Booqasho gaaban oo ay Hablaha Qeybta Caafimaadka ee Global (GHS) ku booqdeen dhismaha weyn ee xarunta Hay’adda Sofiha ayey kala kulmeen soo dhaweyn aad u diirran , halkaasi oo ay ku qaabileen Xubno ka tirsan Hay’adda SOFIHA oo uu ka mid yahay Guddoomiyaha Hay’ddda SOFIHA C/raxmaan Yuusuf Budul .

Isla markaasi waxa ay Hay’adda SOFIHA ku qaabishay Machadkaasi Global Qeybta Caafimaadka meel aad loo qurxiyey oo ku taalla Dusha sare ee Dhismaha Hay’addaasi Goobtaasi oo aad u leh Bilic isla markaasna aad mar ka wada il bogan kartid Badda xaaxigeeda iyo Daruuro dul heehaabayey Daarta Nabadda ee SOFIHA Dusheeda .

Soo dhaweyn ka dib waxa Hablahaasi u hadashay Keyf Siciid Ibraahim oo ka tirsan Machadkaasi Global waxayna u Mahad celisay Hay’adda SOFIHA iyadoo xustay inay Hablaha Caafimaadku ka shaqeeyaan Badbaadin Nafta Dadka iyo Daryeelkooda sida ay SOFIHA uga shaqayso Nabadda oo ay iyana Nafta u badbaadiso .

Keyf waxa ay sheegtay Baahiyo faro badan oo hortaagan Machadkooda (GHS) oo ay ka mid yihiin Tababar la’aan iyo qalab la’aan , iyagoo ka dalbaday Hay’addan Swedishka ah in ay Taageero u fidiso .

Gudoomiyaha SOFIHA C/raxmaan Yuusuf Budul ayaa u mahadceliyey Hablahaasi isagoo halkaasi uga ballanqaaday Machadkaasi inuu la garabtaagan yahay Taaageero Maaddi iyo Macnawiba leh iyo weliba isagoo gaarsiinaya magacooda Meel dheer una qareemi doono sidii Hablaha wax loo bari lahaa , wuxuuna ku dhiirra geliyey waxbarashadooda inay sii wataan isagoo sheegay in ay ku sharfan yihiin Booska ay Ummadooda ka taagan yihiin , wuxuuna Guddoomiyuhu Xusay inay xambaarsan yihiin Bahda Caafimaadku Sirta Nolosha iyo dhambaalka Naxariista loona baahan yahay inay mar walba u naxariistaan Dad weynaha iyo kuwooda Bukaanka ah , sidoo kale waxa uu Gudoomiyuhu ku booriyey Waalidiinta inay waxbaraan Hablaha si loo helo Mustaqbalka Hooyo waxtaqaan waxaana uu tusaale u soo qaatay in Ninkii Gabar waxbaraa uu Bulsho waxbaray .

Hay’addan oo ka shaqaysa Nabadda , Waxbarashada , Dhaqanka iyo Dimoqraadiyada ayaa waxay beryahaan wadday dersid xaaladda waxbarasho ee Hablaha Soomaaliyeed isagoo gudoomiyaha SOFIHA Mr. Budul socod ku maryey Goobaha waxbarista Hablaha ayuu Booqday Machadkaasi Galobal ee ku yaala Boosaaso si uu ugu kuurgalo una indha indheeyo waxbarashada Hablahaasi u yimid ee Baahidooda waxbarasho usoo gudbistay , isagoo halkaasi kula kulmay Maamulaha Qeybta Caafimaadka ee Machadkaasi (GHS) Dr. C/fataax Ciise Warsame , wuxuuna kala hadlay Gudoomiyuhu waxbarista Hablaha iyo in waxbarashadooda la dardargeliyo , loona aqoonsado shahaadada ay qaadan doonaan Marka ay dhamaystirtaan Koorsooyinka loogu talo galay .

waxaa halkaasi gabdhihii Machadkaasi ee booqday Umahad celiyeen Hay’adda SOFIHA waxayna ku tilmaameen Gudoomiyaha C/raxmaan Budul Aabbe Nabadeed oo haddana usoo jeestay inuu kor u qaado sidii hablaha Wax loo bari lahaa maadaama ay iyagu yihiin kuwa Hooyadda u noqonaya Jiilasha soo socda .

Ma aha markii u horaysay ee Hay’addasi la booqdo balse waxay Noqotay SOFIHA meel loo wada Booqasho tago , waxa iyana Halkaasi Booqday dhawaan Suxufiyiin ka tirsan BBCda iyo Arday ka socota Jaaliyadaha Dibadda ,iyadoo Halkaasi loogaga wada hadlay sidii Saxaafadda Xorta ah looga hirgelin lahaa Soomaaliya loona xoojin lahaa wacyigelinta Nabadda sida uu Gudoomiyaha SOFIHA sheegay Warku waxa uu ku dhacaa meel fog halka xabadda qorigu gaarto meel dhow .

Dhanka kale waxa Mr. Budul la kulmay dhallinyaro Soomaaliyeed oo u yimid Bosaso Tababar la xiriira la talinta dadka qaba AIDSka kuwaas oo ka kala yimid Yeman , Jabuuti , Somaliland , Puntland iyo Koonfur iyagoo Codsaday inay Booqdaan Sarta Nabadda ee SOFIHA isla markaasna waxa uu Gudoomiyuhu faray fariimo Nabadeed oo u diray Somaliya isagoo xusay sida ay Puntland Nabadda ugu caanbaxday oo uu Hadda Doonayo inuu Dhiso taallo lagu xusuusto Nabadda Puntland isla markaasna waxa usoo jeediyey Dhallintii Somaliland inay kal shaqeeyaan Afti ay qaadi doonto SOFIHA oo ay ku doonayso in Taallada Khayriyadda loo yaqaan ee ka dhisan Hargaysa lagu Muujiyo Calaamado Nabadeed iyo shinbir wadda dhanbaalka Nabadda , ama in taas laga dhinac dhiso mid kale oo Nabadda ka tarjumaysa.

Isagoo sheegay Gudoomiyuhu in maanta Adduunka Nabadda la xoojinayo oo Heroshiimadii Japan ba laga dhisay Taallo nabadeed isla markaasna loo baahan yahay in Ummadda Soomaaliyeed horta dhanka Nabadaynta , Taalo dhiska Nabadeed, iyo Billado siinta la xoojiyo si markaasi loo helo Dawladda qaran ee la baadi goobayo oo Soomaali oo dhami Maanta u Oomantahay .