![](http://www.somaliatalk.com/2003/july/salahdin.jpg)
Hassan Salahudin
Leicester, UK
hassanabdillahi@hotmail.com
SomaliTalk.com | Dec 20,
2003
Aduunku waa ayaanba ayaan, maalmahana Ilaahay baa aadamaha ku dhex wareejiya
dadku kala ayaan badan, akhristow ma taqaanaa aadamiga kuwa ugu dhibta iyo
riifta badan, aan kaaga jawaabee waa ambiyada, dabadeedna waxa ku xiga dadka
kuwa xaga wanaaga ku sii xiga, sida ay u kala wanaagsan yihiin baa aadamiga loo
kala dhibaa, waa xadiis saxiixa oo ka sugnaaday hogaamiyihii muslimiinta Nabi
Muxamed(NNKH), Ilaahay ma haligo qawm ilaa iyagu ay is haligaan, waa aayad ku
xardhan kitaabka quaraanka kariimka ah.
Colaadaha hubaysan iyo dagaalada sida arxan la’aanta ah la iskugu gumaaday
wadanka Somalia dhawr iyo tobankii sano ee la soo dhaafay waxay uurxumo iyo
tiiraanyo kaga tageen muwaadin kasta oo soomaliyeed gaar ahaana inta ay ku jirto
damiirka iyo dadnimadu,dagaalo ku salaysan qabiil iyo beelaysi oo cidina ay
cilinkooda saari wayday ayaa gilgilay gabi ahaanba geeska Africa xalkooduna ilaa
hada uma muuqdo shacabka, aqoonyahanada iyo guud ahaanba umada soomaliyeed inta
nabada jecel oo mudo dheer isha ku hayey bal in mar uun uu soo muuqdo san saan
nabadeed oo lagu soo afjari karo colaadahaas, shirarka dib u heshiisiintu way
tiro beeleen oo waxaabay kor u dhaafeen dhawr iyo toban shir ummada
soomaliyeedna dhagahoodu way ka daaleen shir baa la qabanayaa lagu heshiisiinayo
hogaamiyayaasha jabhadaha hubaysan, kii u dambeeyey oo sanad jirsaday waxa uu ka
socdaa agagaarka magaalada Nairobi ee wadanka Kenya, rajadiisuna wax saas ah ma
sii dhaanto kuwii isaga ka horeeyey, ujeedadaydu maaha inaan ka waramo shirarkii
dib u heshiisiinta ee loo qabtay hogaamiyayaasha kooxaha soomalida oo sida aynu
ka wada dheregsanahay dhamaantood ku dambeeyey fashil iyo is af garansho waa,
qormadan waxaan ugu tala galay inaan akhristayaasha ku xasuusiyo si guud mar ah
Somalia waxay ku sagootiday sanadka gaba gabada ah ee 2003-da, Soomaalidii horaa
laga hayaa Ilaahayow sanadka soo socda horaadadiisa iyo ka dambe dabeedadiisa
ayaanu kaa magan galnay, Allow ma tahay kalmad weyn oo u baahan in la baro
jiilasha soomaaliyeed ee soo koraya oo intooda badan uu afsoomaaligu socod barad
ku yahay.
1-Colaado Hubaysan oo halkoodii ka sii socda,
2-Macaluul gobolada Somalia Qaarkood ku baahday
3-Quxuuntiga Soomaalida ee dibadaha u soo yaacaya oo sii siyaaday, iyo biyaha
yemen iyo libya oo noqday xeebtii geerida muhaajiriinta soomalida.
4-Goboladii ka goostay Jamhuuriyadii Somalia la odhan jiray oo si adag ugu
sii adkaystay mawqifkoodii ahaa in aanay waligood dib ula soo fadhiisanayn goob
iyo googol midna koonfur,
5-Shirkii dib u heshiisiinta hogaamiyayaasha kooxaha Soomaalida ee ka socda
wadanka Kenya oo sanad jirsiday asee aan soo koordhin wax ididiilo iyo rajo ah
inaba.
6-Dawladii Cabdiqaasim ee sanadkii 2000-kun lagu soo dhisay tuulada carta ee
Jamhuuriyada Jabuuti oo si wanaagsan ugu dhex milantay raadkeediina la waayey
shirka dib u heshiisiintay qab qablayaasha dagaalka ee ka socda Kenya.
7-Saydarada ay la maagan yihiin gumaysiga xabashidu gayiga soomalida oo sii
kordhay sanadkan 2003-da iyagoo taageero ka helaya hor joogayaasha kooxaha
soomaalida qaarkood.
8-Dawlada Maraykanka oo dhawr jeer laga maqlay badhtamihii sanadkan 2003-da
hadal hayn ah inay Somalia gacan bir ah ku qaban doonaan tuhun laga qabo awgeed
inay ku gabanayaan kooxaha argagixisada ee taageera ururka Al-qacida.
Qodobadaas aan kor ku sheegay oo dhamaantood aan ku rajo waynahay inaanay ka
farxinayn muwaadiniinta soomaaliyeed iyo shacabka nabada jecel ee ku sugan
gudaha iyo dibada Somalia ayaan ku soo koobay wixii ay Somalia ku sagootiday
sanadkan 2003-da. Rajada laga qabo nabad ka aslaxda geeska Africa haadaan dheer
bay ku dhacday, xaalada shacabka liita ee soomaaliyeedna maalinba maalinta ka
dambaysa waxay sii galaysaa booraan afkii laga qafilay, dadka u dhaba gala
diiradana ku haya siyaasadaha dahsoon ee gumaysiga xabashiduna waxay
aaminsanyihiin in aanay fogayn markii lagu arkayey gobolo Somalia ka mid ah
calanka Ethopia oo si wanaagsan uga dul babanaya iyagoo waliba taageero hiil iyo
hooba leh ka helaya quwado waaweyn oo shisheeye. Sanadka 2004-ta Ilaahay ha uga
dhigo shacabka Soomaaliyeed kii ay ka dhalan lahayd dhulkooda nabad waarta oo
soo afjarta dirirta dhawr iyo tobankii sano ee la soo dhaafay sida joogtada ah
uga socotay geeska Africa.
Waa Walaalkiin Hassan Salahudin
Global Media Group
Uk.
hassanabdillahi@hotmail.com
QORAALADII HORE EE SALAAXUDIIN
Faafin: SomaliTalk.com Dec 20, 2003