Barnamujka caawa Radio Xoriyo
ka baxaya waxuu ka koobanyahay.
-
Ciidamo Itoobiyaan ah oo
hareereeyey Magaalada Buuhodle Ee Xarunta Gobolka Cayn
-
Mucaaradka Itoobiya
oo ku baaqay in xukuumadda la rido
-
Qoxooti Ereteriyaan ah oo xadka laga raray.
-
Wadamada xaga warshadaha
ku hor maray oo isku raacay in ciidamo nabad ilaalin ah
loo sameeyo Afrika.
-
Banaamujii aragtida halgamaaga oo aanu kaga hadli doono
taariikhaha gumaystayaasha iyo suugaan halgameed.
Ciidamo Itoobiyaan ah oo hareereeyey Magaalada Buuhodle Ee
Xarunta Gobolka Cayn
War aanu ka soo xiganay boga
Qoraxay Online, ayaa sheegaya in ay soo galeen gudaha
magaalada Buuhoodle Ciidamo Itoobiyaan ah oo aad u tiro
badan .
Ciidamadan oo ka soo
kicitimay dhinaca magaaladda wardheer ee Gobolka Doollo,
ayaa markii ay soo galeen isku xeeray gabi ahaanba
magaaladda iyagoo go’doomiyey dadkii reer baadiyaha ahaa ee
ka caraabijiray magaaladda.
Wararku waxay
intaasi ku darayaan in mudo markay korfadhiyeen ay soo
galeen gudaha magaaladda qaar ka mid ah askartaasi, waxayna
durbadiiba shir la yeesheen rag soomaali ah oo la tuhun san
yahay in ay u joogeen Ciidamada Itoobiya magaalada
Buuhoodle, kuwaasoo warbixin dheer ka siiyey xaaladda
magaalada iyo guud ahaanba Gobolku waxa uu ku sugan yahay,
iyo weliba meesha xaalmarayo, kadibna waxayna ciidamadaasi
calanka Itoobiya iyo kan kililka ka taageen dhinaca Galbeed
ee magaaladda.
Lama sheegin wax dhibaato ah
oo ay ciidamadaasi gaysteen, hase yeeshee waxaa lagu soo
waramayaa in dadkii halkaasi ku sugnaa ay argagax iyo cabsi
ku abuurtay soo galida ciidamada Itoobiya.
Magaalada Buudoodle oo ku
taal xadka Ogaadeeniya iyo Soomaaliya,ayaa tan iyo bur
burkii soomaaliya aysan ciidamada Itoobiya si cad u degin
halka ay manta calanka sudheen.
Mana aha markii ugu horaysay
oo ay ciidamo Itoobiyaan ahi si kadis ah ku soo galaan
Gudaha magaalada Buuhoodle. Waxayna sidan oo kale ku soo
galeen magaalada Buuhoodle dabayaaqadii sanadkii aynu soo
dhaafnay, iyagoo ka qafaashay dad shacab ah oo mudo dheer ku
xidhnaa magaaladda wardheer.
Ugu dambayntiina Ciidamadaan
ayaan wax faahfaahin ah laga bixin soo gelidooda mana jiraan
wax cid ah oo ay la hadleen marka laga reebo qaar lagu
tuhunsan yahay in ay iyaga halkaas u joogeen oo ay ka
waraysteen xaalada magaaladu ku suganthaay.
Mucaaradka
Itoobiya oo ku baaqay in xukuumadda la rido.
Kumanyaal ka mid ah
taageerayaasha ururrada mucaaradka ah ee Itoobiya ayaa
bannaanbax ay sameeyeen ku baaqay in loo midoobo sidii
xukunka looga tuuri lahaa xukuumadda hadda Itoobiya ka
talisa, waxayna codsadeen in lagu dadaalo sidii doorashada
soo socota ay u noqon lahayd mid u dhacda si cadaalad ah,
isla markaana ayna dawladu ku shubanin.
Bannaanbaxan waxaa soo
qabanqaabiyay ururka UEDF, oo ah urur ay ku midoobeen 15
xisbi oo mucaarad ah, kaasoo sannadkii hore loo sameeyay
inuu talada dalka kula tartamo isbahaysiga EPRDF ee hadda
xukunka itoobiya gacanta ku haya.
Madaxwaynaha ururka UEDF Dr.
Merera, oo bannaanbaxayaasha la hadlayay, ayaa dadwaynaha
Itoobiya ugu baaqay inay u midoobaan sidii ay maamulka Addis
Ababa u ridi lahaayeen. Wuxuuna taliska Addis Ababa ku
eedeeyay inuu ku guul darraystay siyaasada horumarinta, isla
markaana uu Itoobiya u horseeday saboolnimo iyo nabadgelyo
xumo.
Qoxootiga Ereteriyaan ah
oo xadka laga raray.
Kumanyaal qoxooti ah ayaa
laga raray xeryo sanka ku hayay xadka ay Ereteriya la
wadaagto Itoobiya, sidaas waxaa horraantii toddobaadkan
sheegtay hay’ada Qarmada Midoobey u qaabilsan arrimaha
qoxootiga ee UNHCR.
Qiyaastii 2400 oo ah qoxooti
ku noolaa xeryo dhinaca Itoobiya ku yaalla oo aan sidaas uga
fogayn xadka labadaas waddan u dhexeeya, ayaa hadda loo
raray meel xadka ka fog oo gudaha Itoobiya ah, si
nabadgelyadooda lo sugo, sidaas waxaa sheegay afhayeen u
hadlay hay’ada UNHCR.
Qoxootigan waxay halkaasi
yimaadeen sannadihii 1989-2000, markii uu socday dagaalkii
kululaa ee dhex maray Ereteriya iyo Itoobiya, waxayna muddo
dheerba sugayeen in laga fogeeyo xadka oo nabadgelyadiisu
ayna ilaa iyo hadda sugnayn.
Qoxootigani ayaa ku noolaa
xero lagu magacaabo Wa’ala Nihibi oo u dhaw meesha lagu
magacaabo Sheraro oo galbeedka gobolka Tigreega ku taalla,
waxayna xadka u jirtay 20 kilo mitir oo kaliya.
Wadamada xaga warshadaha ku hor maray oo isku raacay in
ciidamo nabad ilaalin ah loo sameeyo Afrika.
Dawladaha hodanka ah
ee dhinaca warshadaha ku hormaray ee la isku yiraahdo G8,
ayaa shirkooda ka soconaya Jasiirada Sea ee gobolka Goergia
isku raacay in qaarada Afrika laga cafiyo daymaha lagu
leeyahay.
G8 oo ka kooban
dawladaha Maraykanka, Ingiriiska, Faransiiska, Jarmal,
Japan, Kanada, Talyaaniga iyo Ruushka ayaa kulankooda lagu
martiqaaday dawladaha Algeria, Ghana, Nigeria, Uganda iyo
weliba Senegal oo Afrika ka mid ah.
Waxyaabaha la isku raacay ayaa waxaa ka mid ah in la dhiso
lana tababaro ilaa 50,000 oo ciidan Afrikaan ah
kuwaasoo howshoodu noqonayso la dagalaanka khilaafyada iyo
deminta colaadaha Afrika ka dhaca.
Thabo Mbeki madaxwaynaha
Koonfurta Afrika, ayaa ugu baaqay Afrika in ay dhulka iska
qaado oo ay aayaheeda ka tashato. "Waa in aan kari karnaa in
baahideena siday u kala mudan tahay u dhigan karnaa, taasoo
lagu salaynayo waaqiceena, khibradeena iyo baahideena, intii lagu
salayn lahaa waxa ay doonayaan kuwa deeqaha bixiya iyo
Hay'adaha gargaarka ka shaqeeya" sidaasna waxaa yidhi
madaxweynaha Koonfurta afrika :Thabo mbeki.
Waxaa kaloo shirka si wayn
looga hadlay Bariga Dhexe iyo sidii Dimoqoraadiyada loogu
baahin lahaa. Dawlada Maraykanka ayaa si weyn u wadata
mashruuca dimoqoraadiyaynta bariga dhexe, halka Dawlada
Ingiriiska ay si weyn u wadato mashruuca Afrika daymaha
looga dhaafayo laguna taakulaynayo dadka faqriga ah ee
qaarada Afrika.
11.06.2004
C/Nuur Sh.
Mohamed
raadioxoriyo@yahoo.com
Radio
Xoriyo waxaad ka dhegaysan kartaa Mawjadda 19 MB ee
dhererkeedu yahay 15670 KHZ, Maalmaha Talaadada iyo Jimcaha
7: 30PM waqtiga Afrikada.