|
Baaq – Digniin Ku Socota Maamulka Col. Riyaale
Puntland Patriotic Party
PPP/0731803/CHGPL1209
Annaga oo ah xubnaha Xisbiga Wadaniga ah ee kor ku xusan kuna halwan
dhowridda xuquuqda wadaniga ah ee Dawlad Goboleedka Puntland,
Kadib markii aan:
Aragnay qoraal ka soo baxay madaxtooyada maamulka Hargeysa ee Gobollada
Woqooyi Galbeed ee Somaliya (Somaliland),
Garawsan ujeedada ka dambaysa iyo nuxurka uu xambaarsan yahay qoraalkan
baal-xooftada iyo caga-juglaynta ah ee Col. Riyaale la wadaagay saxaafadda
ku hadasha afka Maamulkiisa,
Xog ogaal u ah dhacdooyinkii bilihii la soo dhaafay ee xasuuqa dadka
mutadawiciinta ah ee naftooda u soo huray gargaarka ummadda Somaliyeed ee ku
nool gobollada Woqooyi Galbeed,
Ka tiiraanyaysan raafka, xarigga iyo tarxiilka lala beegsaday rayadka
Somaliyeed ee dumarka iyo carruurta u badan ee qaarna gacanta loo geliyey
wadame shisheeye, qaarna ku le'edeen shilal,
Xusuusan dhacdadii 7dii December ee sannadkii 2002 ee weerarkii hubaysnaa
ee sida gaadmada ah Col. Riyaale iyo dablaydiisu ay la beegsadeen magaaladda
Las Caanood ee gobolka Sool,
Aragnay warbixinno madax bannaan oo tibaaxaya hub urursi iyo xaalufaysi
dagaal oo uu bilaabay Col. Riyaale isaga oo adeegsanaya Gheellaha Jibouti
iyo Aw Qassimka Muqdisho,
Garowsan daandaansiga aan geedna loogu soo gaban ee Maamulka Hargeysa ku
sheeganayo gobollo ka mid ah degaanadda hoos yimaada DG Puntland sida ku cad
dastuurka iyo mabaa’diida assaaska u ah dhismaha iyo jiritaanka DG Puntland,
Ka dhiidhinay af-lagaadada, damiir xumada iyo taya xumida qoraalka
Maamulka Col Riyaale uu la beegsaday Madaxda Sare ee DG Puntland,
Waxaan uga digaynaa Maamulka Gobollada Woqooyi Galbeed ee Somaliya
(Somaliland) in:
Uu ka waantoobo falalka daandaansiga ah ee uu ka wada gobollada Sool,
Cayn & Haylaan oo ka mid ah DG Puntland,
In uu ogaado in Puntland ay difaaci doonto baac kasta oo ka mid ah
dhulka iyo deegaanadda hoos yimaada DG Puntland,
In aanay shacab weynaha Puntland u dulqaadan doonin gardarada aan
geed loogu soo gaban ee Col. Riyaale wado, iyo
In uu ogaado in cawaaqib xumada ka dhalata dagaal uu huriyo Dambiile
Dagaal Col. Daahir Riyaale Kaahin ay ku halligmi doonaan oo keliya
ummadda Somaliyeed oo aan waxba galabsan.
Waxaan sidoo kale ugu baaqaynaa shacabweynaha Somaliyeed ee Gobollada
Woqooyi Gableed (Somaliland) in:
Ay ka digtoonaadaan gulufka colaadeed ee uu hurinaayo Dambiile Dagaal
Col Dahir Riyaale Kahin,
Aanay ogolaan godob colaadeed oo laga dhex huriyo shacabka walaalaha
ee Woqooyi Galbeed iyo Woqooyi Bari Somaliya,
Aanay raali ka noqon daadin dhibic dhiig ah oo qof ama ummad
Somaliyeed,
Aanay hilmaamin dhiigga iyo dadka uu Col Riyaale ku xasuuqay Berbera
xilligii Maamulkii keligi taliska ahaa ee Maxamed Siyaad Barre, iyo
doorkii uu ka qaatay Riyaale caburinta iyo curyaaminta dhaqdhaqaaqyadii
ardayda iyo shacabka Gobollada Woqooyi Galbeed,
Waxaan sidoo kale ugu baaqaynaa Mutacalimiinta, Cuqaasha, Wax Garadka,
Culumaa Al Diinta iyo inta jecel samaha iyo wanaaga ummadda Somaliyeed ee ku
nool Gobollada Woqooyi Galbeed in ay ka fejignaadaan falalka xabaala
qufnimada ah ee uu Col Riyaale dabada ka wado.
Waxaan kaloo oo aan la socodsiinaynaa bulshada caalamku in ay xog ogaal u
ahaato daandaansiga, hub urursiga iyo hurinta guluf colaadeed ee Col Dahir
RIyaale Kahin ka wado Gobollada Woqooyiga Somaliya.
Puntland Patriotic Party
Email: puntlandpp@yahoo.com
Growe, Puntland State, Somalia.
Faafin: SomaliTalk.com | Dec 11, 2003
Afeef: Aragtida qoraalkan waxaa leh qoraaga ku saxiixan
TIXRAAC: 30kii
December 2002
BAAQ XABAD JOOJIN - Puntland Patriotic
Party (PPP)
PPP/301202/CHGPL0109
- Ku: Madaxda Maamul Gobaleedka
Puntland
- Madaxda
Mucaaradka Maamul Gobaleedka Puntland
- Isimada,
Cuqaasha iyo Waxgaradka Maamul Gobaleedka Puntland
- Bulshada
Rayadka ah ee Maamul Gobaleedka Puntland
Anaga oo ah xubnaha Xisbiga Wadhaniga ah ee
kor ku xusan, saldhigiisuna yahay Magaala Madaxda Maamul Goboleedka Puntland
ee Garowe isla markaasna:
Ka tiiraanyaysan aafada iyo masiibada
dagaal ee mood iyo noolba leh ee 30kii December 2002 ka soo cusboonaaday
deegaanka Maamul Goboleedka Puntland;
Tixraacayna khasaaraha dad, adduun iyo
deegaan ee sida macna darada ah loogu xasuuqayo qaybo ka mid deegaanka
Maamul Goboleedka Puntland;
Qirsan jiritaanka khilaaf siyaasadeed,
aa’raa iyo afkaar ee u dhexeeya maamulka uu madaxda ka yahay Mudane
Abdullahi Yusuf Ahmed ee hadda gacanta ku haya masiirka iyo hannaan socodka
maamul ee Maamul Goboleedka Puntland iyo mucaaradka uu madaxa ka yahay
Mudane Jama Ali Jama;
Ka dharagsan natiijada iyo aayaha dagaal
sokeeye oo mar kale ka qarxa deegaanka Maamul Goboleedka Puntland, una
dhuundaloolna aayatiin xumada dagaal sokeeye uu dhaxalsiin karo ammaanka,
xasiloonida, dhaqaalaha, dhaqanka, dawrka iyo miisaanka siyaasadeed ee
arimaha Somaliya, wadciga iyo jiritaanka mustaqbal iyo mujtamac ee
bulshooyinka ku bahowday deegaanka Puntland ee Shanta Gobol iyo Degmada
Buuhoodle;
Ka dharagsan mabaa’diida guracan,
siyaasadaha qalafsan iyo hurinta colaad dabadheeraata ee cadowga saddex
geesoodka ahi (Kooxda Arta, Al-Itihad iyo Maamulka Waqooyi Galbeed) uu la
damacsan yahay shucuubta ku bahowday Maamul Goboleedka Puntland;
Waxaanu ugu baaqaynaa labada dhinac ee isku
haya siyaasadda ee deegaanka Maamul Gobaleedka Puntland in ay si dhakhso ah
u joojiyaan dagaalka, ayna ku dhameeyaan wixii khilaaf ah ee jira wadahadal,
wadatashi iyo dulqaad walaaltinimo iyo is qadarin aasaas u tahay;
Waxaanu ugu baaqaynaa labada dhinac ee
khilaafku u dhexeeyo in ay wax walba ka hormariyaan maslaxadda ummadda,
mustaqbalka bulsho, iyo kan jiritaan ee Maamul Gobaleedka Puntland;
Waxaanu ugu baaqaynaa dhammaan Isimada,
cuqaasha, waxgaradka iyo qaybaha bulshada rayadka ahi in ay kaalin
firfircoon ka qaataan dhexdhexaadinta iyo soo afjarka khilaafka siyaasadeed
ee u dhexeeya labada dhinac;
Waxaanu ugu baaqaynaa qaybaha aanu khusayn
khilaafkani in ay ka feejignaadaan faragelin khilaafka siyaasadeed ee u
dhexeeya Maamulka iyo Mucaaradka Dawlad Goboleedka Puntland, iyo xad gudub
ay ku sameeyaan deegaanka Maamul Goboleedka Puntland ee Shanta Gobol iyo
Degmada Buuhoodle;
Anaga oo ka tiiraanyaysan aafada ku
habsatay qayba ka mid ah deegaanka Maamul Goboleedka Puntland, waxaanu tacsi
u duraynaa dhammaan shacabka reer Puntland, eheladda iyo qaraabadda dadkii
dhibaatadu ku soo gaadhay dagaaladii 30/December/2002 ka qarxay meela ka mid
ah deegaanka Maamul Goboleedka Puntland.
Tii Waarta Oo Waaya Jirta – Puntland State
of Somalia!
Chairman -
Puntland Patriotic Party (PPP)
Garowe, Puntland State of Somalia
Email:
puntlandpp@yahoo.com
30kii
December 2002
Afeef: Aragtida qoraalkan waxaa leh qoraaga ku saxiixan
....
Copyright
& Islaamku wuxuu ka qabo.... Akhri
Kulaabo bogga hore ee
www.somalitalk.com
| 
Denmark:
Saciid Wesing
Singapore:
USA:
Dacwadii Aba Sheikh 
London,
UK:
Nin Soomaali ah oo Lagu Xukumay 8 Sano