|
Abgaaloow awrkiina qabsada (Maxamed
Dheere)
 Cabdulwaaxid Khaliif
cabdulwaxid@hotmail.com
Ilaaah baa mahadleh. Nabadgelyo iyo
naxariis ha ahaato Nabi Muxamed korkiisa.
Akhristayaal waxaa
sanadihii ugu dambeeyey diiraddu ii saarnayd qab-qablayaasha khaasatan nin
aan ilmo adeer nahay oo la yiraahdo C/hi Yuusuf. Walaalkeen Tooxoow baa yiri:
C/Waaxid wuxuu Puntland uga hadlaa oo u guubaabiyaa inay noqdaan dad
wanaagsan si ay u doortaan qof fiican oo ay naftoodda wax ugu qabsadaan,
arrimaha Soomaaliyana meel fiican kasoo gaaraan. Tooxoow waa ku run sheegay
arrintaas laakiin waa ninkee ninkaan rabin in qolodiisu noqoto dad sharaf
leh oo caddaalad wax ku maamula? Qofkiise qolooyinka kale kheyrkaas la naca
waa qof xaasid ah oo aan aakhiro iyo adduunba la ammaanin. Waxaa intaas kuu
dheer haddaad khaladka dadkaaga caddayso adoo uga dan leh inay dad noqdaan
waxaa meesha ka baxaya inaad u muuqatid nin wax isku-diraya ileyn lama arag
qof dadkiisa wanaagga la necebe. Arrimahaas dartood ayaan rabaa inaan maanta
qolodaas aan kor ku xussay usoo galo.
Akhristayaal waxaa la
sheegaa in nin mu’addin ahaa mar uu aadaaankii dhameeyey orod isku qaaday.
Waxaa ka hor yimid nin masaajidka u soo socday oo yaqaanay markaasuu
weydiiyey waxa ku dhacay mu’addinkii? Mu’addankii wuxuu yiri waxaan rabaa
inaan maqlo meesha codkeygu gaarayo! Hadda waxaa la sheegaa inay suurtogal
tahay in hadal hore loogu hadlay dib hawada looga soo qaban karo! Hadday
taasi jirto haddee mu’addinkaasi doqon ma ahayne waxbuu horay u ogaa!
Bal aan fiirino awrka
Abgaal (Maxamed Dheere) dadkii uu hor-istaagay, cidduu ka hor-istaagay iyo
waxuu u hor-istaagay. Wuxuu hor-istaagay dadkaan: Cali Mahdi Max’ed, Muuse
Suudi Yalaxow, Eng. Max’ed Xuseen Caddow, C/llaahi Geedi Shadoor, Xuseen
Xaaji Bood, Ismaaciil Macallin Muuse & kuwo kale. Wuxuu ka hor-istaagay
Imaamka beelaha Hiiraab Imaam Max’uud Imaam Cumar & Macallin Nuur Max’ed
Siyaad oo ka mid ah mashaa’iikhda waaweyn ee dalka Soomaaliya. Wuxuu ku
doodday Maxamed Dheere in raggaasi aysan waddan fasax ay isaga ka haystaan
oo ay ku dhexmaraan degaankaas! Ma haddaa Xamar maraysaa in Abgaal uu ka
hor-istaago Abgaal kale oo u socda Abgaal?
Faarax Goleleey, Salaad
Gabayre iyo Xuseen Kulmiye (Allaha u naxariistee) waxay ka mid ahaayeen
dadkii Abgaal ugu caansanaa laga soo bilaabo xornimadii ilaa burburkii waa
marka siyaasadda loo eego. Raggaas waxaa yaqaan Soomaali badankeeda.
Waqtigan la joogo nimankaas Maxamed Dheere isku deyey inuu hor-istaago iyo
Imaamka iyo sheekhaas kale waa dadka Abgaal ugu caansan xag kasta sida diin,
dhaqan iyo siyaasadba. Maxaa Maxamed Dheere arrintaas ku kallifay?
Mar uu kornayl C/hi rabay
inuu dilo suldaan jifadiisa ah wuxuu u diray dhowr wiil. C/hi waa ka
xishooday in baabuurkii uu Suldaan Hurre (Allaha u naxariistee) saarnaa
iyadooy la socdaan labo waardiye uu dab saaro. Ujeedadiisu waxay ahayd
suldaanka kaliya ka dibna isagii kaliya ayuu sugay. Halka Maxamed Dheere
sidii mu’addinkii aan ka soo sheekeynay uu rabo inuu ogaado sida ay Abgaal
la tahay ficilkaas aan looga horrayn. Waxaan is-lahaa suurtogal ma ahan in
qof uu sheegto mas’uuliyadda ficilkaas oo kale khaasatan hadduu ka soo jeedo
Abgaal laakiin waxaa qoraalkan igu khasbay markaan arkay Maxamed Dheere oo
ku diganaya shilkaas isagoo iska dhigaya inuu ka xunyahay sargaalkii ku
dhaawacmay halkaas laakiin uu leeyahay gaadmadaas waxay ahayd mid sharciga
waafaqasan! Sida C/hi waxaa la rabay inuu Maxamed Dheere uu raadsado Muuse
Suudi kaliya laakiin inuu yiraahdo odayaashaasi waxay soo galeen degaan
aysan shuqul ku lahayn waa sheeko aan la fahmi karin. Odayaashaan kulligood
ka caansan Maxamed Dheere, Abgaal dhexdiisana isaga kaga sharaf badan marka
yaa Yaaqshid ama meel kale Maxamed Dheere u saxiixay?
Sida la sheegay Muuse Suudi,
Cali Mahdi, Caddow, Bood, Shadoor iyo kuwa kale waxay u socdeen dib-u-heshiin
Muddulood dhexdiisa ah iyo in laga cafiyo khaladkii horay loo galay.
Miyuusan Maxamed Dheere ogayn in guryaha aasaaska laga soo bilaabo?
Haamahana gunta laga unko? Muxuu ku falayaa dib-u-heshiin Soomaali hadduusan
rabin in qabiilkiisu heshiiyo? Muuse Suudi iyo saaxiibadiis waxay sharfeen
culumadii iyo hogaamiye dhaqameedkii laakiin Maxamed Dheere waxaan Mele
Zenawi ahayn sharaf uma hayo.
Madaxweynihii hore ee
Maraykanka, Reagan ayaa Qadaafi ku sheegay inuu yahay “mad
dog of the Middle East” oo ah eygii waalnaa ee Bariga dhexe. Reagan waa iska
lahaa laakiin waxaan shakki lahayn in Maxamed Dheere yahay Awrkii dhugatada
qabay ee Abgaal (ama dheh Soomaaliya). Bal ka warrama nin leh waxaan u
fadhiyaa shir dib-u-heshiisiin oo iska dhigaya inuu doonayo in Soomaali meel
isugu timaado haddana dadkii xulka ahaa ee reer tolkiis leh ma dhex mari
karaan meelo ka mid ah Xamar iyagoon fasax ka sidan?! Waxaad maqlaysaa
isagoo leh waxaan rabnaa inaan tagno Itoobiya ama Garoowe. Haddiiba uu Cali
Mahdi iyo qolyahaas la socday uu Xamar u diiddanyahay sidee ku keenay inuu
hawaysto Garoowe? Ilaah baa horay noogu sheegay sida uu noogu shakhiray
awrta markuu lahaa “Afalaa yanduruuna ilalibili keyfa khuliqat”. “Soow ma
aragno wiil yar oo awr tiro badan iska xiriirsanaya”? Marka ma la yaabbay
leedahay haddaad aragto C/hi Yuusuf oo awr dhugato qaba keeno keeno leh?
Soow uma habboona inuu C/hi akhristo ducadii rakuubka (SUBXAANALLADII
SAKHARRA LANAA HAADAA WAMAA KUNAA LAHU MUQRINIIN* WA INNAA ILAA RABBINAA
LAMUNQALIBUUN). C/hi hadda wuxuu haystaa afar addin markuu rabana waa iska
bedeli karaa. Afartaas addin waa Xuseen Caydiid, Cumar Filish, Qanyare iyo
Maxamed Dheere.
Bal fiirsha Muuse Suudi
wuxuu la heshiiyey raggaas Abgaal laga yaqaan, C/Qaasim, Caato, Barre
Hiiraale, Cumar Jees, Jaamac Cali Jaamac, Xaabsade iyo kuwo kale halka
Maxamed Dheere rabo inuu Xamar ku toogto Muuse Suudi, Cali Mahdi, Shadoor
iyo kuwo kale.
Marka Maxamed Dheere baa
ugu filan inuu Abgaal oo dhan usoo jiido ceeb iyo calaamo aan weligeed la
arag. Waligey isagoo kale ma maqal taariikh hore iyo mid dambaba. Marka
idinkoo u fiirin walaal, qaraabo iyo xidid midna waa inaad ninkaas dhugata
qaba meel iskaga xirtaan.
WQ. cabdulwaaxid Khaliif | cabdulwaxid@hotmail.com
AFEEF: Aragtida qoraalkan waxaa leh qoraaga ku
saxiixan
Faafin: SomaliTalk.com | Dec 22,
2003
QORAALADII HORE EE CABDULWAAXID
Wada-shaqayntu
Waa Furaha Guusha.. GUJI
| 
