Xabaasha Qaranka Soomaaliyeed
Dr. Saciid Ciise
USA
Saciidciise258@aol.com
Shirka Mbagathi ee ka socda Kenya waa meel lagu qaban qaabinayo aasida
qaranka Soomaalida. Duugtana waxaa maalgelinaya ururo ku soo dhexdhuuntay
deeqbixiyeyaasha. Kiplagat oo soo xulaya dadka Soomaaliyeed oo gacantooda
ku qodi lahaa qabriga lagu duugi lahaa qaranimadii dalkooda. Ethiopia oo
soo magacaabeysa musharaxa iilka gelin lahaa Soomaaliya, iyo Jabuuti oo
indhaheeda siinweysey in walaalkeeda Soomaaliya meesha lagu gowracayo ay
goobjoog ka noqoto.
Kiplagat oo ah ninka sida rasmigaa loogu qorsheeyey inuu ahaado
madaxweynaha Soomaaliya xiliga kala guurkaa ayaa gacanta ku haya qorshe
dhameystiran. Wuxuuna koox walba u agaasimay dabin uu ku soo xerogashado,
ugana xusho siyaasiyiinta labawajiileyaashaa oo soo qiyaamay wacadkii ay
la soo galeen saxiibadooda ay isku mabda’ ahaayeen. Axdiga lagu muransan
yahay maxaa diidey in loo daayo iney dhameystiraan mudanayaasha
barlamaanka la soo dhiso doono? Maalgelinta Kiplagat uu manta u raadinayo
dowlada la soo dhisi doono miyeysan muujineyn in xilkiisu uu sii soconayo
xataa dhismaha dowladnimada kadib. Waxaa la arki jirey marka la dhisayo
dowlad in loo sii diyaariyo aqoonsi, dowladaasna ay wadato wixii
danaheeda. Laakiin shaxda Kiplagat waa ay ka duwan tahay sidaas. Waxaana
la soo hormariyey dhaqaale raadin ujeedadeedu tahay in lagu fuliyo nidaam
maxmiyada oo tirtira jiritaanka Soomaalida, arrintaas oo loo kireysanayo
goleyaal loo tebinayo xeelado siyaasadeed oo dheefraac ku dhisan.
Waxaa muuqata in xubnaha loogu tala galay in loo xulo baarlamaanka ay
noqonayaan kuwo aqoontooda iyo tayadooda aysan gaarsiisneyn iney
siyaasada wakiil ugu noqdaan ummadda Soomaalida. Waana taas mida keentay
inaan iyaga dib loogu dhigin axdiyada uu ka taagan yahay muranku,
maadaama ay ku tahay howl culus oo aysan lahayn xirfadeeda. Miisaanka
mudanyaasha oo aan cusleyn ayaa macneyneysa in loo soo diyaariyo xeer
dhameysan oo aan dib ugu noqosho lahayn. Xeerarkaas qaldan oo laga
ansixiyey mudanayaasha la soo xulayo ayaa ah furihii soo dedijineysey
qodida xabaasha la gelin lahaa qaranka Soomaalida.
Nin aaminsan inuu Tigrey madaxweyne ka dhigi karo, 30 sannana u
adeegayey dalka Ethiopia oo ah cadowga ugu weyna ee uu leeyahay dalka
Soomaaliya, ayaa horseed u ah siyaasada lagu xabaalayo magaca qaranka
Soomaaliyeed oo badda ummada lagu laqsiinayo. Ninkaas waayeelkaa oo uu
hankiisu circa geeyey waxaa meel dheer uga muuqda riyada uu ku doonayo
inuu Tigrey Xamar keeno, si ummadda Soomaaliyeed badda loogu shubo.
Waxaan shaki lahayn inuusan ninkaas aaminsaneyn nidaam dimoqaraadiya oo
ummadda doorashadeeda loogu baahan yahay. Waxaa u qorsheysan qofkaas inuu
qabyaalada u adeegsado sidii u been been koox qabqablayaala ugu soo xero
gashan lahaa si uu u gaaro degaanada uu la damacsan yahay dibindaabyada.
Magacaabista ninkaas ay Tigreydu u soo doortay Soomaalida waa siyaasadii
ugu casrisiyeesneyd oo nin madax u yaal Soomaaliya uu ku tirtiri lahaa
madaxbanaanida dalka Soomaaliyeed.
Jabuuti oo ka dheregsan siyaasada ka socota Mbagathi waa ay u
suurtoobi weysey iney Kenya iyo Ethiopia culaab u dhiganta miisaankooda
kala hor timaado. Waxaana u muuqatay in lagu quursaday doorkeeda
dhexdhexaadnimada ku dhisan. Meeshii ay u ololeyn lahayd in shirka loo
dalal badsado oo lagu soo daro Suudaan iyo Uganada ayey kawaanka u
baneysay si ay indhaha uga dadabto dhiiga Soomaaliyeed ee lagu
damaashaadayo gunaanadka shirka. Waxaa Jabuuti wajigabax ku noqtay iney
goobjoog ka noqoto lana qeybsadaan dareenka yaxyaxnimada leh ee uu nin
soomaaliyeed ninka walaalkiisa qoortiisa ugu dhiibayo Tigrey uuna ku
diirsanayo damaashaadka dhiiga walaalkiis.
Dr. Saciid Ciise
USA
Saciidciise258@aol.com
QORAALADII HORFE EE DR. SACIID
Faafin: SomaliTalk.com | September 28, 2003
Afeef: Aragtida qoraalkan waa mid u gaar ah qoraaga ku saxiixan
.. WARAYSIGII ABDULLAHI
NUUR SALXAAN UU SIIYEY SOMALITALK
..
FOGAANTA U DHEXAYSA MAGAALOOYINKA SOOMAALIYA....
....
Copyright & Islaamku wuxuu ka qabo.... Akhri
Kulaabo bogga hore ee
www.somalitalk.com
|