|
Warbixin
ku saabsan soomaalida Boson. MA.
C/raxman Ceynte | Boston,
MA | ceyntejournalist@attbi.com
Feb 10, 2003
Maalintii Jimcaha aheyd oo bishan aheyd
7-da ayaan ka soo dagay garoonka dayuuradaha caalamiga ah ee magaalada
Boston, MA (Logan International Airport) oo ah mid kamid ah airport yada ugu
mashquulsan mareykanka oo dhan, isla markaana ah meeshii eey ka duuleen laba
kamid ah dayuuradihii lagu qarxiyey daaraha Twin Towers September 11 2001,
Baraf aad u culus ayaa hareereeyey dhamaan gagida, taas oo runtii khasabtay
in dayuuradii aan la socday dhowr saacadood dib loo dhigo, ugu danbeynse
waanu soo caga dhiganay.
Gagida dayuuradaha ee Boston waa mid kamid
ah kuwa sida xad-dhaafka ah loo sugo amaankooda, markii aan soo dhoofayey
waxaan aad ula fajacay sida loo baarayey dadka oo dhan, gaar ahaan kuweena
magacyadooda islaanimada ka soo dhadhameyso. Tusaale ahaan waxaa xitaa lagaa
siibayaa suunka dhexda kuugu xiran si loo hubiyo inuusan jirin wax kale oo
bir ah oo sameynaya dhawaaqa ishaaraya qofku inuu biro sito, waxaanse sii
anfariiray markii uu ninkii baaritaanka sameynayey gacantiisa iila tagay oo
uu korkeyga gacantiisa mariyey!
Magaalada Bosoton waa mid mid kamid ah
magaalooyinka ugu faca weyn waddanka mareykanka, ilaa iyo 300 sano ayaa la
soo daganaa, khalqi xad-dhaaf ahin weey ku dhaqan yihiin magaaladan.
gumeystihii ingiriiska ayaa raad aad u weyn ku leh magaalada, dhismaha
magaaladu wuxuu aad ugu qaab egyahay magaalada London ee waddanka ingiriiska,
wadooyinku aad beey ciriiri u yihiin, biyo ayaana meel kasta dhex ceegaaga.
dadkeena reer Minnesota ah weey ku adag tahay ineey gaari ku dhex wadaan
magaalada, wadooyinka oo ciriiri ah awgeed. Laakiin gaadiidka dadweynaha
ayaa ah mid aad looga helo magaaladan. Tareeno iyo basas ayaa dhulka
korkiisa iyo hoostiisaba maraya. Bosoton waa magaalo eey ku badan yihiin
ajaanibta hodan-ka ah ee waxbarasho doonka ah, maadaama eey xarun u tahay
jaamacado heer sare oo eey Harvard iyo MIT college ugu horeeyaan. Sida uu ii
sheegay nin dhalinyaro ah oo dowladda hoose u shaqeeya, kudhawaad 40% dadka
magaaladu waa dad aan English-ka luqadooda koobaad aheyn.
Lama hayo tirakoob rasmi ah oo sheegaya
tirada soomaalida, ha yeeshee xubno ka tirsan xarunta jaaliyadda
soomaaliyeed ee Boston ayaa iigu qiyaasay in guud ahaan gobolka eey ku nool
yihiin ilaa iyo 4000-5000 soomaali ah. Soomaalidu wexeey aad uga shaqeystaan
meelaha gawaarida la dhigto (parking Lots) iyo Taksiyada magaalada, maadaama
eey meel aad u mashquulsan tahay, dhowr dhalinyaradaas kamid ah oo aan
saaxiibo nahay ayaa ii sheegay ineey 5-ta maalmood ee todobaadka la shaqeeyo
eey iyagu waxbarasho tagaan, weekend ama sabtida iyo axaddana Taxi-ga wadaan.
Somalida Boston wexeey uga horeeyaan
soomaalida kale ee aan ku soo arkay goboladii kale ee aan horey booqday sida
joogtada ah oo eey ula socdaan arrimaha siyaasada somalida, waxaanse la sii
yaabay sida jaaliyaddani uga warheyso saxaafadda soomaalida, Inta badan
dadkii aan la kulmay markii aan weydiiyey ineey website-yada soomaalida
aqriyaan iyo inkale, wexeey durbadiiba la soo boodeen magacyada kale duwan
ee boggaga soomaalida.
Qaar ka tirsan jaaliyadda ayaaba iiga
yaabsaday sida xeelka dheer oo eey u kala yaqaanaan qorayaasha soomaaliyeed,
waxaan isku dayey bal inaan ogaado sababta ka danbeysa arrintan. Waxaa ii
soo baxday in somalida gobolkani dhanka aqoonta kaga hodansan yihiin
goboladii kale ee aan tagay sababaha soo socda awgeed:
(a) deeqaha waxbarashada oo guud ahaan
la oran karo waa kuwa si sahlan looga helo gobolka
(b) Gaadiidka dadweynaha oo ah mid
leyska heli karo ku dhawaad 24 saac ee maalintii & habeenkiiba.
Waxaa laga yaabaa inaad isweydiiso maxaa
iska galay gaadiidka dadweynaha iyo aqoonta? Waxaa iska galay, qofku marka
uusan ka walwaleyn gaadiid joogta ah oo uu maalinkasta u raaco kana soo
raaco gobta waxbarashada, isla markaana uu yahay arday iska jeb xun oo aan
maalinkasta ka bixi Karin inuu gaarigiisa shidaal & caymisba
(insurance) ka bixiyo, wexeey u sahleysaa inuu si sahlan qofkii aqoontiisa
u sii wato.
Jaaliyadda soomaaliduna waxeey aad ugu
badan yihiin xaafada Roxberry oo eeyna ka dagggan yihiin guryo eey
dowladdu ugu deeqday jaaliyadda. Waxaad ku arkeysa xaafaddan iyadii oo
niman macawisyo wata iyo dumar diracyo xiran isaga gooshayaan daarahaas
sanka iskula jira.
Jaaliyaddu wexeey leedahay xarun
Taleefishin oo todobaadkiiba dhowr mar soo gasha. Nabadoon Salaad Jimcaale
Siyaad (Toosane) oo ah dhaqan-yaqaan soomaaliyeed ayaa ah nin oday ah oo
si joogto ah taleefishinka wacyi galin dhaqameed ka soo jeediya, wuxuuna
ii sheegay ineey tahay fursad qaali ah oo u helay inuu jiilka soo
barbaaraya ugu gudbiyo arrimaha dhaqanka oo eey iyagu warjire moogga ka
yihiin.
Boston wexeey daris la tahay, isla
markaana magaalo loo soo sheeko iyo shaqo tagaba u tahay gobolka Maine ee
ahaa meeshii indhawaalaba lagu dhibaateynayey somaalida. Dhowr dhalinyaro
ah oo aan kula kulmay Boston ayaa ii sheegay ineey si dadban uga mid
yihiin jaaliyadda gobolkan.
Magaalada Boston waxaan ku soo arkay hal
makhaayad oo cunta soomaliga laga cuno, iyo dukaan caan ah oo lagu iibiyo
qalabka hidaha iyo dhaqanka, isla markaana xarun u ah mid kamid ah
xawaaladaha soomaaliyeed.
Jaaliyadaha muslimka ah ayaa iyana guud
ahaan la oran karaa weey ku badan yihiin magaaladan Boston, gaar ahaan
kuwooda ka yimid waddamada hodanka ah ee bariga dhexe iyo bariga fogba.
C/raxman Ceynte
Boston, MA
ceyntejournalist@attbi.com
[Qoraallo kale
| 
