March 21, 2004
Ammaanka oo la adkeeyey meelo ka mid ah Yurub iyo Daahir
Riyaale oo la sheegay inuu imaanayo Brussels
![](http://www.somaliatalk.com/2003/oct/ingiris.jpg)
Maxamed Xaaji (Ingiriis)
Brussels, Belgium
Ingiriis@yahoo.com
Magaalada Brussels oo ah
caasimadda waddanka Belgium, xarunta Midowga Yurub iyo tan gaashaanbuurta
NATO waxaa aad loo adkeeyey ammaanka iyo nabadgelyada. Sababta rasmiga ah ee
ka dambaysa arrintan lama shaacin, waxaase dadka ku xeeldheer arrimaha
nabadgelyada Yurub ay ku soo cel-celinayaan in tani daba taagan tahay
weerarkii dhowaan lagu qaaday saldhig tareen oo ku yaalla magaalada Madrid ee
dalka Spain.
Booliiska milateriga ah ayaa
lagu soo daad-gureeyey saldhigyada waaweyn ee tareennadu ka baxaan ee
waqooyiga, bartamaha iyo koonfurta Brussels. Ciidamada booliska local-ka oo
kaashanaya kuwa federaalka (politie federale) ayaa taagan goobaha dadku ku
badan yihiin iyo jidadka waaweyn ee saxmada leh oo dhaqdhaqaaqa dadka iyo
gaadiidkuba ay ku badan yihiin.
Xilligan oo laga sii baxayo
qaboobihii winter weather-ka waxaa badan socodka dadka, waxaana wada buuxa
gaadiidka dadweynaha oo dadku ay taag-taagan yihiin. Caasimadda Brussels oo
caadiyan ah magaalo rabshad badan oo dambiyadu ku badan yihiin waxaad
dareemaysaa madax-xanuun markaad dhowr jeer maqasho dhawaaqa booliska oo meel
wax ka dheceen ku sii ordaya.
Si ay ammaanka kor ugala
socdaan, boolisku waxay kiciyeen diyaaradaha qumaatiga u kaca, kuwaasoo dul
heehaabaya agagaarka faras-magaalaha iyo goobaha muhiimka ah. Television-ka
Bruxelles ayaa sheegay in tallaabadan boolisku ay qaadeen lagu adkeynayo in
lagaga hor tago weeraro argigixiso oo lala soo beegsado magaalada.
Faransiiska ayaa ka digay in
waddankiisa uu qatar ugu jiro qarax argagixiso oo lagu soo qaado. Walaacaas
oo kale waxaa muujiyey waddanka the Netherlands oo billaabay inay boolis la
soo raacaan dadka tareennada la socda. Waddamada Ingiriiska iyo Jarmalka ayaa
iyaguna sidoo kale ammaankooda aad u adkeeyey, kaddib markii Midowga Yurub uu
soo saaray digniino lagu xoojinayo nabadgelyada.
Booliska Belgium, waxa ay
xaqiijiyeen inay xireen ugu yaraan shan nin oo mid ka mid ah lagu tuhunsan
yahay inuu lug ku lahaa qaraxyadii sannadkii tagay ka dhacay magaalada
Casablanca ee dalka Marooko. Ninkan iyo kuwa kale ee la xiray waxaa laga
qabtay guryo gaar ah oo ku yaalla Brussels iyo laba goobood oo kale oo aan la
shaacin.
Waxa ay boolisku daboolka ka
qaadeen inay tuhunsan yihiin in nimankan ay tababarro ku soo qaateen xerooyin
ku yaalla waddanka Afghanistan, ayna xiriir la leeyihiin urur argagixiso oo
Marookaan ah oo la yiraahdo, kaasoo marka la soo gaabiyo loo yaqaan GICM.
Ururkan wuxuu ku jiraa liiska ururada uu Mareykanku u aqoonsan yahay inay
argagixisada ka mid yihiin.
Baarayaasha Spain ayaa waxa ay
fiirinayaan in qaraxyadii tareenka ee ka dhacay Madrid oo ay ku dhinteen 202
qofood ay wax xiriir ah la yeelan karaan kuwii May sannadkii hore ka dhacay
Marooko oo ay ku geeriyoodeen 45 oo ay ku jiraan 12-kii qofood ee is
niidaamiyey. Meelaha lala bartilmaameedsaday qaraxyada Casablanca waxaa ka
mid ahaa qunsuliyadda Belgium; maqaayad Spanish ah iyo xarun bulshada
Yuhuuddu leeyihiin.
Dhanka kale, labadii cisho ee
ugu dambaysay waxaa ka socday magaalada Brussels dhaqdhaqaaq loogu diyaar
goroobayo safar la filaayo inuu Madaxweynaha maamulka Somaliland, Daahir
Riyaale Kaahin ku yimaaddo waddanka Belgium. Diyaar gorow ay ku soo
dhoweynayaan dadweynaha u dhashay gobollada waqooyi ayaa ka socda dhowr
magaalo oo Belgium ku yaalla.
Meelihii uu dadka kula hadli
lahaa ayaa la sii diyaariyey, sida uu ii sheegay Jaamac Xersi Xasan. Waxaa
lagu wadaa in Daahir Riyaale Kaahin uu warbixin ka siin doono Midowga Yurub
xaaladda Somaliland, kaddibna uu weydiisan doono aqoonsi in la siiyo
maamulkiisa. 1991-kii markii dowladii kacaanku burburtay ayaa Somaliland
waxay ku dhawaaqday inay ka go'day Soomaaliya inteeda kale.
Maxamed Xaaji (Ingiriis)
Brussels, Belgium
Ingiriis@yahoo.com
Nolosha Soomaalida
Belgium & Holland
Warbixintii Maxamed Xaaji "Ingiriis"
ka akahri halkan
12/3/4
Faafin: SomaliTalk.com | March 21, 2004
Kulaabo bogga hore ee www.somalitalk.com
|