C/QAASIM
FOODKII YAAD SIISAY?
Su’aashaan
waxay ku habbooneyd in aan u dhigo sidatan: DKMG foodkii yey siisay? Waxaase
cid walba ka dheregsantahay in Afrika dawladkasta uu xukumo ninkaliya, sidaa
daraadeed ayaan buugga taariikhda waxaan rabaa in aan ugu qorno C/qaasim Salaad
Xasan arrin xasaasi ah oo waqtiga dhow iyo kan fog ee ummadda Soomaaliyeed
saameyn weyn ku yeelan doonta - Waa foodka ay dawladda Itoobiya ku dooneyso in
ay uga mid noqoto xubnaha joogtada ah ee golaha Midowga Afrika.
Taariikhdu ma
illaabi doonto, shacabka Soomaaliyeedna ma cafin doono haddii C/qaasim uu
foodkaas siiyo Gumeystaha Itoobiya. Marna ummaleyn mayo in C/qaasim
hilmaansanyahay arrintaan, balse waxaan ka baqdin qabaa in cudurka xukun
jaceylka iyo dhaldhalaalka dhow ee aan la garaneyn inta lagu waarayo ay
hilmaansiiyaan cadaawadda iyo tabcada Itoobiya noo maleegeyso iyo niyadda xun
ee xasadku iyo ihaanadu ku jirto ee Mele Zanawi nagula dhaqmayo, haddii aan
nahay qaranka Soomaaliyeed.
Cabdiyow ma
jirto xikmad ama xaalad ka dhigi karta lagamamaarmaan in codkaas aad Zanaawi
siiso asbaabaha soo socda awgood:
1. Ninkaan
iyo dawladdaan ballan iyo axdi midna ma leh, waana mid ay qireyso taarikhda
dhow iyo tan fog labaduba.
2. Wax
Itoobiya noola hartay oo ay nagu sameyn laheyd ma jirto. Way isku keen
dirtay, way naqeybisay, way na ihaaneysatay, wayna noo talisaa haddeer si
toos ah ama si dadban.
3. Lama
aamini karo, waxkasta oo ballan ah oo ay kuu ballan qaaddo waxay kaaga
baxaysaa maalinta aad foodka siiso maalinta ku xigta. Kolkaas iyana waxay
rabtay way heshay adiguna meeshaad joogtay meel ka hooseysa ayaad tageysaa,
waayo cadawgaagii ayaad awood dheeraad ah isu siisay!!
4. Haddii
Itoobiya waydo xubinnimada joogtada ah waa arrin dan weyn ugu jirto
Soomaaliya, waayo waan ognahay in Itoobiya mar walba ay caqabad ku tahay
jiritaanka qaran Soomaaliyeed.
5.
Waayitaanka Itoobiya ay weydo xubinnimada joogtada ah iyo Xarunta Midowga
Afrika waxay wiiqeysaa culeyskii Itoobiya ku laheyd Afrika guud ahaan iyo
Geeska Afrika gaar ahaan. Waana mid Itoobiya dhaxalsiin karta in ay ka
dhacaan Cinqilaabyo iyo dagaal sokeeye - taas oo keeni karta in sharteeda
iyadu isla aaddo, annaguna ka nabad galnno.
Haddaba waxaan
C/qaasim, Xasan Abshir iyo xukuumaddiisa ku adkeynayaa in ay go’aan geesinimo
leh ka qaataan arrintaan, Mele Zanawina u sheegaan in arrintaan Barlamaanka iyo
Shacabka Soomaaliyeed u taallo. Waxaan Baarlamaanka KMG ah iyo horjoogihiisa C/lle
Deerow xusuusinayaa in shaqadoodu aysan aheyn in ay wax walba oo C/qaasim iyo
Xasan Abshir rabaan ay u dhammeeyaan, waana in ay ku adkeystaan in arrimaha
Masiiriga ah ee jiritaanka Qaranimo waxyeeleyn kara ay mowqif cad ka istaagaan.
Haddii laga dul boodo waa in ay la socod siiyaan Shacabka ay magaciisa sitaan
isna beriyeelaan. Arimaha noocaan oo kale ah waa in Baarlamaanku ansixiyaa mana
aha in Madaxweyne iyo wasiirkiisa 1aad qalinka isaga duugaan.
Waxaan
xusuusinayaa siyaasi kasta iyo qabqable kasta oo maanta qalad ka gala ummaddaan
dhibaateysan in uusan ka fakan doonin qalinka taariikhda iyo miisaanka
caddaaladda labadaba. Waxaad noolaataa waa maalmo, waxaad katagtaase waa ma
guuraan, nin walbow magacaaga u nax, masuuliyadda aad heysana ha ku saxan ee
iska shaqshaq inta aadan liqin cadkeeda.
Waxaan
qoraalkeygii kusoo gunaanadayaa saddex maahmaahood oo aan anigu allifay intii
aan qoraalkaan qorayey, lagase yaabo in kuwo lamicno ah suugaanta laga heli
karo:
Nin weyn wax
looma sheego, waxbaase la xusuusiyaa.
Siyaasadi waa
tii danta guud ku jirto
Nin hooyadaa
dilay haruub caanaa looma geeyo.
Waa
mahadsantihiin dhammaan soomaaliweyn meelkasta aad joogtaan. C/qaasim iyo DKMG
waxaan ka codsaneynaa in arrinta aan kor uga hadlay ay si deg deg ah go’aankay
ka qaateen shacab weynaha Soomaaliyeed ula socodsiiyaan waayo waa arrin aad
muhiim u ah saameyn weyna ku yeelan doonta jiritaankeeda.
Cumar
Cabdinuur Nuux
omarabdinur@hotmail.com
AFEEF: Aragtida qoraalkan waa
mid u gaara qoraaga ku saxiixan
FAAFIN: SOMALITALK.COM |
AGOOSTO 12, 2002
MAQAALKA XIGA - GUJI
|