I    I    D    H    E    H

Mac-Hadka  ASAL ee Barashada Computerka iyo Xisaabaadka Ganacsiga:   km-5 Mogadishu

Shirkii Dib U Heshiisiinta Soomaalida Oo Markale Dib Loo Dhigay

A. D. | weekly@somalitalk.com 
SomaliTalk | Muqdisho, Soomaaliya

September 8, 2002

Shirkii dib u heshiisiinta Soomaalida oo ka dhici lahaa dalka Kenya 16-ka bishan aynu ku jirno, ayaa mar kale hakad ku yimid sida uu caddeeyey wasiirka arimaha dibadda ee dalka Kenya Mr. Madoka oo sheegay in qabashada shirkii Soomaalida dib loo dhigay ilaa iyo dabayaaqada bisha September, iyadoo waliba ay jiraan warar kale oo sheegaya in shirku qabsoomi dooni 16-ka bisha October, Md. Madoka oo ka hadlayay sababaha keenaya mar walba dib u dhaca, ayaa ku macneeyey dhinaca farsamada awgood iyo waliba hogaamiyayaasha kooxaha oo aan samaynayn wax tanaasulaad ah.

Mr. Madoka, ayaa sheegay in aan mar danbe shirkan dib loo dhigi donin uuna qabsoomi doono waqtigaas kama danbaynta ah ee loo qabtay.

Dhinaca kale, Md. Madoka ayaa shaaca ka qaaday in dawladda KMG ah ee Soomaaliya ay ka soo qayb gali doonto shirka iyadoo dawlad ah, laakiin aysan sheeganayn, inay wadanka oo dhan ka taliso. Hadaladan ka soo yeeray wasiirka ayaa waxay si weyn u ifinayaan in beesha caalamaka inteeda badani ay xukuumadda KMG ah ay u aqoonsan yihiin dawlad Soomaaliyeed oo aan tabar lahayn.

Dhinaca kale golaha SRRC oo isagu ah garab si weyn uga soo horjeeda dawladda KMG ah, ayaa iyagu waligoodba ku celcelin jiray in ay shirkaas ka qayb gali doonin haddii dawladda KMG ah oo iyagu ay ugu yeeraan kooxda Carta ay sheegato wax dawladnimo ah.

Si kastaba ha ahaatee dib u dhaca ku imaanaya mar walba shirkan, ayaa wuxuu wadna qabad ku yahay dadka Soomaaliyeed oo ay dhegahoodu hore uga soo daalen fashilkii is daba jooga ahaa mar walba ku imaan jiray shirarkii ka horeyey midkan.

DOODFURAN:  Dib-u-dhigdda Shirka Kenya & Dadweynaha 

Dhac Loo Gaysanayo Basaska Oo Muqdisho Si Weyn Looga Dareemay

Rag dablay ah oo ku hubaysan qoryaha AK47 iyo noocyo kale oo hubka ah, ayaa la arkayay iyagoo taagan isgoysyada oo xoog ku kaxaysanaya baabuurta qaada dadka ee loo yaqaan BL-ka, ilaa iyo 25 baabuur ayaa la dhacay todobaadkii la soo dhaafay oo kaliya, iyadoo waliba dhaca baabuurtu uu ku baahay deegaanada kulaalaya gobolka Benaadir oo uu ka mid yahay Afgooye.

Ma jiraan wax dhimasha ah iyo dhaawac oo weheliya baabuur kala qaadashadan ay iskula kacayaan raga dablayda ah, oo ka soo kala jeeda qabaa’ilada, ku dhaqan gobolka Benaadir.

Arintan ayaa waxay sababtay in baabuurtu yaraato, isla markaana uu gaaro qiimihii lagu raacayay 2,000 Sh, So, halka uu markii hore ka ahaa 1000, ka dib markii, dadkii milkiilayaasha ahaa ay xeraysteen baabuurtooda, iyagoo ka baqanaya in baabuurtooda ku dhacaan shabaqa dablayda.

Dhaca baabuurta ayaa wuxuu yahay mid soo noqnoqda sanadkiiba mar ama laba, iyadoo ay taasina sabab u tahay fawdada baahsan ee ka jirta guud ahaan dalka Soomaaliya gaar ahaan, gobolada Koonfureed ee dalka.

Dagaalo ka dhacay duleedka Laas Caanood

Wararka laga helayo dhinaca raadiyayaasha loo yaqaano fooneeyaha, ayaa sheegaya in miyiga u dhow magaalada Laascaanood ay dagaalo ka dhaceen, dagaalkaas oo u dhexeeya laba beelood oo wada degan, isla gobolka Sool, dagaalkan ayaa lagu soo waramayaa inay ku dhinteen labada dhinacba ilaa 5 qof, halka uu dhaawucuna gaarayo ilaa 3 qof.

Dagaalkan ayaa lagu soo waramayaa inay la xiriiraan muran la xiriira dhinaca daaqsinka iyo deegaankaba, mana jiraan ilaa iyo hadda wax waan waan ah oo lagu doonayo in lagu qaboojiyo dagaalkaas ka soo cusboonaaday gobolka Sool oo horey logu yaqiinay xasilooni.

Arinta gobolka Sool ayaa u muuqda hadda in xaaladiisa ammaanku ay faraha ka sii baxayso iyadoo ay jiraan muranno xoogan oo u dhexeeya, Puntland iyo Somaliland oo isku haya ka talinta gobolkaas.

Mogadishu Weekly Reporter A. D

  weekly@somalitalk.com 
Muqdisho, Soomaaliya

SOMALITALK.COM | Sept  8, 2002  

WARARKII HORE EE MOGADISHU WEEKLY REPORTER - GUJI

WARARKA KALE AGOOSTO  | WARARKii  July» GUJI
» June |  MAY APRIL | MARCH | FEBRAAYO | Janaury 2002 | Wararkii 1999-2001  em@spam.com