Waxaa maanta oo Sabti ah 02/08/2003 lagu soo
gabagabeeyay Xarunta Ibnu Baaz seminaar aqoon kororsi iyo wacyigalineed oo
socday laba todobaad 19-31/07/2003 ayna ka soo qayb galeen 450 ka mid ah
ardayda jaamacadaha iyo dugsiyada sare ee magaalada Muqdisho iyo agagaarkeeda.
Seminaarkaan oo ay ujeeddadiisu ahayd :
1- Sare u qaadidda aqoonta & wacyiga ardayda, lana
dareensiiyo doorka ardaydu ku leeyihiin badbaadinta iyo horumarinta bulshada.
2- In lagu baraarujiyo ardayda qadiyadaha ummaddooda,
loogana digo hagardaamooyinka cadawga ummadda.
3- Inay ardaydu fasaxooda uga faa’iidaystaan wixii
anfacaya naftooda, ayna ka badbaadaan dhibaatooyinka firaaqadu u geysan karto.
4- Inay ardaydu is bartaan isuna kaashadaan kheyrka iyo
ka hortagga xumaanta.
Waxay ardaydu ku qaateen duruus kala duwan oo ay ka mid
tahay: Kaalinta dhalinyarada Islaamka, Taariikhda iyo ilbaxnimada Islaamka,
Caqiidada Ahlu sunnaha, Dhibaatooyinka Qabyaaladda, iyo Duullaanka milatari &
maskaxeed ee lagu hayo Muslimiinta.
Siminaarkan waxaa casharo ka bixiyay 11 macalin oo
isugu jira macalimiinta jaamacadaha, macaahidda iyo kuwa kale oo aqoon dheeraad
ah u leh maadooyinkii ay soo jeediyeen.
Intii uu seminaarku socday waxay ardaydu qabteen hawlo
isugu jira cilmi baarisyo kala duwan oo ay ka mid yihiin: Mashaakilka
dhalinyarada haysta iyo xalkeeda, Waxyaalaha bulshadeenna dhibka ku haya (Qaatka
& Shaneemooyinka), Xaaladda caafimaad ee Muqdisho iyo Warbixino ku saabsan
dunida muslimka. Waxaa intaa dheeraa tartanno aqooneed oo dhexmarayay ardayda
maalin kasta intii seminaarku socday. Sidoo kale waxaa lagagala socday
casharada seminaarka qalabka Interntka oo ay ka dhageysanyeen dadka
Soomaaliyeed ee wadamada dibadda ku nool.
Xafladdii Xiritaankana oo ay kasoo qayb galeen marti
sharaf kala ah: Culimada Soomaliyed, Waalidiinta ardayda, Hay’adaha Islaamiga
iyo Warbaahinta magaalada Muqdisho ayay Xaruntu gudoonsiisay aradaydii ku
guuleysatay imtixaankii iyo tartannadii kala duwanaa abaal marinno dhiirrigalin
ah.
Seminaarkaan oo ah midkii ugu horreeyay ee noociisa ah
ee sannadahaan lagu qabto Soomaaliya waxay ardaydu uga faa’iidaysteen sidii
loogu talagalay gaar ahaan dhinacyada: Aqoonta, Isbarashada, Isku kalsoonaanta
iyo dareenka masuuliyadeed ee kaga aadan ummaddooda .
Waxaan u mahad celinaynaa dhammaan dadkii ka qayb
qaadatay qabashada seminaarka gaar ahaan macalimiintii sida hagar la’aanta ah u
bixiyay duruusta iyo casharada.
Gabagabadii Xarunta Ibnu Baaz waxay ugu baaqaysaa
dhammaan dadka jecel wanaaga ummadda ee ay ka mid yihiin: Ururrada Islaamiga
ah, Ururrada samafalka, Jaamacadaha iyo Dalladaha waxbarashada inay u qabtaan
ardayda iyo dhalinyarada kaleba seminaaro aqoon korodhsi & wacyigalin ah gaar
ahaan xilliyada fasaxa iyagoo la kaashanaya qaybaha kala duwan ee bulshada.
Xaruntanina waxay diyaar u tahay inay kaalinteeda ka qaadato barnaamijkaas.
Maamulka Xarunta Ibnu Baaz
02/08/2003
SIDOO KALANA
waxaa eey siminaaradan ka socdaan maraakizta xamar ee
kale sida MARKAZKA (MUCAAD BIN JABAL) oo isaguna ey kasocdaan laba SIMINAAR oo
kala ah mid wiilasha ah iyo mid gabdhaha ah ayadoo kan wiilasha ey ka
faaiideysanayaan ilaa in ka badan 50-wiil halka gabdhahana ey ka
faaideysanayaan in ku dhaw 70-gabdhood waxaana muuqata in maraakiztaan eey soo
nooleeyeen BARAARUGA dadka soomaaleeyd ee kunool magaalda muqdisho oo ku
baarugay barashada diinta islaamka iyo waliba kor u qaadida aqoonta umada
soomaaliyeed ayadoo eey dadku aad u xiiseynayaan wax qabadka iyo barnaamijta
MARAAKIZTAAN
W.D.Abuukay Yaasiin Xaaji daahir
abuukarsom@hotmail.com
SomaliTalk | Muqdisho Soomaaliya
