Falal dil ah oo si gaar gaar ah uga kala dhacay Dhoobley, Muqdisha iyo degmada Lafoole.

Warbixin: SomaliTalk Mogadishu Weekly | April 28, 2003

Ilaa 7 qof ayaa lagu qiyaasay tirada dad ee shalay iyo xalay lagu kala dilay deegaanada dhoobley oo ka tirsan gobolka Jubbada Hoose, Muqdisha iyo lafoole.

Dilalkan oo si goonni ah u kala dhacay ayaa waxaa ugu naxdin badnaa mid dhacay Dhoobley oo lagu dilay saddex nin oo walaalo ah, iyadoo waliba la sheegay in nin 4-aad oo la dhashay sadddexda la dilay uu halkaas ka baxsaday

dilkan ayaa waxaa ka danbeeyay Dableey hubeysan oo qafaalasho u heystey Ragaasi, ka dib markii la sheegey in aay u heysteen Nin hore oo ay isku heyb ahayeen oo la dilay, waxaana socdey dadaal xal doon ah oo ay ku howlanaayeen odayaasha deegaanka oo la doonayay in lagu soo daayo ragaasi la laayey, inkastoo oo aan lagu guulaysan, waxaana falkan aad uga xumaadey waxgaradka iyo dadka ku dhaqan deegaankaa oo ku tilmaamey mid naxdin leh, waxaana laga cabsi qabaa in ay dhacan falal kale oo aargoosi ah,waloow loo istaagey sida wararku shegayaan sidii looga hortagi lahaa.

Dadka shalay la dilay waxaa ka mid ah Col. C/laahi Maxamed Warsame oo lagu naanaysi jiray (Nero), wuxuuna ka tirsanaan jiray ciidamadii xoogga dalka Soomaaliya waxa uuna ahaa tababare xagga feerka ah, isagoo markii danbena la shaqaynayay dawladda KMG ah, wuxuuna ka mid ahaa ragga ammaanka u qaabilsan madaxtooyada C/qaasim.

I   I  D  H  E  H Mac-Hadka  ASAL ee Barashada Computerka iyo Xisaabaadka Ganacsiga: km-5 Mogadishu

Dhinaca kale, waxaa galabnimadii shalay dabaq saddex biyaano ah oo ku yaalla Xaafadda African Village ee degmada Hodan, korkiisa iska soo tuuray nin lagu magacaabo Axmed Nuur, oo ka dibna sidaa ku geeryooday, dad ay daris ahaayeen ayaa Somalitalk u sheegay in ninkan ay haysay duruuf adag oo xagga nolosha ah, waxaana loo malaynayaa ayay yiraahdeen inuu go'aan ku gaaray inuu nafta is dhaafiyo.

Falkan caynkan ah oo aan caadi ka ahayn Soomaaliya iyo dalalka Muslimka ah, ayaa mar mar dhif ah dhaca, taas oo dadka intiisa badanna ay canbaareeyaan, inakastoo wadamada aan Muslimiinta ahayn ay maalin walba ka dhacaan dilka uu qofku kula kacayo naftiisa.