Waxaa habeenkii xalay (July 16, 2004) gudaha jaamacadda caalamiga ee Afrika, lagu qabtay shir si heer-sare ah loo soo abaabulay loona soo agloolay. Waxaa shirkan qabatay soona qabanqaabisay Jamciyadda Dhaqanka iyo Suugaanta Soomaaliyeed, oo horraankii sannadkan lagu aasaasay magaaladan Khartoum. Waxaana madasha shirka lagu gorfeeyay lagna gunbaaray arrimo doora oo ku wajahnaa howlaha jamciyadda iyo sidii sare loogu qaadi lahaa kaalinta dhallinta, gaar ahaan kobcinta iyo kaabidda suugaanta Soomaaliyeed iyo suugaanyahanada ku cusub saaxada fanka iyo suugaanta.Waxaa kaloo goobta lagu falanqeeyay xal u halidda ummuuraha gurracan iyo jawiga cakiran ee ay ummadda Soomaaliyeed ku sugantahay iyo wacgalinta jiilka cusub ee marinhabaabay.
Waxaa kaloo halkaas lagu lafaguray doorka ay suugaan-ruugyada Soomaaliya ku yeelan karaan howlaha sammatabixinta bulshada iyo badbaadinta shacabka tabaaleysan ee Soomaaliyeed.
Shirkan oo billoowday 10-kii fiidnimo ayaa dhammaaday 2-dii dambe ee habeennimo, waxaana ka soo qeygalay suugaanyahamiin iyo suugaan-jecel fara badan, waxaa kaloo hareersocday haasaawe iyo hadalo murtiyeed oo ay xubnaha iyo howlwadeenada jamciyadda soo jeediyeen.
Waxaa kaloo goobta lagu ansixiyay wargeys afka Soomaaliga ku soo baxa oo billo ah, laguma soo qori doona suugaanta cusub iyo curiyayaasha dhallintayar taariikhdooda iyo maqaalo kale oo wax-ku-ool ah, kaasoo qeyb ka ah dadaalka bulshada lagu wacyigalinya iyo ladagaalanka qabyaaladda.
Habnololeedkii
saxaabadii Rasuulka
