Geeridu waa xejiya,qariya, waana fogeeya, qof kasta oo aad jeceshahay iyo halyay kasta oo hooyo dhashay waa tii aakhirka u jiidata xaga loo badan yahay, sida uu ku sheegay tuducaa yar oo aan ka soo qaatay suugaanta hodanka ee abwaan Maxamed Xaashi Dhamac Gaariye markii uu u baroor diiqayey geeridii naxdinta lahady ee ku timid Rabi ha u naxariistee maanso yahankii weynaa CABDILLAHI SULDAAN TIMACADE.

Geerida naxdinta leh ee ku timid mudane Sheekh Ibrahim Sheekh Yuusuf Sheekh madar gudoomiyihii golaha guurtida Somaliland waxay naxdin weyn ku tahay guud ahaanba shacabka Jamhuuriyada Somaliland iyo inta jecel nabadeynta, odayaynta iyo isku soo dhawaynta beelaha walaalaha ee dega guud ahaanba mandaqada geeska Africa.

Alla ha u naxariistee Sheekh Ibraahim Sheekh Yuusuf Sheekh Madar waxa uu ka dhashay qoys iyo qabiil magac weyn iyo maamuusba ku lahaa taariikhda gobolka geeska Africa, Aabihii waa Sheekh Yuusuf Sheekh Madar oo sheekhal baladiyaha magaalada Hargeisa ka dhaxlay ninkii budka dhigay caasimada Jamhuuriyada Somaliand oo ahaa Sheekh Ibraahim awowgii SHEEKH MADAR, Sheekh madar waxa uu ahaa culimadii ugu soo hordegtay magaalada hargeisa dabayaaqadii qarnigii tagay waxaanu ka bilaabay magaalada malcaamad quraan oo ku soo barbaarin jiray caruurta.

Sheekh Ibrahim Sheekh Yuusuf Sheekh Madar waxa loo doortay inuu noqdo gudoomiyaha golaha guurtida qaranka xiligii lagu jiray habqanka iyo dagaalada ee dabayaaqadii sanadkii 1988-kii, waxa uu sheekhu ahaa gudoomihii golihii odayaasha ee ururkii xaq u dirirka ahaa ee SNM oo dhulka ka xoreeyey maamulkii uu madaxa ka ahaa ma naxariiste Maxamed Siyaad Barre.

Alle ha u naxariistee Mudane Sheekh Ibraahim Sheekh Yuusuf Sheekh Madar waxa uu kaalin lama ilaawaan ah ka soo qaatay hub ka dhigistii qaranka ee horaantii sanadihii sagaashamaadkii isagoo la soo shaqeeyey dawladihii ay madaxda ka ahaayeen madaxweynihii ugu horeeyey ee Jamhuuriyada Somaliland Cabdirahman Ahmed Cali, iyo maamulkii Maxamed Xaaji Ibrahim Egal.

Sheekh Ibrahim Sheekh Yuusuf Sheekh madar waxa uu sumcad, kalsooni iyo ixtiraam kaga kasbaday kartidiisii odaytinimo iyo nabadeyntiisii dhamaanba beelaha dega dacal ilaa dacal ee Jamhuuriyada Somaliland.

Ugu dambayntii bahda hayada wararka fidisa ee GLOBAL MEDIA GROUP oo fadhigeedu yahay magaalada Bristol ee wadanka ingiriisku waxaanu tacsi gaadhsiinaynaa dhamaanba eheladii, qaraabadii,asxaabtii iyo guud ahaanba shacabka Jamhuuriyada Somaliland.

Hassan Salahuddin

Chairman
Global Media Group
Bristol, Uk,

Email: globallmedia@hotmail.com

Tel: 00-44-7946174533.

Faafin: SomaliTalk.com | July 31, 2004