“Madaxweyne Rayaale Dadka Reer Somaliland kumay Dooran Dagaalyahannimo”

Xisbiga UDUB ayaa shalay war saxaafadeed uu kasoo saaray xafiiskiisa magaaalada hargeysa jawaab kaga bixiyay hadalkii uu dabayaaqadii todobaadkii ina dhaafay madaxweynaha Puntland C/laahi yuusuf oo ay waraysanaysay Idaacada BBC ku af lagaadeeyay Madaxweynaha Somaliland Daahir Rayaale Kaahin.

War saxaafadeedka uun soo saaray xisbiga UDUB oo uu ku saxeexan yahay xoghayaha Xisbigaa Maxamed Bulaale, wuxuu isagoo dhamays tiran u qornaa sidan: “Waxaan jeclahay inaan wax yar ka idhaahdo hadalkii ama badheedhihii C/laahi Yuusuf Axmed uu BBC-da ka sheegay iyo go’aankii rasmiga ahaa ee barlamaanka Somaliland uu ku ansixiyey sugida xuduudaha dalkan.

Madaxweyne Rayaale reer Somaliland kuma ay dooranin dagaal yahanimo iyo dad laysnimo ee waxa aanu ku dooranay in uu yahay madaxweynah Somaliland gudaheeda iyo darisyadeedaba nabad waarta iyo xasilooni ka samayn kara.

C.laahi yuusuf uma quudho in aan ku idhaahdo waxa aad ka timi Jirriban iyo Bali Busle, dhulka aad qaska dilka iyo qoriga ku haysataana waaGaroowe, Qardho iyo Boosaaso oo raga leh la yaqaano.

Ina Yuusuf waxa aan u sheegayaa dhulbahante iyo warsangeli in qolo iyo hartinimo wax ka dhow oo ka jifaysan ay reer Somaliland isu yihiin, waa isku naf nolosha ayaa ka dhexaysa, degaanka iyo daaqa ayaa ka dhexeeya, dalka ayaa ka dhexeeya, dawladnimada ayaa ka dhexaysa.

Dhulbahante iyo warsangeli waxaa hantida \ma guurtada ee ugu badan ku leeyihiin dhaqaalahooda iyo ganacsigooduna ku socdaa degenaantooda Somaliland sida magaalada Burco, Hargeysa iyo Boorama.

Dawladnimada JSL ma aha mid qori lagu xukumo, mid qolo gaar u leedahay ee waa dawladnimo la wada dhistay iyo xukumadeena la wada leeyahay .

Aad ayaan uga xumahay walaahi C/laahi yuusufow dhulbahante ma laha qiimaynta aad ka haysato ee ah inay yihiin ciidan siyaasada iyo kolba wax aad doonayso heegan u ah oo marka aad doonana majeerteen gudihiisa aad u adeegsanayso oo ku laynayso, marka aad doontana aad jamhuuriyada Somaliland ee ay ka mid yihin u adeegsan karto oo ka horkeeni karto, shaxdaasi C/laahiyow way kaa khaldan tahay ee dib ugu noqo.

Waxaan odhaahdayda ku soo murtiyeynayaa, go’aanka barlamaanka JSL ee xuduudaha dalka lagu sugayaa waa lagama moqdaan. Ciidamada JSL si nabadgelyo ah ayey ku tagayaan bixi ama yoocada qofba sida uu u yaqaano oo ah xadka JSL iyo somaliya kala sooco , iyagoo ku talo galay wixii gardaro ah ee ka horyimaada wiixi ay ka yeelayaan.

Xadku waa Bixi oo Garoowe u jirta 6Km:

Qaabka loo tagayo iyo meel marinta hawshaasi waxa bud dhige u ah talinaya ummada reer Sool ee dhulbahante”

abdifatah hassan   cabdifataax_96@hotmail.com

Faafin: SomaliTalk Jan 5, 2003

Afeef: Aragtida qoraalkan waxaa leh qoraag aku saxiixan