib markii ay IGAD ku guulaysan waysay inay xaliso Qodobka 30,aad ee Dastuurka Federaalka oo ahaa meesha khilaafka ugu wayni ka taagnaa, waxay sidoo kale sheegeen inaan looga soo jawaabin qoraalo is daba joog ah oo ay u direen Beesha Caalamka iyo IGAD si loo turxaan bixiyo Qodobadda ka qaldan Dastuurka Ku Meel Gaarka ah ee Somalia,

Qoraalkan oo ay ku saxiixnaayeen Hogaamiye Kooxeedyo ay ka mid yihiin, Xuseen Caydiid, C/laahi Yuusuf, Xasan Abshir, iyo rag kale ayaa waxaa ka mid ahaa Kooxihii dhawaan Isbahaysiga uga dhawaaqay Jawhar iyo Hogaamiyayaal kale oo aan joogin Madasha Shirka,

Xuseen Caydiid oo ka mida Guddoonka Sare ee Golaha SRRC ayaa warsaxaafadeedkaasi kadib waxa uu ku sheegay waraysi uu siiyay Wakaaladda Wararka Reuter in la marin habaabiyay shirka Soomaalida uga socday Kenya,

Caydiid waxa sheegay in Shirka uu galay Xaalad Jaantaa Rogan ah isla markaana ay shirka qaseen Bayaano iska soo horjeeda oo ay soo kala saarayaan Xubnaha IGAD, Beesha Caaalamka iyo Soomaalida Qudhooda, Wuxuuna sheegay in shirka imminka laga bixiyay gacantooda, taasina ay keeni karto in shirka ay soo wajahaan caqabado kale,

Caydiid waxa uu ku hanjabay inay qaadici doonaan Geedi Socodka Nabada Somalia hadii aan la sixin qaladaadka hareeyay Shirka, Wuxuuna sheegay in Golaha SRRC ay isku mawqif ka yihiin shirka Isla markaana ay doonayaan in wax la saxo ee aysan qaadicin illaa iyo hadda Shirka Kenya,

Hadalka Caydiid oo u muuqda inuu jeclaan lahaa in wax la saxo laakiin aan laga bixin shirka ayaa waxa uu ka horimaanayaa qoraalkii uu saxaafadda shalay ka hor aqriyay isla markaana uu ku sheegay inay qaadaceen Shirka Kenya,

Ciidamadda Pakistan oo dagaal culus kula jira Beelo Daga Gobalka Waziristaan ee galbeedka dalkaasi ayaa shaaca ka qaaday inay qabteen 100 xubnood oo ka mida dagaalyahanadda Al-Qaacidda iyo Taliban,

Dadka la qabtay oo qaarkood saxaafadda lagu soo bandhigay talefashinadda Caalamka ayaa waxay ka xirnaayeen Indhaha, Waxaana ka muuqatay diif aad u daran,

Warar goor dhawayd soo baxayna waxay sheegayan inay dagaalka ku biireen diyaaradaha Maraykanka oo billaabay inay duqayn xoogan u gaystaan dagaal yahanadda Al-Qaacidda iyo Taliban,

Taliyaha Hogaaminaya Ciidamadda Hawlgalka ku jira, Jen Saftar Xuseen ayaa sheegay inay hawada ka qabteen Fooneey ay ku wada hadlayeen dagaalyahanadda Taliban iyo Al-Qaacidda oo uu hogaaminayo nin la rumaysan yahay inuu u dhashay Jeejniya ama Uzbikistaan, Wuxuuna meesha ka saaray in dagaal yahanadda ay ku hareeraysan yihiin uu ku jiro Ayman Al-Dawaahiri,

Pakistan waxay sidoo kale sheegtay in Osama Bin Laden iyo Ku Xigeenkiisa Ayman Al-Dawaahiri ay ku dhuumalaysanayaan gudaha Afghanistan,

Xoghayaha Guud ee Qaramadda Midoobay Koffi Annan ayaa ku booriyay Golaha Ammaanka ee Qaramadda Midoobay inay qaataan go’aan deg deg ah oo ciidamo nabad illaalin ah loogu dirayo Dalka Burundi si loo soo afjaro xiisadaha ka taagan dalkaasi,

Annan waxa uu sheegay inay lagama maarmaan tahay in go’aanka goluhu uu soo baxo ka hor 2 bisha April oo ah waqtiga kama dambaysta ah ee ay soo gabagabaynayaan hawsha ay dalkaasi ka hayaan ciidamadda nabad illaalinta ee Afrika, wuxuuna sheegay inay muhiim tahay in Nabad illaaliyaasha Qaramadda Midoobay inay kor ka illaaliyaan doorashadda Dimuquraadiga ah ee ka dhacaysa dalkaasi Bisha October ee sannadkan.

Golaha Ammaanka ee Qaramadda Midoobay ayaa la filayaa inay maalinta bariya dood ka yeeshaan ciidamo loo diro Burundi oo tiradoodu gaarayso 6000 oo askari, waxaana ciidamadaasi looga gol leeyahay inay door muuqda ku yeeshaan Xasilinta Dhibaatadda Burundi,

Faafin: SomaliTalk.com | March 21, 2004

WARARKA: BOOSAASO | HARGEYSA | MUQDISHO | NAIROBI | QURBAHA | XORIYO