“WAA ISKA CADDAHAY INUU CABDULLAAHI YUUSUF DILEY SULDAAN AXMED MAXAMUUD MAXAMED “HURRE”, Sidaas waxaa yiri Janan Cadde Muuse Xirsi Boqor.

Daabaco Boggan | Print   Bidix ka bilow: Mauulid Man, Abdullahi Yussuf, Abdukassim Salat Hassan, Hussein Aided (Sawirka AFP) Abdiqassim Salad Hassan, iyo Abdullahi Yusouf Ahmed oo gacanta is haysta, kulankii Nairobi ee  January 9, 2004 (Sawirka: Reuters) WARBIXIN: SHIRKII 9/1/4 ee SOOMAALIDA LOOGU QABTAY NBI

Shir ka dhacay Hotel Britain ee ku yaal waqooyiga London 5tii Jannaayo 2004 ayaa waxaa ka qaybgalay xubno ka tirsan jaaliyadda Jeeska Maxamed Cumar ee Jifida Cumar Maxamuud, Suldaan Axmedna ka dhashay iyo Janan Cadde Muuse Xirsi oo booqasho gaaban ku yimid London asagoo u sii jeeda Canada. Kulanka waxaa jananka ka dalbaday odayaasha Maxamed Cumar. Waxaa kaloo shirkaas goobjoog ka ahaa odayaal ka tirsan jaaliyadda Jifida Cismaan Maxamuud oo uu ka dhashay jananku.

Sida la wada ogyahay, jananku wuxuu bilihii la soo dhaafay ku lug lahaa hawlo loogu magacdaray nabadaynta Puntland. Waxaannu jananka ka dalabnahy bal inuu warbixin naga siiyo kiiskii dilkii Suldaan Hurre oo uu muddo ku jeebnaa.

Ka sokow dagaalkii lagu hoobtay oo ay kala hoggaaminayeen jananka iyo kornayl Cabdullaahi Yuusuf iyo heshiiskii ka dambeeyey ee Boosaaso ku dhexmaray labada ex sarkaal, wuxuu jananku sheegay in dilkii Suldaan Hurre uu noqday caqabad 2aad oo uga sii qallafsanaatey tan hore ayna xal u la’yihiin ilaa hadda. Gaar ahaan wuxuu janan Cadde qiray in kiiskani iyo sidoo kale dilkii Faarax Dheere ay yihyiin dhibaatada ugu shiddada badan oo waqtigaan haysata Cabdullaahi Yuusuf taasoo uu dhanna uga riiqan la’yahay meeshuu tagana horyaal.

Jananku wuxuu sheegay inuu labo goor la kulmay waxgaradka jeeska Maxamed Cumar asagoo isku dayey in kiiskaas xal loo helo hase yeeshee aan midna lagu guulaysan. 22kii Octoobar 2003 ayaa waxaa ayaguna isku dayey qaar ka mid ah Isimmada Bahda Maxamuud Saleebaan ayna ka mid ahaayeen Boqor Maxamuud Boqor Muuse, Islaan Maxamed Islaan Muuse, Suldaan Siciid M Garaase iyo Garaad Maxamuud Cilmi Shirwac kuwaasoo hawsha ku galay u yeerid Cabdullaahi Yuusuf hase yeeshee aan Maxamed Cumar lagala tashan xulka cidda loo yeerayo, ajendada ama qodobbada kulanka iyo halka lagu galayo midna. Guddi ka kooban 15 xubnood oo jeeska Maxamed Cumar u qaabbilsan murugadaas xanuunka badan ayaa gaashaanka ku dhuftay kulankaas ayagoo ku diidey sababaha kore ka sokow:

1. in Cabdulaahi Yuusuf iyo jeeska uu ka dhashay aysan qirsanayn dilkii Suldaanka ilaa hadda saas darteedna aannu kulankaas u aragnay mid waqti lumis noo ah una danaynaya kornaylka oo kaliya (si uusan kiisku uga carqaladayn damaciisa siyaasadeed iyo in laga reebo kiiska uga furan Maxkamadaha London). Sida la ogyahay, kornaylka cadaadis (pressure) adag oo la xiriira dilkii uu u geystay Suldaanka ayaa ka haysta gudaha Soomaaliya iyo dibeddaba.

2. in hawshaani ay tahay mid ay leeyihiin Golaha Isimmada Puntaland, Darood ama Soomaaliyeed

3. in aysan Maxamed Cumar aqbali arin in uu Bashiir Islaan Cabdille uga qaybgalo kiiskan Isim Cumar Maxamuud ahaan

Mar jananka la waydiiyey su’aal ahayd: yaad u aanaynaysaa dilkii Suldaanka? Wuxuu ku jawaabay: “waa iska caddahay inuu Cabdullaahi Yuusuf diley Suldaan Axmed Hurre”. Su’aal ahayd maxaa u sabab ah xal u helid la’aanta arrintaasna wuxuu jananku ku tilmaamay labo arrimood oo kala ah:

Dhibaatadaas culus oo haysatey darted wuxuu kornaylku si xun (disparately) ugu baahnaa waji cusub oo bulshada Puntland ka haysta qaddarin iyo xurmo ka badan tan uu isagu ka haysto. Wajigaas cusubi wuxuu noqday saaxiibtinnimada janan Cadde oo xilliguna saacidey maadaama ay ku soo beegantay waqti ay kala daadatay Puntland dadweynuhuna ay u baahnaayeen cid ugu yaboohda nabad taasoo u ekaatay heshiiskii labada nin ee Boosaaso 17kii Maajo 2003kii.

Intaa ka dib, warbixintii Cadde Muuse iyo jawaabihii su’aalihii laga waydiiyey mowduucii kulanka waxaa ka mid ahaa:

i. waa iska caddahay inuu Cabdullaahi Yuusuf diley Suldaanka

ii. baabuurtii ay saarnaayeen nimankii toogtay Suldaanku iskama tegi karaan haddii uusan amrin ninka wata ciidanka

iii. labadii dhibaato ee Puntland haystey waxay ahaayeen tii nabadaynta iyo tii dilkii Hurre waxaana sii cuslayd tii dilkii Hurre

iv. Maxamed Cumar wax kasta way diideen

v. Maxamed Cumar waa is khilaafsan yahay maadaama qaar ka mid ahi ay la shaqaynayey Cabdullaahi Yuusuf

vi. Cabdullaahi Yuusuf wuxuu keenay 9 nin oo ka mid ahaa nimankii saarnaa 2dii baabuur oo gadaal ugu noqotay markii ay is dabamareen Suldaankii, si ay ugala soo baxaan gacan ku dhiiglihii, hase yeeshee M C waxay taas u arkeen khiyaamo

vii. Nimankii mid waa dhintay midna shaqadii ayuu ka tegey

viii. Waxaa laysku dayey in si gaar ah loola xaaltamo jifidii hoose ee Suldaanka

ix. Salaaddiinta waxaa u yeeray C/llaahi Yuusuf, Maxamed Cumarna ayaga ayaa u yeeray

x. Suldaan Hurre kama dhiman Maxamed Cumar ee wuxuu ahaa nin qaran oo qaali ah kana dhintay Puntland iyo Somalia.

Qodobbada kore waxaa ka mid ah kuwo is burinaya lambarrada i, ii, iyo vi; iv iyo v; viii iyo x; j3 iyo j5 iyo kuwo meel ka dhac aan la qaadan karin ku ah Jeeska Maxamed Cumar sida lambar VIII.

S1: Adiga yaa kuu dirsaday gelitaanka howsha, ma Cabdullaahi Yuusuf mise iskaa ayaad u gashay?

J1: Cabdullaahi Yuusuf iima dirsan ee anigaa iskay u galay

Suldaanku kama dhiman M C kaliya ee wuxuu ahaa nin qaran oo ka dhintay reer Puntland oo dhan

S2: haddii uu marxuumku ahaa nin qaran ama ka dhintay Puntland oo dhan, maxay ku dhacday in aad xallinta kiiska dilkiisii dib ugula soo noqotaan jeeska Maxamed Cumar ama kaba darane qoys hoosaadkii uu ka dhashay marxuumku halkii aad xalka ka dooni lahaydeen heer Puntland iyo goleyaasheeda waaweyn sida golaha Isimmada?

J2: dilkii Suldaanka waxaa ka xumaaday ilaa haddana ka xun qaybaha bulshada oo dhan sida Aqoonyahannada, Salaaddiinta iyo waxgaradka kale waxaana looga hadlaa dhammaan golayaasha laysugu yimaado. Aniga wuxuu ahaa saaxiibkay.

S3: Maadaama aad sidaas xog-ogaal ugu noqotay in C/llaahi Yuusuf uu si buuxda u leeyahay mas’uuliyadda dilkii Suldaan Axmed Hurre, ma naga oggolaanaysaa in aannu kugu darsanno liiska markhaatiyaasha aannu dhowaan gaynaynno maxkamadda London oo dacwadu uga furan tahay kornaylka, haddii Allaah idmo?

J3: Anigu markhaati noqon maayo (wuxuu ku jawaabey si degdeg iyo caro ka muuqato ayuu)

Haddii uusan ka dhiman MC kaliya ee uu ka dhintay reer Puntland oo dhan, maxaad xalka kiiska uga raadin waydeen heer Puntland oo aad hoos ugula soo noqoteen Maxamed Cumar ama jifi hoosaadkii uu ka dhashay?

S4: Maadaama uu C/llahi yuusuf goob kasta ku diidey qirashadii dilkii Suldaanka, ma kula tahay in uu sidaas u yeelayo haddii uu qirto inuu ka cabsanayo in ay ku noqoto fadeexo (scandal) uuna ku waayo hankiisa kursiga madaxtinnimo ee Soomaaliya saas darteedna uu door biday inkiraad cad?

J4: Janan cadde wuu ka gaabsaday jawaabtii su’aashaas

S5: Maadaama aad kornaylka hadda isu dhowdihiin siyaasad ahaan, ma ogaatay, haddiiba ay jiraan, waxa uu rabo inuu ka dhigo xal looga dawoobo dhacdadaan?

J5: Cabdullaahi Yuusuf hadda wax kasta wuu oggolyahay haddii lagala xaaltamo arrintaan oo aan ka ahayn qirashada dilka Suldaanka, metel, waxaa la soo qaaday 1200 oo Geel ah, shashafadii iyo wixii kale oo soo raaca taasoo la mid ah sidii looga xaalay Ugaaskii Marreexaan

Gabogabo: Odayaasha Maxamed Cumar waxay jananka waydiisteen:

1 – in uu kiiska iska taago dhanka toosan una hiilliyo caddaaladda, ama

2 – in uu ka gaabsado wixii hadda ka dambeeya.

Maxamed Shiikh M Xirsi

xumbul@hotmail.com

Afeef: Aragtida qoraalkan waxaa leh qoraaga ku saxiixan

<><>.... Copyright & Islaamku wuxuu ka qabo.... Akhri

Kulaabo bogga hore ee www.somalitalk.com