|
90 Soomaali ah ayaa ku Dhimatay Xeebta Talyaaniga ee
Lampedusa.
“INNAA LILLAAHI WA INNAA ILEYHI RAAJICUUN”
Khalid X. Cali Maalin “Deble”
SomaliTalk.com
amalroma@hotmail.com
Oct 20, 2003
Dadkii ka badbaaday Doonta Magacyadooda...
Ka akhri halkan... Guji
 Warar
laga soo xigtay hay’adda wararka faafisa ee dalka talyaaniga oo marka la soo
gaabiyo loo yaqaano ANSA ayaa sheegtay in laga helay 14 Soomaali ah meedkooda
Doon xalay saqdii dhexe laga soo jiiday Xeebta Magaalada Lampedusa, nasiib
wanaagse mid ka mid ah meedadkaas ayaa weli NAFTII ku jirtay, taas oo aheyd
haweeney.
Haddaba Doonta xalay ku soo xiratay Xeebta Lampedusa ayaa
dhererkeedu ahaa 12m, waxaana xalay (oct 20, 2003) saacaddu markey 08:50
habeenimo ku soo arkay Badweynta Talyaaniga iyadoo dhex dulsabeyneysa koox
malaay dabato ah oo u fidiyay gargaarkii ugu horeeyay, kuna wargeliyay Ciidanka
Badda ee Talyaaniga in Doontaas gargaar deg-deg ah lala soo gaaro.
Ka dib dekedda Lampedusa waxaa ka baxay laba doon oo gargaarka
deg-degga ah & markab ay lee yihiin Ciidanka Ilaalada Badda ee Talyaaniga si
loogu soo daad gureeyo dhibane-yaashaas, waxayse la kulmeen wax aysan rumeysan
kareynin ama aysan fileynin.
 Doontan
ayaa waxaa saarnaa 14 Soomaali oo naftoodii qaba & haweeneyda Soomaaliyeed oo
lagu qiyaasay inay dhimatay Ilaahey dartiisna ay nooleed. Marka dadka la
xaqiijiyay inay ka badbaadeen Masiibadan ayaa ah 15 Soomaali ah.
Captanka Doonta malaay Dabatada oo la yiraahdo Stefano Vafrè
wuxuu sheegay “Markii aan ka soo ag dhawaaney Doontan oo la mooday inay Firaaqo
tahay, waan qarrac mannay, dabadeedna waxaan la xiriirnay Ciidanka badda si
loogu soo gurmado”
Kaptanka isagoo hadalkiisa sii wata waxaa uu yiri “ Waxaan isku
daynay inaan si fiican uugu soo dhawaanno Doonta yar ay saarnaayeen Qaxootiga
Sooomaalia, laakiin waxaan halis ku geli laheyn inaan ku dhacno, ka dibna aan
sababno gaddoomisteeda, markaas waxaan bilaawnay inaan u tuurno Cabitaan &
Rooti si ay uugu sii meel gaaraan”
 Kaptan
Stefano Vafrè oo weli ka naxsan waxaa uu indhihiisa ku arkay, Codkiisana laga
dareemayay qaracanka uu la kulmay ayaa hadalkiisa ku soo gabagabeeyay sidatan”
Waxaa inoo suurto geli weyday inaan maqalno codkooda, maadaama uu Motorka
doonteena kacsanaa, waxaan arkeynay oo kaliya Kor Bani’Adam oo qalfoof u
ekaaday, wejiyadoodana Cabsi daran ayaa ka muuqatay, waxayna laalaadinayeen
gacmahooda, si aan uugu gargaarno, Masiibadan maaha mid aan si sahlan ku iloobi
doonno inta aan dunidan ku nool nahay”
Haddaba dadkii ka badbaaday Musiibadan mucjisada ku noqotay
dhammaan ummadda Soomaaliyeed ayaa sheegay inay ka soo furteen xeeb ku taalla
dalka Libiya, taariikhdu markey aheyd 3-0ct-2003, doontan oo dhererkeedu yahay
12 meter, ayay sheegeen inay ku saarnaayeen in lagu qiyaasay 105 Soomaali ah,
Nasiib darose waxay sheegeen inay ku lumeen badda, ka dibna uu ka go’ay
shidaalkii & jiscinkii yaraa ay wateen, 17-kan beri ay ku soo jireen Tahriibkan
Naxdinta leh, waxaa ku dhintay Doontan dhexdeeda 78 ruux, waxaana qasab ku
noqotay inay badda ku tuuraan walaalahoodii ay Tahriibkan isla soo galeen.
Dadkani ka badbaaday Masiibadan ayaa la sheegayaa inuu Caafimaadkoodu liito,
hadalkana uu dhibayo, illaa & haddana ay la amakaaksan yihiin safarkii ay soo
galeen. Dhibanayaashan ayaa sheegay inay waayeen Awood ay ku tuuraan meedadka
doonta saarnaa, maadaama ay horay u tuureen meedadkii kale.
 Haddaba
ciidanka Aminiga & kuwa badda-ba ee Talyaaniga ayaa sheegaya in ay ku jiraan
sidii ay u xaqiijin lahaayeen hadalada naxdinta leh ay soo bandhigeen dadkan,
waxayna ka codsadeen in hay’adaha madaxa bannaan ee wararka fididiya inaysan
shaacin warar aan sugneyn illaa & hadda ayna ka Taxadiraan bandhigista
wararkooda.
Masiibadan maaha tii ugu horeysay ee dhacday xilliyadan, waxaa maalintii
Jimcaha ku soo xiratay isla dekedda Lampedusa DOON aad u yareyd oo siday 35
Soomaali ah, waxaana ku dhintay 10 Soomaali ah, seddex ka mid ahna waxay
ahaayeen Caruur.
Caruurtaasi waxaa dhalay Nin magaciisa lagu soo gaabiyay Faarax oo sheegay
in Doontaas ay ku soo raaceen dhammaan Qoyskiisa oo ka kooban 4 caruur ah &
Xaaskiisa. Qiisada Dhibane Faarax ayaa lagu soo saaray Wargeyska ugu caansan
dalkan Talyaaniga La Repubblica, waxayna Qisadiisa murug ku abuurtay
idil ahaan-ba dadkii aqristay. Faarax wuxuu sheegay in Wiilkiisa Khalid oo 3
jir ah & Gabadhiisa Ayaan 1 sano jir ah, ay ku naf waayeen Badweynta dhexdeeda,
maadaama aysan jirin wax ay cunaan, naaskii Hooyadoodna uusan laheyn dhibic
caano ah, ka dib Dhibane Faarax waxaa la soo gudboonaatay arin fool xun oo ah
isaga ku tuuro Caruurtiisa Badweynta si ay iyagana safarkooda u sii wataan.
 Dhibane
Faarax markii uu qisadan sheegayay aad & aad ayuu u jareeynayay, isagoo
ilmaynayana wuxuu sheegay, in Gabadhiisa Seynab 13 jir ah, ay badda ku dhacday,
ka dib markii ay dadkii Doonta saarnaa ay arkeen inay soo galeen Dekedda
Lampedusa ay bilaabeen farxad darteed boodbood & qeylo, taasna ay sababtay inay
doontu roganto ayna ku nafweydo gabadhiisa Seynab.
Dhibane Faarax saacado ka dib wuxuu la kulmay Xaaskiisa Caasha & gabadhiisa
oo iyana ka badbaaday Masiibadan iyaga oo jiifa Cisbitaalka Lampedusa, waxay
sheegeen dad goobjoogayaal in Dhibane Faarax uusan wax hadal afkiisa ka soo
bixin, ee uu durbadiiba hab kula booday Xaaskiisa & Cunugtiisa, taasina ay ka
ilmeysiisay dhaqaatiirti & suxufiyiinti ku sugnaa meeshaas.
 Waxaa
haddana mudnaan mudan in la sheego inaysan jirin illaa & hadda wax Soomaali ah
oo isku dayay inay u gurmadaan dadkaas Walaalahood ah, ha noqoto Caawinaad
dhaqaale ama fududeynta Arimaha la xiriira Turjibaanimada I.W.M inkastoo ay
Roma joogaan dad sheeganayo inay yihiin Mas’uuliyiin Soomaaliyeed.
Sidee doontaba ha noqotee waxaa xaqiiqa ah in dadkaas oo hadda ku sugan
Kaamka Qaxootiga lagu soo deynayo muddo dhan 10 illaa 30 beri, ka dibna ay u
soo xoomi doonaan Roma, waxaa is weydiin mudan yaa uuga soo horeeya Roma? Hoy
halkee ka heli doonaan? Jaaliyadda Soomaaliyeed ee Roma ma isu diyaar gareeyeen?
Su’aalahani dad badan oo sheeganaya Masuuliyad ayaa iska indha tira, Laakiin
dhammaan dhalinyarada ku soo gala Tahriibka oo safarkooda la meel dhigay ama
isku Magacaabay “TITANIC” ayaa sheegaya inay Roma kala kulmaan soo
dhaweyn la’aan, uuna Tahriibka saxda ahna yahay kan ay ku joogaan Roma.
Qaarkood ayaa marar laga siiyaa Hooy Safaaradda haddase waxaa la sheegay in! la
diiday, Qaar kalena Qunsuliyadda ayay isaga tuurtaan.
 Dhammaan
Reer TITANIC ayaa sheegay inaysan aheyn wax loo dulqaadan karin sharaf darada
ay kala kulmeen labadan Hooy ee uu Qarankan Soomaaliyeed ee burburay, dad gaar
ahna ay qol qol u kala qaateen, dadkii mudnaaan-na ay Stazione Termini iska
dhex yaacayaan si ay isaga aadaan goboladan kale ee Italy oo la moodo inay soo
dhoweyn fiican ka helaan.
Dadkii ka badbaaday Doonta Magacyadooda...
Ka akhri halkan... Guji
Khalid X. Cali Maalin “Deble”
SomaliTalk.com
amalroma@hotmail.com
Faafin: SomaliTalk.com | Oct 20, 2003
45 Soomaali iyo Itoobiyaan ah oo Looga Cabsi Qabo
in ay Dhinteen, Kaddib markii Xoog Looga Daadiyey Doontii ay Saaraayeen
August 2003....
GUJI
93 qof oo isugujira dhawr dal
oo Afrika ah oo Harraad Kudiley Saxaraha Liibiya
May 18,
2001... GUJI
Sawirada: Warbaahinta Italy.
http://www.repubblica.it
| 
