Janaayo 13, 2004
Masjidow Xaal Qaado!
C/Rahman
Eelay
eediran@yahoo.com
Minneapolis, MN
Waxaa laga soo laabtay Shirkii qiimaha lahaa
ee ka dhacay Minneapolis, dadkuna waxay weli xusuusan yihiin sidii
wanaagsanayd ee uu shirkaasi isugu duba dhacay iyagoo khayr Eebe uga baryaya
dadkii isku soo duba riday iyo culumadii ka soo qaybgashay. Maalma ka dib
ayaa waxaa bilaabatay qabow ka daraa kii dhacayey maalmihii shirku socday.
Waxay ahayd maalin aad u qaboow oo ay dhacaysay dabeel la moodo inay
foodhinayso, dadka waxaa la moodayey in ay gashanaayeen wixii dhar ahaa oo ay
lahaayeen si ay isaga celiyaan qabowga xun ee dabeysha wata. Adigoo dhar
walba qaba ayaa haddana waxaa ku gariiraysa caloosha hoose oo waxaad
moodaysaa inaad murduq tahay oo aadan waxba gashanayn.
Waxay ahayd Makhrib waxaana dad badani ka
soo foofeen Carwada Al-Karama iyo agagaarkeeda si loo soo tukado.Waxaan ku
socdaa masaajidka Darul-Hijra ee ku yaala qorax ka soo baxa daaraha dhaadheer
ee ay Soomaalidu ku urursan tahay ee loo yaqaano Ceder. Anigoo is leh Allow
yaa mar keliya ku gaarsiiya afaafkiisa ayaa wuxuu saaxiibkey Maxamed igu
yidhi waar inakeen aanu aadnee Imamu Shaafici! Orod baanu ku dhaafnay
masjidkii Al-Hijra oo AAMIINTU ka dhacayso waxaanan u soconaa Imamu Shafici
oo ku yaala xagga Waqooyi galbeed ee daaraha dhaadheer. Anagoo aanan isla
hadlayn oo qaarkayaga hore dhulka u dhowyahay si aanu uga gabano qabowga
dhacaya ayaa waxaa naga hor yimid nin aanu saaxiiba ahayn oo aanaan sanooyin
is arag. Waaryaahee C/Rahman bal warran iyo nabad ka dib ayuu yidhi war baan
kuu hayaaye ina keen waxaan ku tukanaynaa Darul-Hijree. Anigoo meel aan
qabsado la’ ayaa Maxamed igu yidhi raac ninkan warka kuu haya anigaa kusoo
wacaya salaada ka dib, wax dhib ahna u arki mayo saaxiib.
Waan farxay waxaanan raacay Muuse oo aanu
galnay Masjidkii. Waxa ugu horeeya ee indhahaagu qabtaan markaad soo gashid
waa warqad weyn oo ay ku qoran yihiin: “ Fadlan demi telefoonkaaga (Mobil)”.
Salaadii intii lagu jiray oo uu imaamku Quraanka akhrinayo baa masjidkii isla
dhawaaqay: Dadku telefoono badanaa! Mid waliba si gooniya buu u ciyayey; mid
qaylo dheer, mid sida hoonka oo kale ah, mid aad moodo ziizow reefis u socda,
mid muusiko ka baxayso, mid wah-wah leh - cidiba ma dhega-dhegayn mana
indho-indhayn warqadii ogeysiiska ahayd!
Makhribkii laga soobax oo dibadaa loo soo
wada booday iyadoo wadaadkii uu ku qaylinayo waar iska demiya telefoonada
marka aad soo gelaysaan masjidka oo fadlan tixgeliya warqada ogeysiiska ah.
Ninba ceesaantii ceel keen, anigana keygii
baa sida orgidoo kale u qalaaday,uhuhuuuuuuu! Waan qabtay mise waa Maxamed!
Wuxuu I weydiiyey meesha aan joogo, markaasaan ugu jawaabay waxaan hor
taaganahay masjidka Odayaasha! Xaga sare baa laga yidhi Xataa Adigaa Shiikhow!
Geedaha dushooda iyo hareera eeg badan kadib
ayaan waxaan fahmay in sawaxanka iyo muusanawgu ka imanayo dubaalada sare ee
qiiqa siideysa ee masjidku leeyahay. Inta aan waxaan ku hadlo garan waayey
ayaa waxaan ku idhi Masjidow Xaal Qaado!.
Wuxuu igu soo celiyey waxaan la’ahay qof
iiga jawaaba su’aalahan anigoo weliba afhayeen u ah masaajido kale oo badan
oo ku yaal Magaalooyinkan Mataanaha ah ee wakhti ma ii haysaa? Waxaan u
sheegay in aan la taagnaan karin ee uu ku dhaqsado warkiisa. Wuxuu I
weydiiyey;
1. Waan ku arkayey sida ay Soomaali badanba
sameyso in aad I agmartay iyadoo la tukanayo makhribka oo aad u cararasay
masaajid iga durugsan ee maxaa dhacay?
2. Maxaa nalooga qadiyey ka qayb galkii
shirkii ka dhacay Minneapolis? Dadka nagu xiran Muslim maaha miyaa? Imaamyada
masaajideena miyaan la tixgelinayn?
3. Maxay Soomaalidu u midayn waayeen
masaajida oo ay ula mid dhigeen Xafiisyada Jaaliyadaha oo kale oo kabadan
30-meeyo iyagoo ku andacoonaya waxaanu u adeegnaa Soomaali?
4. Kaniisadaha wadankaniba iyagoon shaqo
isku lahayn oo caqiido ahaan iyo ficil ahaanba u kala durugsan bay mid
yihiine maxaa idinka idinku dhacay?
5. Waxaad ogtahay in Kaniisad walba dad
gooniya ay aadaan oo ay ka tirsan yihiin maxaad Masaajida Eebe u oranaysaan
waa kii Xerta, kii Odayaasha kii Ikhwaanka, kii Suufiyada, kii Islaaxa iwm?
6. Waxaad isku haysaan wax aan naf lahayn oo
aad ku kala tagteen idinkoo iloobay in isku duubnaanta iyo danta guud ee
ummadu ay wax walba ka horeyso. Maxaa idinku dhacay oo aad u midoobi weydeen?
7. Maxaaaaaaaaaaaaaaaaaa? Maxaaaaaaaaaaaaa
Hoogiinee Cakuye, Caku idinkee, Caku idinkee!!! Masaajidkii baa bururay oo
oohin ishayn waayey!
Anigii baa anfariir iyo cabsi awgeed buuro
halkan oo baraf ah isku qaaday si aan u baxsado anigoo ku dhawaaqaya Masjidow
Xaal Qaado, Masjidow Xaal Qaado!
Iyadoo meel waliba ay I cas tahay baan dalaq
idhi carwada ku dhow Masjidkaa ee Al-Karama ee uu maamulo ganacsade Maxamed
Kaynaan. Hiinraageygii baa dadkii meesha joogay la yaabeen waxayna u qaateen
in aan awood dareeyey oo qabowgu iga batay. Saaxiibkey aanu isku Baydhabo
ahayn-Shiino-ayaa igula kaftamay: “ Eelaayow waxaa kaa daba timid da’ oo
waxaad noqotay HIGH MILEAGE miyaa” waan iska aamusay, oo ma anigaaba hadli
kara!
Sidii maalintaa waxaan aad u jeclaan lahaa
in aan arko masaajidada oo isu yimaada oo sameysta xiriir wanaagsan si dadkan
kala qaybsan ay xoogooda u mideeyaan. Waxaan is leeyahay haddii dhamaan
masaajidada ku yaala magaala walba oo Waqooyiga Ameerika ahi ay midoobi
lahaayeen in la waayi lahaa meel dadka lakala dhigo iyo meel deeqda marka
shir laysugu yimaado sida kii hore oo kale. Masaajid walba waxaa ka socda
kheyr fara badan: Qaar baa dugsiya sare maamula, qaar baa haya kumanaan
carruur ah oo dugsi u dhiga, Qaar baa Ingiriisiga dadka waaweyn bara, Qaar
baa xabsiyada booqda oo wax ka dhiga, Qaar baa…..
Bal ka warran akhristow haddii ay dhamaan
xoogooda isu geyn lahaayeen oo iska daayaan eedeymaha yar-yar ee ay kala
tirsanayaan!
Waxaan filayaa in Masjidku yahay Gurigii
Eebe oo uusan u muuqan in la kala leeyahay, dadkuna aysan u muuqan sidii
iyagoo ku wareeray meeshii ay raaci lahaayeen. Fadlan isu tashada, is
ogolaada oo midooba oo arrintu yaysan noqon.
XAGA MASJID XAGANA MASJID, MASLAXA WALAC!
C/Rahman Eelay
eediran@yahoo.com
Afeef: Aragtida qoraalkan waxaa leh qoraaga
ku saxiixan
Faafin: SomaliTalk Jan 13, 2003
...QORAALADA
DADWEYNAHA EE MAANTA:
<><>....
Copyright
& Islaamku wuxuu ka qabo.... Akhri
Kulaabo bogga hore ee www.somalitalk.com
|