|
Mudduloodoow Maxamed Dheere Mbagathi ku soo
celiya
 Cabdulwaaxid Khaliif
cabdulwaxid@hotmail.com
Ilaah baa mahadleh. Nabadegelyo iyo
naxariis Nabi Muxamed korkiisa ha ahaato.
“War yaa dhalay oo dhacsada”.
Horta bahasha siyaasaddaa waa munaafaqayn badantahay marka ninkaan haysan
dad la taliya ama aan markiisii hore maskax u dhalan kama bixi karo. Carabtu
waxay tiraahdaa “ziinatul mar’i caqluhu” waa meesha gabyaagii Soomaaliyeed
ka lahaa:
Maskaxdii Ilaah kuu gartaa
lagu macaashaaye.
Waxaan xassuustaa
dhallaanka Mudug oo dhaha baabuurkii taf-iyo-miriqa ahaa wuxuu haystaa
boolkii uu ku duuli lahaa laakiin waxaa ka maqan kuu ku soo degi lahaa.
Hadda “madaxweynahayagu”, waa kornayl C/hiye wuu haystaa awooddii uu
maan-gaab badan kusoo jiidan lahaa, ha ahaato mid lacageed ama mid
madax-qasbiba laakiin waxaa ka maqan inuu samaysto la-taliye waxgarad ah oo
uu maqlo waxa loo soo jeedinayo.
Been idiin ma sheegayo
haddii Muddulood ama qolyaha kale ee Xamar ay qabsanlahaayeen
dagaal-oogayaashooda, C/hi wuxuu noqon lahaa kalluun biyo laga soo saaray.
Waa tii loo oranjiray doontu biyo la’aan ma socoto. Mar kastoon damacno
inaan dagaal-oogahayagaas wax ka qabano waxaa nagu soo baxa dagaal-oogayaal
yar-yar oo Xamar ama Koonfurta kale ka soo qamaamay markaasaa la arkaa
isagoo madaxweyne laga dhigay. Haddaad C/hi madaxweyne ku sheegtid wuxuu ku
oran doolar sheego.
Yaa Maxamed Dheere Jowhar u
diray? Ma Muddulood? Maxamed Dheere wuxuu ku guulaysan waayey inuu qof
Puntland ka socda uu geeyo Jowhar. Hadday maqaalkan ka dib tagaan waa
maqasho kale laakiin Moorgan iyo Xasan Abshir oo aan waxba haysan xittaa
diide inay Jowhar tagaan. C/hi dad Muddulood ka socda ma geeyey Puntland?
Haddii Allpuntland la weydiin lahaa waa inkiri lahaayeen laakiin Hiloowle
Iimaan ma yahay Muddulood? Waa arkayseen in Moorgan, Mowliid Macaane iyo
C/hi dhaheen haddii tirada ergada la kordhiyo kama qaybgalayno shirka.
Qolyahayagaas marka laga reebo Mowliid macaane, Qanyare iyo Shaatiguduud
waxay muujiyeen reer magaalnimo ah in tartiib loo socdo laakiin ninkii
caddaystay in Jowhar loo soo dirsaday waa Maxamed Dheere. Yaa soo dirsaday?
Ma u malaynaysaan in Moorgan, Qanyare, Xasan Abshir, Shaatiguduud iyo
Mowliid Macaane cid diri karaan? Haddaan Maxamed Dheere lagu soo celin
Mbagathi waxaa dhab noqonaysa hadalkii kornaylka ee ahaa waxaan noqonayaa
ninka ugu dambeeya ee shirka ka baxa laakiin waxaan shakki ku jirin,
maskaxda ugu horraysa ee shirka ka baxda waa tan C/hi isagoo Maxamed Dheere
matalo oo uu yiraahdo anigu shirka kuma noqonayo. Taasi hadday dhacdo waxaa
dhacaysa in la yiraahdo shirkii 14-tobnaad ama tiraduu rabo siiye waxaa bur-buriyey
hogaamiyaasha Xamar. Haddaan Xamar u qoro waxaan noqonayaa siyaasi laakiin
dheh siyaasiyiinta Hawiye. Ilayn qof kasta waa ogyahay xiriirka Jowhar iyo
Xamar ka dhaxeeya.
C/hi maskax baa ku maqan
maxaa yeelay waxaa nala soo baray in mar doqon lagu yiri hal geel ah qaad oo
ay isa soo taagtay oo tiri ma qaadayo iyadoo laga rabay inay tiraahdo ma
qaadi karo. Marka kornaylku wakaa leh waxaan noqonayaa qofka ugu dambeeya ee
shirka ka baxa (waa Maandeeq ma qaadi karo) halka Maxamed Dheere dhabarka u
ritay oo uu leeyahay waxaan u qaadanayaa Jowhar oo kuma soo noqonayo
Mbagathi. Yaa mas’uuliyad intaas le’eg qaadan kara? Marka Mudduloodoow
haddaad talo yeelaysaan ninkaas Mbagathi ku soo cesha oo hadduu rabo
fikraddiisa ha dhiibto laakiin iyadoo ulo booc la isugu tukubayo, yeeysan
adinka idin eersan. Ama sidii dawacadu dufanka u marisay gorayada arrintu ha
noqoto. Ugu yaraan sida Qanyare ha u hadlo. Qanyare wuxuu dhahaa loo kala
tagi maayo, halkaan baa dowlad lagu dhisayaa laakiin ma dhaho Dayniilaan la
aadayaa.
Haddii Maxamed Dheere lasoo
cesho ama uu ku dhawaaqo inuu ka qaybgelayo shirka waxaan idin tusayaa
kornaylka oo horay usii booda. Marka kornaylkayagu waa shaagag la’yahee ha u
noqonina taayiro.
WQ. cabdulwaaxid Khaliif | cabdulwaxid@hotmail.com
AFEEF: Aragtida qoraalkan waxaa leh qoraaga ku
saxiixan
Faafin: SomaliTalk.com | Dec 30,
2003
»C/waaxid
oo Dafiray Beel Degta Puntland
[DhegoCade]
QORAALADII HORE EE CABDULWAAXID
Wada-shaqayntu
Waa Furaha Guusha.. GUJI
| 
