Iyadoo lagu jirto xilli eey saxaafadda elektarooniga ah ee somalidu eey heerkii ugu sareeyey sabeyneyso ayaa haddana waxaa soo if baxaya xagaldaacyeeyn eey isku sameeynayaan boggaga internetka somalida qaarkood si toos ah & si aan toos aheynba.

 

Saxaafada Xorta ah:

 

Saxaafadda xorta ah ayaa qola waliba sideey doonto isaga fasiratay iyadoo dhidibada loogu aasayo nidaamka kumanaanta sano ka hor laga tagay ee qabyaalada  oo guud ahaan fara ba'an ku haya mujtamaca soomaaliyeed.

 

Aqoonyahanno soomaaliyeed oo aan arrintan dhowr goor kala sheekeystay ayaa is heybinaya tolow maxeey naga bedeshay ku noolaanshaha aan ku noolnahay qurbaha, gaar ahaan wadamada reer galbeedka oo wax isu oggolaansho siyaasadeed oo fara badani ka jiro ? aniga wexeey ila tahay inaan soo rarnay jirkeena oo kaliya, ee marnaba aanan soo rarin quluubteena & fikirkeena ku aadan siyaasadda & arrimaha bulshada mar hadii saxaafadda elektorooniga ah ee soomaaliyeed oo inteeda badan laga hago wadamada galbeedka eey gacan siineyso gacan ku dhiiglayaashii naga soo qixiyey hoygeenii qaboobaa .

 

Dabcan dhamaantood sidan ma wada ahan, oo toboneeyo kamid ah waa kuwa lagu yaqaan dheeli tirnaan & taxadir fara badan.

 

Reer galbeedku meelo badan ayeey ku dayasho nooga mudan yihiin waxaana ka mid ah in laga ilboxo qulubka & is-heysiga ku saleysan qabiilka guracan, dabcan waa xaqiiqo in reer galbeedku leeyihiin boqolaal astaamood  oo xun oo aan looga dayan karin, nasiib xumase  dhalinayaradeenii intii xumeyd beey kaga dayadeen, oo hadii aad aragto magaalooyinka Minneapolis, Toronto & London waad ku yaqyaqsooneysaa heerka eey dhalinayaradu gaareen ilaa qaar  wiilasheenu  sidii haweenkeena caadada u aheyd dhagaha durtaan !

 

Aqoonyahanadii & qeybihii kale ee bulshada ayaa iyana la oran karaa fikir ahaan ineeysan waxba ka badalin aragtidooda ku wajahan arrinta soomalia, hadii eeysanba heer ka xun gaarin.  is beddelka la taaban karo leyskuna wada raacsan yahay ayaa ah in dad badan loo soo dhoofiyo galbeedka, waa yaabe mexeey tiradu soo kordhineysaa hadiiba  tayadu sideedii ama ka hoosba ceegaagto ???

 

Xirfadlayaasha Qabiilka & .Com-ka !

 

Bal ila fiiri markale qaab dhismeedka caalamkan casriga ah oo ku dhisan midowyo & gobollo isu tagay oo dhistay awood wax muquunin karta, sida midowga yurub (EU) & mareykanakaba (USA) !  Bal  u bar-bardhig is-faquuqida & iskali-taagida ka aloosan soomaliya, oo gobol walba, qabiil walba & juffa walibaaba u irdhineyso ineey kaligeed qaran noqoto !

 

haddana xirfadlayaasha hor boodaya qaar ka tirsan boggaga soomaalida ayaa caadeystay isku soofeynta dad walaalo ah oo boqolaal sano daris ahaa, iyagoo waliba wata -ama sugaya- baasabooro eey leeyihiin qaruumo midoobay & gobollo bohoobay oo gaashaan buur ah !  bal miyeeysan  is ceebeysaneeyn oo eeyan laheyn xubin danqata oo daqiiqada yar  ku fikirta ineey  boggan eey  isku dirka & aflagaadada uga shaqeynayaan eey  ugu adeegaan in qarankoodu  bohoobo oo goboladoodu   gaashaan buuroobaan, Ileeyn " fari  kaligeed fool ma dhaqdee" !

 

Waxaad moodaa in qaar ka mid ah bogaga soomalidu eey afkooda ku hubeysan yihiin, ha yeeshee nasiib wanaag waxba kama badali karaan awooda milatari ee juffadoodu leedahay nusqaan & ziyaadaba,  walow eey iyagu moodaan ineey ku janno tagayaan taageeridda dhiig miiratada qarankooda iibsaday, haddana waxaa hubaal ah inaan cadaab alle mooyee wax kale  lagu badsaneyn  taageerada qab-qablayaasha dagaalka oo aan aniga & inta damiirka lihiba u aaminsan nahay ineeyan waxba is dhaamin oo " dameer & dhigihiis yihiin" meel kasta & waqti walba  oo eey joogaanba.

 

Gunta & Gunaanadka

Somali badan ayaa aaminsan ineey adag tahay in leyso keeno qarankan markale, laakiin anigu taa waan ka soo horjeedaa oo waxaan qabaa in la mataaneeyey quruumo aan dhul, luqad, midab & diin toona wadaagin oo maanta hal calan & hal baasaboor dunida ku mushaaxaya, wexeey ila tahay in taa la gaari karo hadii laga soo qaado Cudurka qabyaalda inuu yahay tilmaan dadka kaa soocda oo kaliya ee aadan  cidna wax dheereyn, cidka ka hooseyn, sidee taa lagu hiigsan karaa ayaa ah su'aasha ka soo bexeysa meeshan ? waxaana ku soo koobi lahaa in aqoon yahanada soomaliyeed guud ahaan, gaar ahaan kuwooda ishoodu milicsatay caalamkan wax isu ogolaanshuhu hareeyey  in eey bilaabaan siminaaro xoog leh oo loo furo soomaalida gudaha ku dhaqan oo lagu barayo sinaanshaha aadanaha alle guud ahaan, gaar ahaan walaaltinimada islaamka misana soomaalinimada, laguna daro aragtidan maadooyinka lagu qaato loogana doodo dugsiyada hoose, dhexe, sare & jaamadahaba.

 

 

ugu danbeyntii waxaan u soo jeedin lahaa   - ka qoraa & saxafi ahaanba -  walaalheyga soomaliyeed guud ahaan, gaar ahaan qorayaasha bogaga internetka ineey ka feejignaadaan qoraaladooda  wax u dhimi kara sumcadooda mustaqbalka, ogaadaana in Alle uu su'aali doono kalimad kasta oo aan xaqiiqda ku dhisneyn ama xagal daacini ku dahaaran tahay oo eey ku daabacaan bogaga eey mas'uul ka ka yihiin ileeyn " ruux waliba wuxuu mas'uul ka yahay wixii la raacsaday, waana laga su'aal weydiin doonaa maalinta qiyaamee " Xadiis

 

Wabilaahi-Towfiiq

 

C/raxman Ceynte

MPLS, Mn

ceynteyare@hotmail.com