C/Waaxid C/hi Khaliif
London, UK

  cabdulwaxid@hotmail.com 

Ilaah baa mahadleh. Nabadgelyo iyo naxariis Nabi Muxamed korkiisa ha ahaato.

“Qolobaa calankeedu waa cayne, innagaa keenu waa cirkoo kale ee, aan caadna lahayn ee caashaqayee”. Sidaasoo kale qolo kastaa wax bay inay gumaaddo uga baqdaa. Maraykanka iyo reer Galbeedku waxay wadnaha farta ugu hayaan in waddamo aysan jeclayn samaystaan hubka sida aadka ah wax u gumaadda, isagoo isagu jira bambaanooyin nukliyeer, kimiko, sun ama noolayaal sida Barkeetiraya kudka keento oo kale ah lagu rakibay. Soomaalidu inuu kudku inkaar qabo waa hore oon xittaa bakteeriyada keenta la aqoon bay dhihi jireen: kud iyo kaare ku dil. Annaga waxa “torob-torob noo laaya” waa dagaal-oogayaal. Bambaanooyinkii Maraykanku Japan la dhacay, dadkii ku dhintay oo la toban-laabay bay dagaal-oogayaashu naga dileen walina uma haysano inay yihiin hub halis ah “WMD” bal waxaan u haysanaa inay halyeeyo iyo hogaamiyayaal yihiin!

Runtii aad baan u dhaliishanaa shirka markii Eldoret la joogay sababtu waxay ahayd ergooyinkii ka socday rayidka iyo dadweynihii Kenya joogay oo gaabis noqday kuna qancay in ay dagaal-oogayaal kaliya na matalaan. Wixii ergooyinka Soomaalida iyo dadweynaha Soomaaliyeed ee Kenya noo qabanwaayey waxaa noo qabtay madax kale oo qaarkood IGAD ka socdo sida Museveni, Musyoka, madaxweynaha Suudaan, qaarna waddamo kale sida madaxweynaha Muusambiik oo ururka Midowga Afrika madax hadda u ah, iyo wakiillo ka socda Maraykan, Yurub iyo jaamacadda Carabta. Waagaas dagaal-oogayaasha waxaan ku sheegay “wolfhounds” oo ah eeyda lagu ugaarto. Zenawi waxaan ku sheegay “wolfhounds leader/ warlords’ leader”. Dagaal-oogayaasha waxaan hadda ugu yeeraa “Zenawi-minded warmongers”. Waa maxaysato Zenawi madaxa ka xaday.

Ninkii dagaal-oogayaasha raacsan waa yeelki laakiin intii rabta in Soomaaliya wax loo qabtooy khaasatan ergooyinka Mbagathi jooga iyo dadweynaha Soomaaliyeed ee Kenya jooga guud ahaanba waa inaad taageertaan in ergada ka qayb galaysa shirka 9 Janaayo la badiyo. Maxaa idin ku dhacay? Miyeydaan u jeedin sida qab-qablayaashu hadba huteel ugu shirayaan? Dadweynaha Kenya jooga iyo ergooyinka Soomaalida waxaan ka codsanayaa in la is maqlo. Maanta codkeena waa dhiiban karnaa. Maaddaama Af-Soomaaligu uu ku jiro luuqadaha laga badanyahay markii Kenya la joogo, Museveni, Musyoka iyo wakiillada beesha caalamkuna aysan ku hadlin waxaa hal-hays noo ah markii dagaal-oogayaasha laga hadlayo erayadan Ingiriiska ah:

Waxaan bulshada nabadda jecel ee Soomaaliyeed ee joogta Kenya ka codsanayaa inay hal-haysyadaas horay ka bilaabaan markay maqaalkan arkaan. Ciddii boorar ku qoran kartaa haku qoroto, ciddii warqad ku qoran kartaana haku qoroto. Maalin kasta iyo goob kasta oo lajoogo waa in dadka aan dagaal-oogayaasha taageerini ay hal-hayskaas wataan. Faa’iidada ku jirtaa waxaa weeye, madaxda hagaysa shirka oo u arkaysa inay qaateen go’aan sax ah oo dadweynuhu rabo, waxayna u noqonaysaa dhiirigelin iyo in beesha caalamku u aragto inaysan lacagtoodii iyo maskaxdoodii meel cid la’ ah dhicin.

Intaas kaliya kuma filna. Waxaa loo sii baahanyahay hal-ku-dhigyo kale iyagoo su’aalo ka iska weydiinaya mustaqbalka Soomaalida.

Haddaan Soomaali u bedelo waa:

Marka waxaa loo baahanyahay intaas iyo ka badanba. Magaalada London waxaa ka dhacay muddaharaadyo aan iyagoo kale horay looga arag carrigaan Ingiriiska. Waxay ka soo horjeedeen in dowladdoodu dagaal ku qaado Ciraaq. Marar badan waxaad arkaysaa muddaharaad dadku leeyihiin yaan la leyn dawacayooyinka. Annagana ergooyinkeenii iyo dadweynihii inta Kenya iska fariisteen baad mooddaa in dhowr iyo toban dagaal-ooge kaliya xaq ka maqanyahay. Miyeeydaan u jeedin inay har iyo habayn shir ku jiraan iyagoo ka cabanaya xukunka ay IGAD gaartay? Haddaad furtid boggagga Soomaalida waxaad arkaysaa intaas oo urur oo leh dad baan matalnaa. Marka ururadaas iyo dadweynaha guud ahaan waxaan weydiinayaa ma dagaal-oogayaashaad la jirtaan mise danta ummadda? Haddaan danta ummadda la jirno waa in nalaka arkaa.

Walaalayaal (Rag iyo dumarba) haddaynaan arrimahaas horay u aqoon hadda aan barano. Qofkii dagaal-ooge kasoo horjeedoow khaasatan ururada waa inay meel kasta oo ay joogaan sameeyaan muddaharaad kasoo horjeeda dagaal-oogayaasha oo lagu taageerayo arrimahaas ay wadaan IGAD iyo caalamka ilayn in dagaal-ooge kaliya wax la waydiiyo iyo in tirada la badiyo waxaa la qaataa in la badiyee. Marka mid baa noo furan oo ah inaan safaaradaha Itoobiya taageerno oo kuwa Kenya iyo Uganda kasoo horjeesano iyo inaan cagsigeeda samayno wax ka dhaxeeya ma leh. Marka magaalooyinka Soomaaliyeed waxaan ka codsanayaa inay sameeyaan muddaharaad lagu taageerayo in ergada shirka la badiyo. Waxaa jira geyi horay u taageeray qorshihii Zenawi marka iyaga hadda arrintaas ka fili maayo oo waxay la mid yihiin qolooyin (dad) uu ninni naga dalbaday inaan ka mid noqono maalin aan kaftamaynay. Wuxuu yiri waxaad gurada u saarantihiin baabuur nin waalan wado marka suga meeshuu idinku rogo oo afkiina haysta. In kastoo anigu shakhsiyan aan hadalkaas u diiday haddana arrintaas uu ku kaftamayey run bay u ekayd markaad aragto ummad dhan oo sidii la rabo laga yeelayo. Mar la yiraahdo Xabashi soo dhaweeya oo dumarkoodii u mashxaradaan. Mar la yiraahdo banaan-bax lagu taageero 15/09/03 baa la sameeyey. Waxaan aamminsanahay haddii dadkaas laga dalbo inay sameeyaan bannaan-bax lagu taageerayo bur-burkii shirka Mbagathi way usoo baxayaan.

Marka Soomaaliyeey arrimahaas yaan sahal loo qaadan ee saas aan ku dhaqaaqno. Horta anigu waxaan ka faa’iidaystay sheekada dhurwaaga laga sheego markuu ku dhaco dabin. Waxaa la yiraahdaa wuxuu fiiriyaa oo isu badshaa dhinaca qofkii yiraahda war ka daaya marka waxaan jalleecaynaa dhinaca IGAD ilayn qab-qab-qablayaashu ma ahan dad niyad loo hayee. Mararka qaarkood waxaad isleedahay dadkeena Soomaaliyeed miyaan duunyada ka liidannaa ama xittaa duur-joogta? Duur-joogtu mar kasta oo ay dugaag aragto waa ka diddaa, duunyaduna waa sidoo kale. Miyuusan hal-abuurkii Soomaaliyeed lahayn:

Marka ergooyinka iyo Soomaalida Kenya joogtaay ma 20 dhurwaa oo u shiraysa Maandeeq baad rabtaan inay godloto ood gaawe ka buuxisaan? Sida Somalidu u dhahaan markay ka hadlayaan qof cudurka “Aids” qaba wuxuu qabaa afartii xaraf marka hadda waxaan dagaal-oogayaasha u soo gaabinaynaa seddexdaas xaraf “WMD” marka qofkii taageera waa in la yiraahdo wuxuu taageeraa seddexdii xaraf.

Mahadsanid.

Copyright & Islaamku wuxuu ka qabo.... Akhri

C/Waaxid C/hi Khaliif
London, UK
cabdulwaxid@hotmail.com 

AFEEF: Aragtida qoraalkan waxaa leh qoraaga ku saxiixan

 Faafin: SomaliTalk.com |Jan 2, 2004

»C/waaxid oo Dafiray Beel Degta Puntland [DhegoCade]

 QORAALADII HORE EE CABDULWAAXID

Wada-shaqayntu Waa Furaha Guusha.. GUJI

BILICDA SOMALIYA
Luuq Ganaane, 1987
Waa wiil yar oo  Somaliyed oo nayl yar dhabta kuwata xilli nabadana dhexjooga Bilicda dhulka Soomaaliya. Akhri