.
Iyada oo uu ku guuda jiro maalintii ugu
horaysay ee booqashadiisa uu ku joogo waddanka Britain, ayaa Madaxweynaha
dalka Maraykanka George W. Bush wuxuu qudbad ka jeediyey Guriga martida ee
magaalada London (London Banquiting House) Madaxweyne Bush oo ay
dhegaysanayeen dad aad u farabadan oo hoolka ka soo xaadiray oo ay ka mid
ahaayeen Wasiirka Arrimaha dibadda ee ingiriiska Jack Straw isaga oo hadlaya
wuxuu yidhi “Ingiriiska iyo maraykanku waxay leeyahiin hadaf qudhaata oo ay
ku difaacan xorriyadda iyo karaamada bulshada caalamka”
Madaxweyne Bush oo qudbadiisi ugu horaysay ka jeedinaya London.
Madaxweyne Bush oo difaacaya weerarkii uu
dalkiisu ku qaaday dalka Ciraaq wuxuu yidhi “ Wuxuu caalamku khatar u ahaa
argagixisada oo adeegsanaysa keligood taliyayaasha inay gacanta ku dhigaan
hubka halista ah ee Chemicalka iyo Biological-ka si ay ugu weeraraan dadka
jecel nabadda iyo ilbaxnimada (Civilization)” Bush oo taa sii faahfaahinaya
wuxuu yidhi “Kuwa neceb dimuqradiyadda waxaanu ku arkayna indho dheer,
murankooduna keliya wuxuu sii kordhinaya khatar horleh oo ku soo biirta
caalamka” Bush oo sii hadlaya wuxuu yidhi “Masuuliyad weyn ayaa dhabarkeena
saaran oo aynu ku difaacayno dimuqradiyadda oo lagala horyimid dagaal cad,
haddii aynu indho furan ku eegno waynu kaga takhalusi doona” Madaxweyne Bush
oo ka hadlaya dalka ciraaq wuxuu yidhi “Keligii taliyahii Saddam Xuseen wuxuu
caalamku u samray tobaneeyo sanno inuu ku xakameeyo hubka halista ah ee uu ku
khatar gelinaayey dunida, balse hadda waxaanu ogaanay in wakhti kale oo la
siiya keliya ay khatar ka soo jeedo” isaga oo arrintaa ku sii nuuxnuuxsanaya
wuxuu yidhi “Yaa odhan kara Ciraaq way liidata saddam Xuseen la,aantii isaga
oo xasuuqayey shacabkiisa”, dhinaca kale Madaxweyne Bush wuxuu tacsi u diray
amaana u jeediyey ciidamada boqortooyada ingiriiska ee jooga waddanka ciraaq,
oo uu ku tilmaamay halyeeyo difacaaya xorriyadda iyo madaxbanaanida
Mudaharaado qorshaysan
Waxaa maalinta khamiista ah la saadalinaya
in inkabadan 100,000 oo mudaharadayaal ahi iskugu soo baxaan magaalada london,
mudaharadayaashaasi oo ka soo horjeeda imaatinka Madaxweyne Bush kuna
dhaliilaya Weerarka uu dalkiisu ku qaaday Waddanka Ciraaq ee uu ka danbeeyey,
ayaa la filaya inay noqdaan mucaradadii ugu badnayd ee hogaamiye Maraykan ahi
kala kulmo waddanka ingiriiska, iyada oo sida dadka siyaasadda u dhuundaloola
sheegayaan uu Madaxweyne Bush eedi doono booqashadiisani hadda uu ku joogo
waddanka ingiriiska.
