HAMBAYO GABDHO ISASIINTII MINASOTO KA DHACDAY.

Qore: Cismaan C. Budeeye.
osma1211@hotmail.com

Daabaco Boggan | Print

Bismillah, walaalaha somalitalk.com maamula aadbaad u mahadsan tihiin sida wanaagsan ee aad bogaan u maaraysaan.
Kadib markaan akhriyey qoraaladii ku saabsanaa cinwaankaa kore, ayaan jeclaystay inaan qoraal gaaban ka qoro arintaa, waana sidaan:

Ku: SOOMAALIDA
Dhibabka bulsho ee nahaysta aadbay u badan yihiin, balse haddaan mawduuca ku ekaado, walaalayaal UGUURIYA GABDHIHIINA IYO WIILASHIINA QOF KASTA OO MUSLIM AH OO AAD RAALI KA NOQOTAAN DIINTIISA IYO AKHLAAQDIISA.
Wixii khalada oo ay awoowayaasheen noo soo gudbiyeen , oo aan garanay ilaahay mahaddi inay khalad yihiin , waa inaan joojinaa kana ilaalinaa inay caruurteena u gudubto.
Waxa KUFKA(isu qalmida) la yiraado micnaheedu waxaa weeye in qofka aad nolosha la wadaagayso uu yahay : muslim, diin leh oo dhaqan wanaagsan leh + in labada qof is arkaan oo wada hadlaan iskuna qancaan.Haba yaraatee diinteenu iyo caqliga wanaagsani midna ma ogala jajuub mana ogala takoorid dad muslima la takooro.

Ku: Ugaas Xaaji Muuse Cabdi Mire, Ilaahay dadaalkaaga ha kaa abaal mariyo, dhibka aad soo bandhigtay waa xaqiiq jidha, waxaana looga bixi karaa oo kaliya in dadku JAAHILNIMADA ka baxo.Cilmiga maadiga ahi qofka waa caawiyaa balse haduu shahaadada jaamacada ugu saraysa haysto,diinta islaamkase aan wax ka garanayn hadduu wax ka garanayana aan ku dhaqmayn waa jaahil, iskadaa warkiisa haddaba midaan cilmi diineed iyo mid maadi waxba ka garanayn .Ugaas Muse, xoog saar waxbarida iyo baraarujinta bulshadeena gudaha iyo dibadaba adoo ilaahay ajar ka dalbaya.

Ku :C/raxmaan Sh. Ismaaciil (Abu-turaabi), Ilaahay khayr ha kaa siiyo talaabadaad qaaday, ma filayo inay fudayd iyo caadhifad kaa ahayd, balse waxaan filayaa in caqli diin xambaarsan iyo wanaag alle kula doontay ay tahay. Dhallinyarada aad dhashayna dhallinyarada ay isu doonan yihiin waa inay is bartaan qanacna uu meesha yimaadaa, waayo dhallinyarada labada dhinacba xaqbay u leeyihiin inay guurka qofka la wadaagaya doortaan ama diidaan iyadoo aasaaska laga tusaale qaadanayo uu yahay diinta islaamka.

Gunaanad: Dhammaan walaalaha muslimiinta ah ee soomaaliyeed ilaahay dhab ahaan aan uga baqno, ha lagu dadaalo in la joojiyo hadda wixii ka danbeeya inay dhacdo in gabar iyo wiil soomaaliyeed oo guur xalaala doonaya in la`isu diido sabad takoorid ama qabiilkay ma tihid awgeed.Waxaan walaalaha soomaaliyeed si adag ugu dhiiragalin lahaa inay akhristaan labada buug ee la yiraado: Muslimada ku dayashada mudan(the ideal muslimah) oo gabdhaha loogu tala galay iyo (the ideal muslim) oo ragga loogu tala galay, waxaana la heli karaa ayagoo ingiriis ku qoran ama carabi.

Wabbillahi tawfiiq, wassalaamu calaykum.

Qore: Cismaan C. Budeeye.
osma1211@hotmail.com