Degaanada Sool oo ah degaano ka nabad galay fitnadii iyo burburkii ku dhacay Soomaalida inteeda badan ayaa waxaa maanta soo waajahay xaalad adag oo ah dagaalka laga cabsi qabo in uu degaanadan ku dhex maro maamulada Somaliland iyo Puntland. Dagaalku sidiisaba waa arin aan fiicnayn oo aan faa’ido keenin. Inkasta oo taas la wada ogyahay hadana hadaad akhrido ama dhagaysto hadalada ka soo yeedhaya dhinacyada uu arinkani khuseeyo waxaa muuqata in ay isu diyaarinayaan in ay xalinta khilaafaadkan u maraan wado colaadeed. Baaqa dagaalka iyo is difaaca ayaad moodaa in uu ka dheereeyay baaqa nabada iyo wadahadalka. Sidaa daraadeed intaan dagaal la galin waxa haboon in la is waydiiyo su’aalo muhiim ah oo ay ka mid yihiin “dagaal haduu dhaco yaa ka faa’idaya? Yaase ku khasaaraya?. Xal aan dagaal ahayni se ma jiraa?. Waa suaalo muhiim ah laakiin ay yaraatay cid is waydiinaysaa. Waxgaradkii ay ahayd in ay jawaab u raadiyaan su’aalahan waxaa muuqata in ay in badani ku qanceen durbaanka colaaada iyo dagaalka. Hadaan Ilaahay si kale aanu u qadarin waxa ay saadaashu sheegaysaa in ay dhici karto in ciidamada is horfadhiyaa ay madaxa is galiyaan mustaqbalka dhaw. Waxaan markaa isku dayi in aan jawaab u raadiyo sua’aalahaa aan kor ku soo sheegay oo ay yaraatay cid ka jawaabaysaa.

Nabi Maxamed (csw) ciidankiisa ayuu la dardaarmi jiray ka hor intaanay fooda is darin ciidamada Gaalada. Wuxuu ku odhan jiray « ha jeclaysanina la kulanka cadawga…laakiin haday dhacdo in aan kulantaan sabra » . Markii aan iswaydiiyay xikmadda hadalakan nabigeena waxaa ii soo baxday in xikmada wayn ee hadalkaas nabigeenu(csw) xambaarsan ay tahay in dagaalku aanu ahayn wax fiican oo lagu degdego. Arinkaasi (in aanu dagaal faa’ido badn keenin) waa mid suggan oo ay cadaysay taariikhada bani’aadmigu. Daagaal bulsho wuxa uu u keenaa burbur, colaad iyo is nacayb waara. Dagaal xal ma keeno. Dagaalku haduu dhex maro dad Muslimiin ahna kaba sii daran, aduunka burbur buu u keeni, aakhirana cadaab kulul .

Mabda’aa guud hadaan ka gudubno dagaalka maanta ka dhaca mandaqadan dhibta uu keeni karo lama soo koobi karo laakiin waxaa ka midda:

Aragtidyadu kor bay ku caday oo waxa weeye dagaal faa’ido ma keeno. Sidaa oo ay tahay hadana dagaal kasta oo dhaca waxa dhici karta in uu dhinac ku adkaado. Hadaba haday dhacdo in labada dhinac midkood uu dagaalkan ku adkaado shaki la’aantii waxa ay u noqonaysaa dhinacaa guulaystay GUUL SIYAASADEED.

Dhinaca Somaliland hadii ay gaadhaan ujeedadii ay ka lahaayeen waxa ay noqonaysaa guul siyaasadeed oo wayn oo ku sii dhawaynaysa helitaankii ictiraafkii la raadianayay dhawr iyo tobankii sano ee tagay. Arinkani waxa ay suurtagalnimadiisu sii xoogsan hadii hadii ay qanciyaan beeelaha deeggan degaanadan la isku hayo. Taas oo suurta gal noqon karta marka aad eegto taariikhda cusub ee siyaasada Soomaalida. Hadii arinkani sidaas ku dhamaadona waxaan shaki lahyn in ay faa’ido u tahay Mr.Rayaale iyo xukuumadiisa iyo Xisbiga ay ka soo jeedaan.

Hadii dagaalkan ay caabiyaan ciidamada Somaliland amaba ay qabsadaan meelo kale oo aanay hore u haysan amaba uu daba dheeraado dagaalku waxa ay noqonaysaa Guul Siyaasadeed oo wayn oo nidaamka Putland u soo hoyata. Waxa intaa dheer in Mr. Cabdilaahi Yuusuf ay u noqon doonto guul siyaasadeed oo wayn, waxaanay dufcad siin doontaa doonista uu rabo in uu madaxwayne u noqdo dawlad Soomaaliyeed oo lagu soo dhiso Nayroobi.

Inkasta oo dhinac kastaba uu is tusi karo faa’idooyinkaa aan kor ku sheegay hadana aragtidayda dagaalkani xal ma u noqonayo mushkilada siyaasadeed ee mandaqadahan ka taagan. Dagaal faa’ido ma keeno ee taladaydu waxa weeye intiii laga hortagi karo ha la isku dayo in laga hortago.

Maqaaladayda waxaan isticmaalay “Somaliland” “Puntland”. Waxa laga yaabaa in dadka qaar ay dhibsadaan. Waa ay dhaci kartaa taas laakiin waxaan ku qanacsanahay marka la faalaynayo qadiyadaha siyaasda ee Soomaaliya in la ogaado magacyadani in ay ka mid noqdeen waaqica siyaasadeed ee Soomaalida. Faa’ida badanina kuma jirto in waaqicaa la iska indha tiro.

Siciid Cali Axmed
Saidahmed67@aol.com

Afeef: Aragtida qoraalkan waxaa leh qoraaga ku saxiixan

Faafin: SomaliTalk.com | Jan 26, 2004

QORAALADII HORE EE SACIID CALI
<><><>