Gabaygan waxa curiyey Khadar Cabdillaahi Badeed, waxanu kaga jawaabayey gabay uu Maxamed Xirsi Guuleed tiriyey oo uu ku magacaabay Layga sugi maayo. Wuxu yidhi:

1. Same ina xirsaw max/edow midhaha suugaanta
2. Adigaa ilaah kuu sakhiray kala sifayantiiye
3. Inta lagu sarriigtee xushmada lagu sabaaleeyo
4. Siinadeeda adaa max/edow saatir kaa dhigaye
5. Sadex erey ayaan kula damcee saani u dhagayso

6. Waxa gaalku saanyaday inaad suuqa ku mushaaxdo
7. Iyo tay inaad sudhata ood sawir xumaan qaado
8. Suudh laysku dhuujinahayiyo weelka saqajaanka
9. Sida aad u tidhi weeye oo yaan lagaa sugine

10. Siliciyo maryaadkiyo waxaa saaka ina haysta
11. Sabadii udgoonayd waxaa salawgu aafeeyay
12. Magaceeni soomaaliyeed cidiba soo qaadin
13. Sumcaddeeni waxa saa u galee sabanka waydaarshay
14. Sannaceena weeyaan haddaan lays sasabahayne
15. Anigaa sideeriyo anaa kaa sinjiyad fiican
16. Sannahaabadeedaan khalqigu kuba salaamayne
17. Sida aad u tidhi weeye oo yaan lagaa sugine

18. Dalka siman intaad sheegatee sahu ku qaadsiiyay
19. Inta sugan inaad leedehee soohdin lagu jeexay
20. Iyo qayba aad seegtayoo sayma lagu ooday
21. Ee sadarku kaa dhaafayee sida turaabkaasa
22. Seddexdaba adaa loo raxmaan seeska kuu dhigaye
23. Ha yeeshee ragbaa saxal qaboo seegay hilinkaase
24. In siday rabaan loo sir-siro waa midnimo seege
25. Allaylehe sidaad tidhi ayaan taa lagaa sugine

26. Soddohaad tilmaantee ka tagay sabada baydkooda
27. Sahankoodi ceebuu ku dhacay sabadh-xumaantiiye
28. Sedkii eebeheen siiyaybay badi saluugeene
29. Doqontaba cadkii loo suntee ciidda lagu saydhay
30. Garan wayday sida loo galoo seegtay marinkiiye
31. Waa dhabe hadday saa yihiin yaan lagaa sugine

32. Kuwa saawa-saawaha la baday laga sad roonaaye
33. Kuwa salabka lagu tiiriyee laga san taagaayo
34. Iyagays dulleeyee sarkaal kuma safaadeene
35. Sandulaynta waad necebtehee yaan lagaa sugine

36. Ina walan-wal murtiduu salimay uu sahra u dhiibay
37. Sirta nolosha weeyoo runbay sees ku leedahaye
38. Adiguna sarreeyow dhabii saani ugu toostay
39. Hilinkaa saxdaabaa naflaa saami loo dhigaye
40. Surmaseegto layskuma ogee yaan lagaa sugine

41. Intaasoo sifaa raganimaad siinka ka cadaysay
42. Iyadoo siday tahay dhamaan saalim laga yeelay
43. Waxa jira midaad seegtayoo nala sugnaan wayday
44. Waa sulubka reenkiyo fardaa salaw dhaqaaqooda
45. In la qaato saymaa markay seeftu libin keento
46. Salaamaade warankiyo ridada sumuca wiidiisa
47. Kaaraa silsiladiisa iyo beebe iyo suuga
48. Kuwa samada heehaaba ee soo ganbiya hawda
49. Gumucyada sabeeyiyo birtiyo soodhka iyo teeri
50. sabaraynka laysula bixiyo seefta halacdeeda
51. inta lagu samaadee midnimo lagu saraysiiyo
52. ee salawga maadhiin yaruu sugo hanaankeeda
53. sunta baase maajeenta iyo beerray kala soocin
54. bal ogow ragbaa loo suntoo loona soo rogaye

55. xabbadana marbaa saxalka jira lagu sanceeyaaye
56. nabadduna marbay sahayataa kuman samaanoode
57. mabda,aagu saran-seer haddaan gacani suurayne
58. hadday dunidu sida dooratoo suluxba loo diiday
59. sinba-dhigadaka waayaa haddii lagu san-saan gooyay
60. lagu seexan maayoo sunnaa meel la sii dhigaye
61. ma cirkaad salaan dhigan arligan samaha loo diidye
62. saymaha ku daashaday sardhada sumucu kaa jiidhay
63. sifeheena weeyaan inaad selesho dhawr jeere
64. waaba lagula saayiray haddaan seeme kula haadin
65. sabo nabada dumar iyo dhalaan sogobka waayeelay
66. saddexdaa ayaa loo ogaa inay ku seexdaane
67. hadal soo dhawayntaa wax badan lagaga soortaaye
68. inlagaa sugaabaan jeclahay ereyga aad seegtay

khadar c/laahi badeed

04/10/2003

Hargaysa

• I  I  D  H  E  H

  GUJI HALKAN.......

   GABAYGAN KALA XIRIIR: abdibashir@hotmail.com

 

Afeef: Fikradda qoraalkan waxaa leh qoraaga ku saxiixan

Faafin: SomaliTalk.com | Oct 22, 2003  
 

.. FOGAANTA U DHEXAYSA MAGAALOOYINKA SOOMAALIYA....

Copyright & Islaamku wuxuu ka qabo.... Akhri

114 Suuradood ee Qur'aanka

 .... Copyright & Islaamku wuxuu ka qabo.... Akhri

Kulaabo bogga hore ee  www.somalitalk.com