|
Muqdisho Caasimad ma u
qalantaa????
qore :siciid xaaji xuseen
shariifka@yahoo.com
Feb 12, 2003
Doodaas waxaa kusoo bandhigay somalitalk.com,fahad yaasiin,oo isagu ku soo
gunaanaday inaaysan u qalmin sababo dhowr ah oo uu kaga sharqamiyay
qoraalkiisa, doodaan waxaa qaba dad badan in caasimadnimada Muqdisho wax la iska
dheho,waxaayna doodeedu soo cusboonaataa markasta oo shir-soomaaliyeed qabsoomo.
Iyadoo aad moodo in dadku yihiin laba qaybood ama sadexba, qolo qabta in
Muqdisho aay tahay casimada somaliya ee muqadaska ah, oo aan sinaba gorgortan u
gali karin!,qolo labaad ayaa qabta in Muqdisho aaysan sinaba u noqon karin
Caasimad somaaliyeed oo danbe,iyo koox sadexaad oo qabta in dood la galiyo oo
shuruuc iyo dib-u-qaabeen lagu sameeyo caasimadnimada muqdisho.
waxaay aniga ila tahay in labada qolo ee hore aay xag-jiraan,waayo qolada tiri
waa muqadas waxay hilmaameen in caasimadu aay ahayd soohdin qarameed, isla
markaasna aay taladeedu u taalo dhamaan qaybaha qaranka oo dhan.
Qoladaan danbana waxaa muuqata inay ka dhex-guuxayaan miskaxdooda
dhibaatooyinkii dalka ka dhacay,gaar ahaan Muqdisho isla markaana aay ku
dhisayaan aragtidooda taas.
waxaan isleeyahay qoladaan danbe ee iminka doodooda uu furay saaxiibkey
Fahad,oo aan aaminsanahay in aragtidiisu aay tahay mid aan sinaba qabiil ama
caadifad kale salka ku hayn ee aay tahay fikir iyo muuqaal uu is tusay aayna la
qabaan dad badan oo Soomaliyeed,si kastaba ha ahaatee waxaa ii muuqatay in
sababaha uu fahad qormadiisa ku sheegay iyo is berber-dhiga Gobolada uu usoo
sharaxay aaysan midkoodna ahayn xujooyin lagu qanci karo oo u gogol xaari karo
Caasimad wareejinta.
Tusaale ahaan waxuu sheegay Muqdisho aay ka taliyaan 7 hogaamiye kooxeed, hase
yeeshee waxaan la inkiri karin dhamaan meelaha uu xusan aay ka jirto dhibaatada
hogaamiye kooxeedyadu,tusaale ahaan waxuu fahad ku sheegay qormadiisa in Gedo oo
kaliya aay isku bedeleen ilaa 6 hogaamiye kooxeed,kismaayo xaalkeeda waan ka
dheregsanahay,Baydhabo sanad gudihiis ayay waxay maraysaa gacantii 5-aad mise
lixaad welina ma dhamaan xarig-jiidkeedu,hiiraan qudhigeeda waxaa ka jira
3-garab-siyaasadeed oo aan midna mid wax u ogeyn.
waxaa halkaas kamuuqata in kooxeeysigu iyo kala googo'u uusan ahayn calaamad
gooni ku ah magaalo,isla markaana uu yahay muuqaal guud oo laga dhaxlay sharci
darada iyo fowdada baahday,gobolba heer ha u joogtee,waxaana muuqata in aay
tahay wado-lawada marayo oo kuwa hada deganina aay ku sii jeedaan hadaan qaran
soomaaliyeed la helin,tusaale,gobolada la isku dhaho Puntland oo xiligii
Muqdisho colaadaha lagu hoobtay ka holcayeen hoos-harsanayay nabad iyo xasilooni
waxa aay u muuqdaan maanta inay ku jiraan xaaladihii muqdisho ku jirtay bilowgii
sagaashamaadkii.
Marka anigu waxaan qabaa in dhibku yahay mid guud,muqdisho dhibaatooyin baaxad
lihi waa ka dhaceen oo aan miskaxda dad badan si sahal ah aan uga baaba'eyn,
hase yeeshee xalkeedu waxuu qeyb ka yahay xal guud oo somaliya hesho.
waxaa intaas dheer in muqdisho aay taalo hantidii iyo waxii agab ahaa ee umada
somaliyeed tacabtay dowlad iyo shacaba afartankii sano ee tagtay sidaas
daraadeed aaysan sahlanayn in si fudud looga guuro iyadoo aan xal loo helin
arintaas.
Waxaa intaas dheer in dooda ku saabsan xagee caasimad noqonaysa aaysan noqon mid
lagu saleeyo dhibaatooyinkii dalka ka dhacay ee noqoto mid lagu saleeyo
shuruudaha lagu xusho caasimad oo leh kuwa
dhaqaale,siyaasadeed,istiraatiijiyadeed,iyo bulsheedba,kuwaasoo markii si
cilmiyeysan loo baaro aaysan jirin meel muqdisho ku soo dhawaan karta.
Dooda kale oo ah in dowlada C/qaasim aay lasocon wayday muqdisho darteed,
waxaan qabaa sababo kale oo aad u xoog badan aay yihiin kuwa curyaamiyay
mirihii carta.
waxaana jira wadamo badan oo dunida ah kuwaasoo dagaalo sokeeye la dageen
mudooyin dheer,isla markaasna dagaalkoodu ku salaysnaa kala qeybsanaan
qowmiyadeed,diimeed,iyo mid dhaqameedba, kuwaasoo markii xalka la baadi-goobayay
aan caasimada la bedelin ee si kale xal loo gaaray waxaan tusaale u soo qaadan
karnaa Afghanistan, Malawi, Liberia,Angola.IWM.
Xitaa suudaan oo xaalkeeda aan la socono iyo dhibka weyn ee ka jira dagaalada
kharaar ee aay isaga horjeedaan kooxaha konfurta ee kirishtanka ah iyo dowlada
khartuum,caasimad bedel maahan ajende aay dalbayaan kooxaha reer koonfureedku.
Marka anigu ma lihi muqdisho waa caasimad muqadas ah laakiin waxaan isleeyahay
hadii miskax ka fayoow raadadka iyo waxyaabaha laga dhaxlay dagaalada sokeeye
lagu falanqeeyo caasimad Somaliya xagee u noqonaysa inaan meel ka mudan jirin
dhibaatooyinka hada dadka qaar u muuqdana waa wax ku xiran xal-guud oo umada
somaliyeed hesho.
waxaa haray inaan dhaho waxaay u taalaa dadka hada muqdisho gacanta ku hayaa
inay bedelaan sooyaalka foosha-xun ee iminka ka jira Muqdisho kaasoo aan
dhiirigalinayn sheegashada aay ku doodayaan in muqdisho tahay caasimad abiya.
qore :siciid xaaji xuseen
shariifka@yahoo.com
Afeef: Aragtida qoraalkan waxaa leh qoraaga
ku saxiixan
[Qoraallo kale
| 
