DAWLAD G. PUNTLAND
EE SOMALIYA
|
![](marco.gif)
|
PUNTLAND STATE
OF SOMALIA
|
Xafiiska La Taliyaha Madaxweynaha
Advisor of The President
WR-0014/2002 September 11, 2002
Ku: Isimada, Waxgaradka,
Aqoonyahannada iyo Ururada Bulshada Fadhiyadooda
Ku: Jaaliyadaha DGPL ee
Debedaha Deggan Fadhiyadooda
Ku: Ururada Caalamiga ah iyo
kuwa Samafalka ah Fadhiyadooda
Ku: Dadweynaha Soomaaliyeed
Ujeedo:
Faragalinta Ethiopia
iyo Dagaal ooge Col. Abdullahi Yuusuf Axmed
Dawlada Ethiopia waxay waqti
aad u fog ay colaad iyo dhibaato ba’an ku heysay shacabka ummadda Somaaliyeed,
iyada oo wadooyin kale duwan u soo mareysey, gaar ahaan xilliyadii
todabaatanaadkii. Waxaa xusid mudan tii 1977dii, kolkii lagu jirey halgankii
xoriyad doonka Soomaali galbeed. Halgankaas oo ahaa mid ay Soomaali weyn ku
dooneysey in ay xoriyad iyo nolol wanaagsan u raadiyaan walaalahooda ku nool
degaanka Ogaadeenya. Halgankaas oo lagu fashilmey, ayna sabab u ahaayeen arrima
aad u fara badan, balse waxaan jeclahay in aan idin xusuusiyo jabkii na soo
gaarey mid ka mid ah oo aheyd in Saraakiishii wadanka ay qaarkood la
shaqeynayeen dawlada Ethiopia, kuwaas oo aan ka xasuusano Col. Cabdullaahi
Yuusuf. Col. C/llaahi Yuusuf waxa uu xogta iyo tabta dagaalka siin
jirey si toos ah taliyihii aagii uu ka dagaalamyey, taliyihii ciidamada Ethiopia
iyo madaxweynihii hore ee Ethiopia Mingistu Haila Mariama. Waa taariikh cad
oo aan caad ku jirin in uu khayaana wadan uu u cararay berrigaa, ee aanu u bixin
mucaarado dawladii Soomaaliyeed ee markaa talineysey. Ka dib waxa uu ku biirey
jabhadii SSDF.
Arrimihii ugu yaabka badnaa ee
laga xasuusto gumeynta Ethiopia iyo Madaxweyne Mingistu waxa uu ahaa xafladii
sanadguurada xilligii uu la waregay talada wadanka Ethiopia. Taas oo uu amaan
balaaran u jeediyey Col. C/llahi Yuusuf, iyada oo ay boqalaal kun
daawanayeen isu soo baxaa, idaacaduhuna ay ka dhegaysanyeen malaayiin Ethiopian
ah, taas oo fajaciso ku noqotey dawladihi reer galbeedka ahaa ee xilligaa
safaaradaha Ethiopia ka shaqeynayey. Isla maalintaa Madaxweyne Mingistu goortuu
soo gaarey meeshii uu salaan sharafta ka qaadanayey waxaa weheliyey wafdi aad u
balaaran, wafdigaa waxaa ka mid ahaa Col. C/llaahi Yuusuf, dhulka ay
marayeena waxaa ku goglanaa calankii buluugnaa ee Soomaaliya, taas oo maamulka
Mingistu u tusayeen wafdigii ka soo qeyb galay xaflada in ay Soomaaliya
gashay cagta hoose ee Ethiopia, sidoo kalana muujinayey in ay gaareen guul.
Arrintu si kastaba ha ahaatee,
dawlada Ethiopia waxay goor iyo ayaan ka faa’ideysataa kuwa badan oo magaca
Soomaali nala wadaaga, oo hadafkooda ugu fog uu yahay xukun jaceyl iyo hub doon
si ay bulshadooda u gumaadaan. Saadna la socotaan dhawaantan waxaa safar ku
joogey Ethiopia dagaal ooge Col. C/llaahi, kaas oo u tegay arrima xog
bixin iyo in uu hagitaan ka qaato maamulka Malesanaawi. Dagaal ooguhu waxa uu
hawada mariyey in safarkiisu la xiriiro xaalad caafimaad, balse safarkiisa
Ethiopia waxa uu ku qotamaa sidan, isaga oo ku andacoonaya:
- In uu la dagaalamay oo uu
laayey Al-Qaida, Al-Itixaad, iyo Asal raac diimeed.
- In uu gacanta ku dhigey
caasimada Puntland Garoowe iyo magaalooyinka ganacsiga Boosaaso iyo
Gaalkacyo.
- In uu qabsadey dhulkii
Puntland, balse uu hanan karin hadaan gargaar lala soo gaarin ciidan iyo hub
ah.
- In uu doonayo in uu la soo
wareego ciidamadii Bay joogey oo uu madaxda u ahaan jirey Gen. Moorgan, ayna
ka wada hadleen.
- In uu xabsiga dhigey cid
allaale cidii ka soo horjeedey
- In uu xirey dhamaan
xarumihii warbaahinta iyo isgaarsiinta ee xorta ahaa
Dooda dhaadheer ka dib waxaa la
soo hordhigey arrima ay ka mid yihiin:
- In uu qaato hub u yaala aaga
Galaadi
- In uu isticmaalo
maleeshiyada Baydhabo joogta oo uu madax ka ahaan jirey Gen. Moorgan, kaas
oo iminka ku sugan Boosaaso, Puntland. Maleeshiyadaas oo laga soo saarey
degaankoodii Kismaayo.
- In uu heshiis ka dhex abuuro
degaanka Bay iyo Bakool, isaga oo ku shaqeynaya ahdaafta dawlada Ethiopia
- In uu ku dhawaaqo goosasha
buuxda sida Somaliland oo kale.
- Haddii uu intaa fuliyo in uu
heli doono gargaar dhaqaale iyo aqoonsiba.
Waxaa haddaba aan daraasad iyo
baaritaan qota dheer ugu jirnaa maamulka Malesanaawi ee Ethiopia sida ay
xasilooni dari uga wadaan guud ahaan Soomaaliya, iyaga oo ku soo daldalaya
wadanka gudihiisa hub iyo maleeshiya maxeysata ah oo aan dad iyo duunya
hambeyneyn. Waxaa cad in Ethiopia ay u soo dhar dhigatey in ay dagaal hor leh
wadanka ka aloosaan, ifaafaalihii nabadana ay wiiqaan. Waa mid cad in shirka
nabbada ee ka dhacaya Eldoret, carrigaa Kenya ay dib u hakineyso Ethiopia, iyaga
oo abuuray dooda aan meesha oolin. Waana mid ay haboon tahay in dhammaan ummadda
Soomaaliyeed ay meel uga soo wada jeestaan khiyaanooyinka cadowga.
Ugu dambeyn, waxaan ugu
baaqeyaa shacabka ku abtirsata degaanada BAY iyo Bakool in is hor istaagaan
fargalinta iyo xasuuqa soo cusboonaadey oo ay madaxda ka yihiin maamulka
Ethiopia iyo dagaal ooge Col. C/llaahi Yuusuf Axmed. Sidoo kale waxaan ka
codsanayaa Ururka Qaramada Midoobey, hay’adaha madaxa banaan iyo dhammaan
hey’adaha caalamiga ah in ay ka hor tagaan gumaadka iyo colaada fog ee
Ethiopia u heyso shacabka Soomaaliyeed, kuwaas oo faragalin toos ah iyo mid
dadbanba ku haya ummadda Soomaaliyeed, gaar ahaan kuwa dihin ay ka wadaan
Puntland
Israac iyo Midninmo lagu
nagaado.
Mahadsanidin,
Osman Y. Mahamoud, La taliyaha
Madaxwenaha DGPL
omahamoud@yahoo.com
AFEEF: Aragtida qoraalkan waxaa leh qoraaga ku
saxiixan, kana tarjumi maayo aragtida SomaliTalk
WARARKA KALE
AGOOSTO | WARARKii
July» GUJI
»
June | MAY
APRIL |
MARCH | FEBRAAYO |
Janaury 2002
| Wararkii
1999-2001
em@spam.com
|